د فرانسې ولسمشر نن وویل چې د اسراییل او فلسطینیانو ترمنځ د سولې د خبرو په اړه نړیوال کنفرانس چې ټاکل شوې وه پرون په پاریس کې جوړشي، په دې خاطرشاته وغورځول شو چې د امریکا د بهرنیو چارو وزیرنشوای کولای په کې ګډون وکړي.
د فرانسې ولسمشر فرانسوا اولانډ نن وویل، هغه نړیوال کنفرانس چې ټاکل شوې وه د اسراییل او فلسطینیانو ترمنځ د سولې د پروسې په اړه د می په دېرشمه په پاریس کې جوړشي شاته غورځول شوی دی.
اولانډ د فرانسې راډیو ته وویل، د امریکا د بهرنیو چارو وزیرجان کري نشوای کولای چې په دې کنفرانس کې ګډون وکړي.
هغه زیاته کړه چې دغه کنفرانس به په دوبي کې جوړشي.
د فرانسې ولسشمر وویل، دا د فرانسې لپاره ډېره مهمه ده چې د دغې لانجې په اړه یوپیاوړی نوښت مخ ته کړي کنه څه پېښیږي؟، د مېشت ځایونو جوړېدل او حملې به دوام کوي.
د رویټرز د راپورله مخې د هغه اشاره د اسراییل له خوا د فلسطینیانو په لاندې کړو سیمو کې د یهودي مېشت ځایونو جوړېدو او د فلسطینیانو حملو ته وه.
د دغه کنفرانس لپاره ټاکل شوې ورځ دغه راز د امریکا د رخصتي له هغې ورځې سره برابره وه چې په ترڅ کې یې دا هېواد په جګړو کې د وژل شویو سرتېرو یاد تازه کوي.
د امریکا د بهرنیو چارو د وزارت ویاند جان کربي د دوشنبې په ورځ وویل، دوی له فرانسې سره په خبرو بوخت دي چې د کنفرانس لپاره یوه بله ښه نېټه وټاکل شي چې د بهرنیو چارو وزیر جان کري وکولای شي په کې ګډون وکړي.
هغه دې ته هم اشاره وکړه چې په اوس وخت کې د کري بوختیاوې ډېرې زیاتې دي.
په عین حال کې د فرانسې د بهرنیو چارو وزیرژان مارک ارو د یکشنبې په ورځ په بیت المقدس او رام الله کې و چې د اسراییل صدراعظم بینامین نتانیاهو او د فلسطینې ادارې مشر محمود عباس ته د فرانسې د سولې د نوښت په اړه معلومات ورکړي.
فلسطیني ادارې د فرانسې د بهرنیو چارو د وزیر د دغه نوښت ملاتړ وکړ خو اسراییل ورسره مخالفت څرګند کړ.
د اسراییل صدراعظم د فرانسې په بې طرفي وروسته له هغې شک څرګند کړ چې پاریس پنځه کاله مخکې په یونیسکو کې د فلسطین د غړیتوب ملاتړ وکړ.
د فرانسې ولسمشر وویل، موږ به له ټولو لوبغاړو، سترو هېواونو او ګاونډیانو سره کار وکړو چې یوه داسې فضا رامنځ ته شي چې اسراییل او فلسطینیان وکولای شي بېرته د خبرو مېز ته کښېني.
د اسراییل صدراعظم بینامین نتانیاهو نن په بیت المقدس کې د اسراییل د د دفاع د نوي وزیر په توګه د ایګویدر رلیبرمن د لوړې د پرځای کولو په مراسمو کې وویل چې له فلسطینیانو او ټولو ګاونډیانو سره سولې ته ژمن دی:
"له دغه فرصت څخه په استفادې غواړم دا واضح کړم چې زه له فلسطینیانو او ټولو ګاونډیانو سره سولې ته متعهد یم، د عربو د سولې په نوښت کې مثبت موارد نغښتي دي چې کولای شی له فلسطینیانو سره د ګټورو خبرو له بیا پیلیدو سره مرسته وکړي."
د یادونې وړده چې د امریکا په منځګړیتوب د اسراییل او فلسطینیانو ترمنځ د سولې پروسه چې د اسراییل او فلسطین د دوخپلواکو دولتونو په رامنځ ته کېدو ټینګارکوي، له ۲۰۱۲ کال رهیسې په ټپه دریدلې ده.
