ولسمشر محمد اشرف غني وایي، هېڅ داسې سند په لاس نهلري چې ثابته کړي، پاکستان دې د حقاني شبکې او د افغان طالبانو د مشرانو پر ضد عملیات کړي وي.
ولسمشر محمد اشرف غني وایي، پاکستان د ترورېزم پر وړاندې صادقانه مبارزه نهده کړې او په وزیرستان کې یې هم چې کوم عملیات کړي، حقاني شبکهیې هدف نهوه.
محمد اشرف غني د پاکستان له جیو نیوز ټلوېزیون سره په مرکه کې ویلي، افغان ځواکونو یولس ځله د پاکستاني طالبانو د مشر ملا فضلالله پر ضد عملیات کړي، خو د پاکستان د ورته حملې هېڅ ثبوت نهلري.
په دغې مرکه کې چې د یکشنبې په شپه خپره شوه، ولسمشر محمد اشرف غني پر پاکستان له دې کبله انتقاد کړی چې په خاوره کې یې حقاني شبکه او د طالبانو مشران آزاد تګ راتګ کوي، برملا غونډې جوړوي او فعالیت کوي، خو پر وړاندې یې اقدام نه کېږي.
ښاغلی غني وايي:
"دا خبره څوک ردولی شي چې د طالبانو دفترونه په کوټه کې دي؟ تاسې ورشئ هلته له طالبانو سره خبرې وکړئ، کهیې ادرس غواړئ، زه بهیې درکړم، طالبان په ازاده توګه استخدام کوي، مالي او لوجېستیکي ملاتړ یې کېږي، موږ یوولس ځله پر فضلالله بمباري کړې، دا چې هغه ۷ ساوې لري، زما مشکل نهدی، ایا تاسو د حقاني شبکې، ملا عمر او ملا منصور پر ضد د کومې حملې بېلګه راښودلی شئ؟ منصور له کراچۍ څخه د پاکستان په پاسپورټ سفرونه کول، آیا فضلالله په افغاني پاسپورټ له کابل، هرات یا کندهاره سفر کوي؟ وګورئ، کله چې هغوی ټپيان شي، درملنهیې کېږي او په اسلاماباد کې غونډې جوړوي."
له پاکستان سره د افغان حکومت اړیکې وروسته له هغې ترینګلې شوې چې د سولې په اړه د څلور اړخیزو غونډو په ترڅ کې طالبانو د حمل په ۳۱ د کابل محمود خان پله ته څېرمه خونړۍ حمله وکړه.
وروسته افغان ولسمشر د پاکستاني چارواکو پر وړاندې خپله لهجه تُنده کړه او د ملي امنیت مسئولینو وویل چې دغه حمله په پاکستان کې پلان شوې وه.
له دې حملې سره سم ولسمشر محمد اشرف غني وویل، نور له پاکستانه د سولې هیله نهلري خو دا ترې غواړي چې د ښه او بد ترهګر تر منځ توپير ونهکړي او هغه مخالفین وځپي چې د سولې مخالف دي.
ولسمشر محمد اشرف غني له جیو نیوز سره په مرکه کې ویلي، د پاکستان او افغانستان ولسونه سره وروڼه دي، خو له حکومت سره بهیې هغه مهال اړیکې ښې شي چې پر خپلو ژمنو عمل وکړي.
ښاغلي غني زیاته کړه:
"لومړی قدم دا دی چې دوی باید د معلومو ترورېستانو په لټه کې شي، دا معلومه خبره ده چې که دوی د ترهګرو پر وړاندې عملي اقدام ونهکړي، موږ باور نهکوو، دویم قدم دادی چې دوی باید د څلور اړخیزو غونډو ژمنې عملي کړي چې هغه د سوله خوښوونکو او جګړه خوښوونکو مخالفینو موضوع ده، هغه مخالفین چې سوله نهغواړي باید له پاکستانه بهر کړای شي."
ولسمشر په خپله دې مرکه کې ویلي، د افغانستان بهرنۍ پالېسي مستقله ده او له هر هېواد سرهیې اړیکې په بل هېواد بد اغیز نهشي کولای.
له پاکستانه د ترورېزم پر وړاندې د مبارزې په برخه کې د عملي همکارۍ غوښتنې له ډېرې پخوا څخه کېږي، خو تر اوسهیې د افغان چارواکو په باور څرک نهلګېږي.
دا نهده معلومه چې د افغانستان او پاکستان تر منځ اړیکې به بېرته ښې او که د یو بل د ملامتولو له لارې به د اوسني وضعیت په څېر ترینګلې پاتې شي.
خو افغان ولسمشر د افغانستان او پاکستان د حکومتونو تر منځ د اړیکو بېرته ښهوالی، د ترورېزم پر وړاندې د پاکستان پر عملي اقداماتو پورې مشروط بولي.
راپور: اسدالله لودین
