ايران د امريکا د الوتکو جوړولو له شرکت "بوينګ" سره د ۱۰۰ الوتکو د رانيولو پر سر موافقې ته رسېدلى دى.
د ايران د ملکي هوايي چلند ادارې مشر له "ايران" ورځپاڼې سره په خپله هغه مرکه کې چې نن خپره شوې ويلي؛ دواړه لوري د امريکا د خزانې وزارت د چارواکو تصويب ته انتظار باسي.
د ايران د هوايي چلند ادارې مشر علي عابدزاده ويلي؛ په ايران کې د موجوده مسافر وړونکو ٢٥٠ الوتکو له جملې ٢٣٠ بايد بدلې شي.
د ده په خبره له بوينګ شرکت سره د ١٠٠ الوتکو د رانيولو موافقه لاسليک شوې ده.
رويټرز اژانس د جون مياشتې پر شپږمه راپور ورکړى و چې ايران له ١٩٧٩م کال راوروسته د لومړي ځل لپاره له بوينګ شرکت څخه د الوتکو رانيولو تاريخي موافقې ته نږدې شوى دى.
وروسته له هغې چې د اټمي موافقې له مخې د جنورۍ په نيمايي کې له ايرانه اقتصادي بنديزونه ليرې کړاى شول، د ايران حکومت درېيو غربي شرکتونو ته د ٢٠٠ الوتکو فرمايش ورکړى دى.
بوينګ شرکت د چهارشنبې په ورځ تاييد کړه چې د ايران له هوايي شرکتونو سره په خبرو بوخت دى او دغه شرکتونه لېواله دي چې له دوى مسافر وړونکې الوتکې رانيسي.
د ايران د هوايي چلند ادارې رئيس ويلي، بوينګ شرکت د امريکا له خزانې وزارت نه د دغو سلو الوتکو رانيولو د موافقې د تصويب غوښتنه کړې ده.
علي عابدزاده وايي دغه تړون د ١٧ ملياردو ډالرو په ارزښت دى، خو لا هم دغه بودجه نهايي نه ده او په دې اړه تر بحثونو وروسته به نور جزئيات څرګند کړي.