د سویډن د کورنیو چارو وزیر وایي، هېواد یې په پام کې لري چې تر اتیازرو پورې هغه پناه غوښتونکي له هېواده وباسي چې تېرکال سویډن ته ورغلي او د پناه اخیستو غوښتنې یې رد شوي دي.

د سویډن رسنۍ د اندیرش اینګوار ایګمن Anders Ingvar Ygeman له قوله خبر ورکوي چې ویلي یې دي، دوی له هېواده د ۶۰ زرو کسانو د ایستلو مساله څیړي خو کیدای شي چې دغه شمېر تر اتیازره پورې لوړ شي.

د هغه په وینا حکومت پولیسو او د مهاجرینو د ادارې اړوندو چارواکو ته دنده سپارلې چې بیرته خپلو هېوادونو د دغو رد شوېو پناه غوښتونکو د لیږلو چارې تنظیم کړي.

تېرکال سویډن ته له ۱۶۰ زرو زیات کسان ورغلي و چې دا د دې هېواد د نفوسو په پرتله تر ټولو لوی شمېر دی چې دغه اروپایي هېواد یې په خپله خاوره کې مني.

د نژدې ۶۰ زره پناه غوښتونکو پر دوسیو غور شوی او په سلو کې له پنځوسو زیات یې رد شوي دي.

سویډن ته د ورغلو پناه غوښتونکو ډیرۍ برخه یې افغانان دي.

د سړې هوا سره سره اروپا ته د کډوالو او پناه غوښتونکو د تلو بهیر روان دی.

د ملګرو ملتونو د احصایې له مخې د روان کال له پیل راهیسې یوازې یونان ته له ۴۶ زرو زیات پناه غوښتونکي او کډوال رسیدلي او له ۱۷۰ زیات هم په خطرناکو لارو مړه شوي دي.

د افغانستان او نړۍ یو شمېر مشرانو د نوي کال، نوروز په مناسبت د مبارکۍ پیغامونو کې د خلکو د هوساینې او سوله‌ییز ژوند لپاره هیلې څرګندې کړې دي.

د افغانستان پخواني ولسمشر حامد کرزي په یوه پیغام کې یو ځل بیا او په ټینګار د طالبانو پر سرپرست حکومت غږ کړی چې د نجونو پر مخ د ښوونځیو او پوهنتونونو دروازې پرانیزي، څو دوی هم وکولی شي د خپلو وروڼو په څېر زده‌کړې وکړي او د هېواد د روښانه راتلونکي لپاره هڅه وکړي.

د افغانستان د پخواني حکومت اجرایه رییس عبدالله عبدالله تمه ښودلې چې په راتلونکي کال کې، په مختلفو برخو کې د افغانستان د خلکو لپاره د ښه ژوند شرایط مهیا او د هېوادوالو د ښځینه او نارینه‌ وو انساني او اسلامي حقوق تامین شي.

د امریکا د متحدو ایالتونو ولسمشر ډونالډ ټرمپ د نوروز په مناسبت پیغام کې ویلي، د امریکا د متحدو ایالتونو په استازیتوب، خپل د زړه له کومې تبریکات له خوښیو ډک یو نوروز لپاره وړاندې کوم. نوروز مو بختور.

د ملګرو ملتونو سرمنشي انتونیو ګوتیریش ویلي، زموږ په جګړه‌ ځپلې، ویشل شوې او له لانجو ډکې نړۍ کې، د نوروز ماهیت یوه باارزښته ډالۍ ده. هیله‌مند یم چې نوروز د ټولو لپاره سوله، سلامتي او خوشحالي له ځان سره ولري.

په افغانستان کې د طالبانو له دوهم ځل واکمنۍ مخکې، د نوروز ورځ عمومي رخصتي وه او حکومت او خلکو نوروز او د نوي هجري لمریز کال پیل، په ځانګړو مراسمو سره لمانځل، خو دې حکومت عمومي رخصتي او د نوروز رسمي مراسم لغوه کړي دي.

د سوډان پوځ د جمعې په ورځ اعلان وکړ چې له نږدې دوه کلنې جګړې وروسته یې په خرطوم کې د ولسمشرۍ ماڼۍ کنټرول بیرته ترلاسه کړی دی.

دا ماڼۍ د سودان په پلازمېنه کې د سیالو ملېشه ځواکونو وروستی کلک سنګرګڼل کېده.

په خرطوم کې د ولسمشرۍ ماڼۍ نیول د سودان د پوځ لپاره د چټک ملاتړ ځواکونو یا RSF ملیشو په وړاندې یوه لویه سمبولیکه بریا ګڼل کیږي.

