روانه اوونۍ پر تورخم دروازه د افغانستان او پاکستان پوځيان څو- څو وارې په خپلو کې په وسلواله شخړه واوښتل.
له دواړو لوريو په دې شخړه کې د مرګ ژوبلې راپور ورکړل شوى دى.
په همدې حال کې ولسمشر محمد اشرف غني پرون چهارشنبه له سياسي او ملي مشرانو سره په يوه مشورتي غونډه کې د تورخم پر لانجې خبرې وکړې.
د جمهوري رياست په اعلاميه کې ويل شوي، چې په دې غونډه کې د امنيتي او دفاعقي قواوو د تياري او د دې ستونزې د ډيپلوماتيک حل پر لارو چارو خبرې وشوې.
صالح محمد صالح په دې اړه په ولسي جرګه کې د ننګرهار د خلکو له استازي انجنير سيد اکرام او په پېښور کې له مېشت ورځپاڼه ليکونکي روښان يوسفزي سره په يوه بحث کې په دې پوښتنې کړې دي.
اوله پوښتنه يې د ننګرهار د خلکو له استازي انجنير سيد اکرام نه کړې، چې: ولې د افغانستان او پاکستان پوځيان پر تورخم وسلوالې شخړې ته مجبوره شول؟
