د افغانستان جمهوري ریاست وايي، که چېرې د انتخاباتي اصلاحاتو په اړه د ولسمشر تقنیني فرمان په ګډه کمېټه کې تر بحث وروسته د ولسي جرګې له خوا تصویب نه شي د انتخاباتو بهیر به ونه درېږي او حکومت به یې په جدي ډول تعقیب کړي.
د ولسمشر د ویاند مرستیال شاه حسین مرتضوي د چهارشنبې په ورځ ازادي راډیو ته وویل، تمه دا ده چې ګډه کمېټه د یاد فرمان د اختلافي ټکو پر سر- سره سلا شي.
ښاغلي مرتضوي دغه شان وویل، که چېرې دغه فرمان د ملي شورا له خوا تائید شي د انتخاباتو د بهیر له چټکتیا سره ډېره مرسته کوي.
مرتضوي زیاته کړه:
"سنا مجلس د انتخاباتو د بهیر د چټکتیا په برخه کې یو لوی ګام واخېست او دا له نوموړي مجلس څخه د افغانستان د خلکو او حکومت تمه وه، هیله دا ده چې په ګډې کمېټه کې هم دغه فرمان تائید شي او د تائید په صورت کې ډېره مرسته کوي چې د انتخاباتو بهیر ګړندۍ شي، خو که تائید نه شي هم د انتخاباتو بهیر به ونه درېږي، حکومت هڅه کوي چې له بېلابېلو بنسټونو سره دغه موضوع په جدي ډول وڅېړي."
د افغانستان مشرانو جرګه د روانې اوونۍ د سې شنبې په ورځ د انتخاباتي اصلاحاتو په برخه کې د ولسمشر تقنیني فرمان د ځینو تعدیلاتو په راوستلو سره د رايو په اکثریت تائید کړ.
د انتخاباتي شکایتونو خپلواک کېدل، د درېیو کلونو لپاره د انتخاباتو د کمېسیون د رییس د کار موده، د انتخاباتو له څارونکو څخه د دوو بهرنیو اتبعاو لېرې کول او د رایو ورکوونکو د لړ لیک لېرې کول هغه تعدیلات وو چې د مشرانو جرګې له خوا په دغه فرمان کې راغلل.
تر دې دمخه د ولسمشر همدا فرمان د ولسي جرګې له خوا رد شوی و.
د یادې جرګې غړو ویلي وو چې یاد فرمان په خپل وخت ولسي جرګې ته نه دی رسیدلې او ځیني برخې یې د افغانستان له اساسي قانون سره په ټکر کې دي.
د مشرانو جرګې اداري پلاوی وايي، اوس چې دغه فرمان د ملي شورا د یو مجلس له خوا رد او د بل له خوا تایید شوی باید د بحث لپاره د دواړو مجلسونو له غړو څخه جوړ ګډ کمېسیون ته اړوند شي.
په ورته وخت کې د افغانستان د ولسي جرګې دوهم منشي عرفان الله عرفان وايي چې ښايي د راتلونکې شنبې په ورځ د ګډ کمېسیون لپاره د ولسي جرګې له لوري پلاوی معرفي او به خپل کار پیل وکړي.
ښاغلي عرفان زیاته کړه:
"ښايي د شنبې په ورځ زموږ له لوري دغه پلاوی معرفي شي، ځکه چې تر اوسه پورې اړوند کمېسیون نه دې ځانګړی کړی، د شنبې په ورځ موږ ته معرفي کېږي او په تالار کې به د تایید وړ وګرځي چې په خپل کار پیل وکړي، په هر حال ګډ کمېسیون باید پرېکړه وکړي چې کومه نظریه د خپل مقابل لوري قناعت خپلولای شي او زه هیله من یم چې دوی په یو ښه تفاهم سره نتیجې ته ورسېږي او مجلس یې تایید کړي."
په ورته وخت کې له انتخاباتو څخه د څار د موسسې یا ایوا مشر جاندا سپین غر وايي، که دا فرمان بیا هم د ولسي جرګې له لوري رد شي، باید د ولسمشر له خوا بل نوی فرمان ورکړل شي.
ښاغلی سپین غر وايي، بله قانوني لاره دا ده چې حکومت د ملي شورا له خوا د یاد فرمان د ردېدلو په تړاو د سترې محکمې او یا هم د اساسي قانون پر پلي کېدلو د څار د کمېسیون د حکم له مخې انتخابات تر سره کړي.
راپور: اجمل تورمان
