ټاکل شوې چې ولسمشر اشرف غني او اجرائیه رئیس عبدالله عبدالله په خپله راتلونکې کتنه کې د انتخاباتي اصلاحاتو پر څرنګوالي بحث او خبرې وکړي.
د ولسمشر اشرف غني او اجرائیه رئیس عبدالله عبدالله د راتلونکې کتنې نېټه تر اوسه نهده معلومه خو د اجرائیه ریاست دوهم مرستیال محمد محقق پرون وویل، دواړه مشران به په یوه دوو ورځو کې سره وګوري او د انتخاباتي اصلاحاتو پر جزئیاتو به بحث وکړي.
په داسې حال کې چې انتخاباتي اصلاحات د ملي یووالي حکومت د دواړو مشرانو د اختلاف مهم ټکی دی، ښاغلي محقق په کابل کې یوې غونډې ته وویل، د انتخاباتي اصلاحاتو په اړه د ولسمشر فرمان په ځینو مواردو کې نور بحث ته هم اړتیا درلوده. ده هیله څرګنده کړه چې دا بحثونه به نتیجه ورکړي.
ښاغلي محقق زیاته کړه:
"یوه د انتخاباتي حوزو مسئله ده چې آیا د ولایتي حوزو په بڼه پاتې شي، جلا حوزې شي او که بله بڼه خپله کړي. بل د کمېسیون مسئله ده چې ایا د انتخاباتو کمېسیون واحد وي او که د اجرائيه کمېسیون تر څنګ د انتخاباتي شکایتونو کمېسیون هم وي. په دې اړه بحثونه شوي چې پرېکړه به انشاالله د نن یا سبا په غونډه کې پرې وشي."
بلخوا د ملي امنیت پخوانی رئیس امرالله صالح چې د اجرائیه رئیس له نېږدې متحدانو څخه دی د ښاغلي عبدالله پر پخواني دریځ ټینګار کوي او وايي چې د ملي یووالي د حکومت د جوړېدو سیاسي موافقهلیک ته درناوی نهدی شوی.
امرالله صالح خپله په حکومت کې نهدی خو په تېرو څو ورځو کې چې د ملي یووالي په حکومت کې اختلافونه رابرسېره شول دی هم د اجرائیه رئیس د پلویانو په غونډو کې راڅرګندېږي.
ده په پرونۍ غونډه کې ټینګار وکړ چې د تېرو دوو کلونو وضعیت نور د زغم وړ نهدی او هیلهیې څرګنده کړه چې د دواړو مشرانو تر منځ په راتلونکو لیدو کتو کې به چې یوهیې شوې او دوه نورې بهیې په نېږدې راتلونکې کې وشي، دې اختلافونو ته د حل لاره ومومي.
ښاغلي صالح زیاته کړه:
"د درېیم پړاو خبرې به پر دې وي چې تر کومې کچې کولای شو د ملي یووالي حکومت په نوي پړاو کې د ګډې همکارۍ زمینه برابره کړو. دې ته زه نوی پړاو ځکه وایم چې د حکومت اجرائیه رئیس عبدالله عبدالله یادونه کړې ده چې د اوسني وضعیت دوام یا د تېرو دوو کلونو تکرار ممکن انتخاب نهدی."
ښاغلي صالح په ډاګه کړه چې د اجرائیه رئیس د دریځ ملاتړ کوي.
د ملي یووالي حکومت د مشرانو تر منځ اختلافونه وروسته له هغې راڅرګند شول چې اجرائیه رئیس په دې وروستیو کې ولسمشر د ملي وحدت د حکومت د جوړېدو موافقې ته په نهدرناوي تورن کړ او ویېویل چې ده تهیې د کتنې لپاره وخت نهدی ورکړی.
له دې وروسته دواړو مشرانو د چهارشنبې په ورځ سره کتنه وکړه.
په دې کتنه کې د راپورونو له مخې ښاغلي غني د ښاغلي عبدالله غوښتنې واورېدې، د هغو د څېړنې ژمنهیې وکړه او پرېکړه وشوه چې په بله کتنه کې به بحث پرې وکړي.
