د فوایدې عامې وزارت وايي، ډېر ژربه د قوې کار اداره بیرته فعاله کړي.
د دغه وزارت چارواکي وايي، د قوې کار د بیا فعالیدو پریکړه ولسمشرغني په اقتصادي عالي شورا کې وکړه چې پر اساس به یې له نوروز وروسته د دغې ادارې د فعالیدو چارې پیل شي.
له اوږد ځنډ وروسته بیا د فوایدې عامې وزارت په چوکاټ د قوې کار اداره چې د لوېو لارو او عامه شتمنیو د حفظ او مراقبت مسولیت لري فعالیږي.
د فوایدې عامې وزارت وايي، د قوې کار د نه موجودیت له کبله د لوېو لارو، پلچکونو او ځینو نورو عامه شتمنیو د حفظ او مراقبت په برخو کې له ستونزو سره مخامخ وو.
د فوایدې عامې وزارت ویاند محمد مهدي روحاني وايي، د قوې کارپه فعالیدو به شاوخوا دوه زره کسانو ته د کار زمینه هم برابره شي.
ښاغلي روحاني د چهارشنبې په ورځ ازادي راډیوته وویل چې له نوروز وروسته به د قوای کار د کارمندانو د جذب لړۍ پیل شي.
"اوس موږ په دې باندې کار کوو چې ژرتر ژره خپل کارمندان مقرر کړو یعنې اعضا دواطلبۍ ته سپارو او له هر زونه موږ د هماغه سیمې خلک استخدام کوو څو خلکو ته سالم مصروفت پیدا شي او مشکلات یې حل شي."
د فوایدې عامې وزارت د معلوماتو له مخې د قوای کار د بیرته فعالیدو لپاره ۴۰ میلیونه ډالره ځانکړي شوي او دغه اداره به د خپلو مسولیتونو ترڅنګ د کابل له ښاروالۍ سره هم د زوبالو په انتقال کې مرسته وکړي.
د چارواکو د معلوماتوله مخې تر اوسه په افغانستان کې ۲۴ زره کیلومتره سړک پوخ شوی خو ځيني برخې یې د حفظ او مراقبط برخې ته د نه پام له کبله بیرته ورانې شوی دي.
په ورته وخت کې د ولسي جرګې د ملي اقتصاد د کمېسیون ځیني غړی د لوېو لارو د سړکونو د حفظ مراقبت لپاره د قوې کار فعالیدل ګټور ګام بولي.
د دغه کمېسیون غړي حاجی محمد هاشم په دې اړه ازادي راډیو ته وویل:
"کوم اقدام چې رییس جمهور د قوه کار په هکله کړی دی یو نیک اقدام دی امید دی چې د قوې کار په رامنځته کیدو د سړکونو حفظ او مراقبت وشي او سړکونه د تخریب مخنیوی وشي."
که څه هم چارواکي وايي، د قوې کار د ادارې په فعالیدو به د سړکونو، پلچکونو او د عامه شتمنیو د حفظ او مراقبت په برخه کې د حکومت نظارت جدي او ډېرشي خو عام خلک بیا انتقاد کوي ترهغې چې د بیارغونې او په خاصه توګه د سړکونو د پخولو په قراردادونو کې د فساد مخه ونه نیول له حفظ مراقبت سره ـ سره به د جوړیدونکو بې کیفته سړکونو تخریب همداسې دوام وکړي.
محمد حدیث پردېس