په اسلام اباد کې د افغانستان سفیر حضرت عمر زاخیلوال نن چهارشنبې مازدیګر ازادي راډیو ته وویل چې د دواړو هېوادونو ترمنځ په خبرو کې پر اوربند موافقه وشوه.
د افغانستان سفیر په تورخم کې روان وضعیت ته په اشاره، هیله څرګنده کړه چې د اوربند په اړه د موافقې درناوی به وشي.
د تورخم پر سر د دواړو هېوادونو لانجه د یکشنبې په ورځ، تر هغه وروسته چې پاکستان په تورخم کې د دروازې جوړولو کار پيل کړ، شروع شوه.
د پاکستان پوځ وویل چې دا دروازه۳۷ متره د دوی په خاوره کې جوړیږي.
د پاکستان د پوځ په وینا، د دې کار د دواړو هېوادونو له امنیت سره مرسته او د تګ راتګ پر مهال د مسافرو د اسنادو دقیقه څارنه او کتنه ده.
خو د افغانستان حکومت وویل چې دورازه له موافقې پرته، د دواړو هېوادونو ترمنځ په صفري نقطه کې جوړېده.
د افغانستان سفیر عمر زاخیلوال نن څرګنده کړه چې ستونزه لا نه ده حل خو د مذاکرو پر پيل موافقه په دې ارتباط مثبت پرمختګ دی.
د زاخیلوال په وینا، دا خبرې به له پوځي چارواکو سره کیږي.
