د افغانستان اجرائیه ریاست وايي د حکومت مشران هڅه کوي چې تر راتلونکو څو ورځو د انتخاباتي نظام د اصلاح لپاره یوه عملي او قانوني طرحه جوړه کړي.
اجرائیه ریاست وايي د انتخاباتي اصلاحاتو د بدیل طرحه به د روانې اوونۍ په وروستیو کې له رسنیو سره شریکه شي.
د اجرائیه ریاست مرستیال ویاند امید میثم د یکشنبې په ورځ ازادي راډيو ته وویل چې د حکومت دواړه مشران د انتخاباتي نظام د اصلاح لپاره پر یوې جامع طرحې کار کوي.
ښاغلي میثم که څه هم د دغې طرحې په اړه زیات جزئیات ورنهکړل خو وايي هڅې کېږي چې د بروکسل له ناستې مخکې د انتخاباتي نظام په برخه کې لازم ګامونه پورته شي.
دی وايي:
"د حکومت بله برنامه به د اوونۍ په پای کې اعلان شي د انتخاباتي نظام د بدیل طرحه به له رسنیو او خلکو سره شریکه شي، د ملي یووالي حکومت مشران هڅه کوي چې راتلونکو څو ورځو کې د انتخاباتي نظام د اصلاح لپاره طرحه نهايي شي څو موږ وکړای شو چې د انتخاباتي اصلاحاتو په برخه کې عملي ګامونه پورته کړو."
نوموړی وايي دا چې د ملي شورا غړي په رخصیتو کې دي ښايي د انتخاباتي نظام د اصلاح بدیل طرحه ملي شورا ته ونهلېږل شي.
د ښاغلي میثم په خبره د انتخاباتي نظام د اصلاح د بدیل طرحې لپاره بحثونه له مشرانو، د ملي شورا له غړو، سیاسي، جهادي مشرانو او د مدني ټولنې له فعالینو سره روان دي.
د دغې طرحې جوړښت ته چمتووالی له هغې وروسته نیول کېږي چې د انتخاباتي اصلاحاتو په اړه د ولسمشر دوهم فرمان د ملي شورا د ګډې کمېټې له لوري هم رد شو.
د افغانستان د ازادو او عادلانه انتخاباتو بنسټ یا فیفا مسؤلین وايي د انتخاباتي نظام د اصلاح لپاره هره طرحه چې جوړېږي باید د انتخاباتي نظام د اصلاح د کمېسیون د پیشنهادي طرحې سره مطابقت ولري.
د دغه بنسټ مشر جانداد سپینغر په دې اړه ازادي راډیو ته وویل:
"که د کمېسیون له طرحې دباندې هغوی طرحې جوړوي دا به په دې معنا وي چې اصلاحات حکومتي دي او د خلکو او مدني ټولنو نظریات به پهکې شامل نهوي زه د همدې لپاره وایم چې باید د طرحې جزئیات روښانه کړي څو خلک پوه شي چې دغه طرحه د انتخاباتي نظام د اصلاح له کمېسیون سره همغږي ولري."
په همدې حال کې یو شمېر حقوقي کارپوهان وايي د اساسي قانون له مخې که حکومت غواړي په انتخاباتي قوانینو کې تعدیلات رامنځته کړي باید له ملي شورا سره په همغږۍ دا کار وکړي که نه له هغې پرته به مشروعیت ونهلري.
حقوقي کارپوه اجمل هوډمن له ازادي راډیو سره په خبرو کې وویل که د حکومت له لوري په انتخاباتي نظام کې د اصلاحاتو طرحه له نافذه قوانیونو سره په مخالفت کې نهوي مشکل نهلري خو که داسې موارد پهکې موجود وي چې په هېواد کې له نافذه قوانیونو سره په ټکر کې وي بیا نو مشروعیت نهلري.
راپور: محمد حدیث پردېس
