ارزګان کې امنیتي چارواکي ادعا کوي چې د طالبانو حملهیې په شا تمبولې او د هغوی ځواکونه نېږدې ۱۵ کېلومتره شاته شوي دي.
د ارزګان امنیه قوماندان مل پاسوال محمد ویس صمیمي ازادي راډیو ته وویل چې د چهار شنبې په ورځ افغان ځواکونو په تکتیکي ډول یو شمېر پوستې خوشې کړي او په ځوابي برید کې یې وسلهوال بېرته له دې ځایونو وایستل.
ښاغلي صمیمي زیاته کړه:
"دښمن چې کومو سیمو ته داخل شوي وو، د ترینکوټ نېږدې دوه، دوه نیم کېلومترۍ کې وې او دا سیمې مو ټولې بېرته له دښمنه ونیولې. افغان ځواکونه په ډېر مېړانه له ترینکوټ او د ارزګان له ټولو ولسوالیو دفاع کوي."
طالبانو پرون ویلي وو چې دوی ۱۵ پوستې نیولي دي او په ارزګان کې یې مهمه پوځي اډه لاندې کړې ده.
د ارزګان امنیه قوماندان وایي چې د طالبانو تر سلو ډېر کسان په دې جګړه کې وژل شوي، محمد ویس صمیمي تېر ماښام د افغان ځواکونو د مرګ ژوبلې په اړه وویل چې څلور پولیس وژل شوي او شپږ تنه هم ټپیان دي.
د چهارشنبې په ورځ کله چې ترینکوټ کې پر امنیتي پوستو بریدونه سخت شول د ترینکوټ دننه یو شمېر چارواکو ځینو رسنیو ته وویل چې افغان ځواکونه د خوړو او مهماتو ستونزه لري.
د ارزګان د ولایتي شورا مشر عبدالکریم روېټرز اژانس ته ویلي و، که هوایي ځواکونه مداخله ونهکړي او پلي ځواکونه رانهشي ترینکوټ به طالبان ونیسي، خو امنیه قوماندان وایي چې د دوی ځواکونه هېڅ راز ستونزه نهلري.
طالبانو هڅه کوله چې د ترینکوټ زندان ته ځانونه ورسوي، دوی د چهارشنبې په ورځ د زندان تر نېږدې دوه کېلومترۍ پورې پرمختګ هم وکړ.
تېر کال چې کله طالبانو د کندز ښار ونیو هلتهیې هم زندان خوشې کړ چې د دوی د بندیانو تر څنګ هغه کسان هم ټول خوشې شول چې د قتلونو، بدلمنیو، غلاوو او نورو ډول ډول جرمونو لپاره زنداني وو.
