د پاکستان سياسي او پوځي مشرانو د بې پيلوټه الوتکو بريد خپلې ځمکنۍ بشپړتيا او د افغانستان سولې پروسې ته زيان رسوونکى بللى.
د پاکستان سياسي او پوځي مشرانو په بلوچستان کې د امريکا د بې پيلوټه الوتکو بريد غندلى، دا يې خپلې ځمکنۍ بشپړتيا او د افغانستان د سولې پروسې ته زيان رسوونکى بللى دى.
دا په داسې حال کې ده چې د پاکستان جګپوړو سياسي مشرانو د سې شنبې په ورځ د پاکستاني پوځ په عمومي قوماندانۍ کې د دغه هېواد د پوځ او د استخباراتي ادارې له مشر سره ګډه غونډه کړې او په پاکستان او سيمه کې يې د امنيت په اړه خبرې کړي دي.
د پوځ مطبوعاتي څانګې د دغه غونډې په اړه په يوې خپرې کړې خبرپاڼه کې ويلي:
"په دغه غونډۀ کې د پاکستان د دفاع وزیر خواجه آصف، د ماليې وزیر اسحاق دار، د بهرنیو چارو سلا کار سرتاج عزیز، د پاکستاني پوځ مشر جنرال راحیل شریف او د استخباراتي ادارې ای اېس ای مشر جنرال رضوان اختر په ګډون يو شمېر نورو لوړپوړو چارواکيو ګډون درلود."
خبرپاڼه کاږي، په دغه غونډه کې سياسي او پوځي مشرانو د پاکستاني پوځ له خوا د "ضرب عضب" په نامه د پوځي عملياتو په ترڅ کې د ترلاسه شويو برياوو او همداشان په سيمه کې د روانو پرمختګونو په اړه بحث کړى دى.
د پاکستاني پوځ د مطبوعاتي دفتر د خبر پاڼې په خبره، د پوځ او سیاستوالو په تېره مياشت کې په بلوچستان کې د امریکا د بې پيلوټه الوتکو بريد په سختو ټکو کې غندلى او دا برید يې د پاکستان پر خپلواکۍ برید بللى دى.
د امريکا د بې پيلوټه الوتکو په دغه بريد کې د افغان طالبانو مشر ملا اختر منصور په داسې حال کې وژل شوى و چې تازه له ايرانه پاکستان ته ننوتى او له تفتانه کويټې ته روان وى.
خبر پاڼه د پاکستاني پوځ د مشر جنرال راحيل شريف په حواله کاږي:
"تر دغې دې پېښې سره د پاکستان او امریکا خپلمنځي اړيکيو او همداراز د څلور اړخيزې کومېټې په چوکاټ کې د افغانستان د سولې بهير ته هم زيان رسېدلى دى."
د پاکستان سياسي او پوځي مشرانو تر هغې وروسته غونډه کړې چې د داخله چار وزير چوهدري نثار علي خان په بلوچستان کې د امريکا د بې پيلوټه الوتکو په بريد کې د افغان طالبانو د مشر تر وژل کېدو وروسته اعلان کړى و چې پاکستان ته د ښاغلي نواز شريف تر راستنېدا وروسته به د قومي سلامتۍ د کومټې غونډه راوبلي.
خو په لندن کې د ښاغلي نواز شريف د درملنې له امله د هغه په راتګ کې تر ځنډ وروسته د يادې کومېټې د غونډې پرځاى د سياسي او پوځي مشرانو همدا غونډه د پوځ په مرکز کې راوبلل شوه چې په ګڼو موضوعاتو يې بحث وکړ.
د يادونې وړ ده چې د پاکستان د سياسي او پوځي مشرانو په دغه غونډۀ کې ددغه هېواد د کورنيو چارو وزير ګډون نه و کړى.
راپور: ذبيح مومند