د امریکا د ډیموکراټ ګوند کاندیدې هیلري کلنټن پرون جمعه د جمهوري ریاست لپاره خپل انتخاباتي کمپاین پيل کړ.
د امریکا د جمهوري ریاست انتخابات د نومبر په اتمه کېږي.
رایې ورکونکي به د ټاکنو په ورځ د ډيموکراټ ګوند د کاندیدې هیلري کلنټن او د جمهوري غوښتونکو د کاندید ډونالډ ټرمپ ترمنځ سخت انتخاب ته مجبور وي.
کلنټن په رسمي ډول د جمهوري ریاست لپاره د ډیموکرات ګوند د کاندیدۍ تر منلو وروسته، پرون خپل لومړی تبلیغاتي سفر په بس کې پيل کړ.
کلنټن خپلو زرګونو پلویانو ته چې د دې دری ورځني انتخاباتي کمپاین په پیل کې راغونډ شوي وو، وویل:
"په دې کې شک نشته چې هر وار ټاکنې په خپل ډول مهمې دي، خو زما خپل په ژوند کې تردې مهم انتخابات نه رایادیږي، دا د دې لپاره نه وایم چې زه کاندیده یم خو د دې لپاره چې امریکایان له ډير سخت انتخابات سره مخامخ دي."
کلنټن د خپل کمپاین په ابي رنګه بس موټر کې سپره وه او پرون یې خپلو پلویانو ته يې د "په اتحاد کې قوت دی" شعارونه ورکول.
له کلنتن سره پرون په دې کمپاین کې د هغې خاوند بیل کلنټن او مرستیال هم ملګري وو.
کلنټن د جمهوري غوښتونکي ګوند د کاندید او خپل رقیب ډونالډ ټرمپ په اړه وویل:
"که تاسې په دقت د جمهوري غوښتونکو په کنوانسیون کې ویناو ته غوږ نیولي وي، تاسې به پوهېدلي یاست چې د جمهوري غوښتونکو کاندید ډونالډ ټرمپ ۷۵ دقیقې خبرې وکړې خو د حل یوه لار یې هم نه ده وړاندې کړې، په حقیقت کې، د هغه وینا د امریکا له خلکو سره د مرستې او همکارۍ پر پروګرامونو د خبروپر ځای زما پرتخریب ډېره متمرکزه وه. "
کلنټن به اوهایو او پنسلوانیا ته په دې درې ورځني سفر کې پرخپلو اقتصادي پروګرامونو او د ملي امنیت پر اجنډا خبرې وکړي.
د کلنټن رقیب کاندید ډونالد ټرمپ هم پنسلوانیان او اوهایوته د کمپاین لپاره روان دی.
نظرپوښتنې څرګندوي چې کلنټن او ټرمپ به په دې دواړو ایالاتونو کې په ډېر نازک رقابت کې پرمخ ولاړ شي.
اوهایو او پنسلوانیا د امریکا د نوروایالتونو په پرتله، د امریکا په صنعتي تولیداتوکې د کموالي له امله، ډېره اقتصادي ضربه لیدلې ده.
ډونالډ ټرمپ هڅه کوي چې له ازاد تجارت سره د مخالف سیاست او د غیرقانوني کډوالو مخالف دریځ پر اساس په دې ایالتونو کې د سپین پوستو او کارګرانو ملاتړ خپل کړي.
هغه ژمنه کړې چې په دې ډول به د امریکا اقتصاد پياوړی او امریکاییانوته به زیات کارونه پیدا کړي.