د اسوشیټیډ پریس په وینا، دا پیښه ښایي د جګړې د پای ته رسیدو په معنی نه وي، ځکه د RSF ځواکونه لاهم د لویدیځ دارفور پرسیمې او د سوډان پر نورو برخو کنټرول لري.

د روسیې د امنیت شورا سلاکار سرګې شویګو د جمعې په ورځ د شمالي کوریا له مشر کیم جونګ اون سره ولیدل.

د دواړو هېوادونو د رسنیو د راپورونو له مخې، شویګو شمالي کوریا ته وروسته له هغه لاړ چې په دې وروستیو کې د د دې هیواد لخوا روسیې ته د اضافي سرتیرو د لیږلو په اړه راپورونه خپاره شول.

د راپورونو له مخې، دا ځواکونه د اوکراین پر وړاندې د روسیې د جګړې د ملاتړ لپاره روسیې ته لیږل شوي دي.

د روسیې دولتي خبري اژانس تاس راپور ورکړی چې سرګي شویګو د روسیې د ولسمشر ولادیمیر پوتین پیغام کیم جونګ اون ته ورساوه.

په پیغام کې، پوتین ژمنه وکړه چې د دوی د وروستیو غونډو په جریان کې د شویو موافقو پلي کولو ته به "ډیره پاملرنه" وکړي.

د انټرفاکس خبري اژانس راپور ورکړی چې د غونډې په جریان کې، شویګو یو ځل بیا د امنیتي شراکت تړون ته د ژمنتیا لپاره د مسکو پر "بې قیدو شرطه چمتووالي" ټینګار وکړ.

د دواړو خواوو ترمنځ دا تړون تېر کال په پیونګ یانګ کې په یوه سرمشریزه کې لاسلیک شو او په هغه کې د "بهرني یرغل" په صورت کې د متقابل ملاتړ ژمنه هم شامله ده.

د لندن په هیترو هوايي ډګر کې د اورلګېدنې له امله په سلګونه زره مسافر د الوتنو له لغوه کېدو سره مخ شول.

دا پېښه د اروپا په تر ټولو بوخت مسافرتي مرکز کې د برېښنا د قطع کېدو له امله رامینځته شوې چې چارواکي یې تړلو ته اړ کړل.

د الوتنو د څارنې د خدماتو، فلایټ رادار ۲۴ په وینا، د هیترو هوایی ډګر ته او له دې ډګر څخه لږ تر لږه ۱۳۵۰ الوتنې اغیزمنې شوې دي.

د امریکا له ښارونو څخه هم څو الوتنې لغوه شوې دي. پولیسو اعلان کړی چې تر اوسه پورې د ورانکارۍ کومه نښه نه ده لیدل شوې،

خو د ترهګرۍ ضد چارواکي د پېښې لاملونه څیړي.

د هند د کرکټ د غوره لیګ( اي پي ایل) سیالۍ سبا پيلیږي.

دا د دې لوبو اتلسم لیګ دی چې لس لوبډلې پکې سیالۍ سره کوي.

سبا به د تیر کال اتله لوبډله کلکته نایټ رایډرز له رایل چلینجرز بنګلور سره مسابقه وکړي.

د ( ای پي ایل) په دې ټورنمنټ کې د افغانستان په شمول د نړۍ د بیلابیلو هیوادونو لوبغاړي لوبیږي.

سږکال د افغانستان اووه لوبغاړي د ( ای پي ایل) لوبډلو اخیستې دي، راشد خان، کریم جنت، نور احمد لکڼوال، عظمت الله عمرزی، رحمت الله ګربز، فضل حق فاروقي او الله محمد غضنفر.

د ( ای پي ایل) د سږکال د برانډ ارزښت دولس میلیارډه ډالر اټکل شوی دی. تیرکال د دې ارزښت لس اعشاریه اووه میلیارډه ډالرو ته ورسید.

د ( ای پي ایل) دا ټورنمنټ به څه باندې دوې میاشتې، یعني د مې تر پنځه ویشتمې روان وي.

د افغانستان د ښځو د سیاسي مشارکت شبکې د طالبانو له لورې په نوروز او له شپږم ټولګي ور پورته د نجونو پر زده کړو د بندیز په اړه په یوه بیان کې ویلي، افغانستان ته نوی کال له خوښیو پرته په غم رارسیدلی دی.

په دې بیان کې راغلې، لکه څرنګه چې طالبانو ښځې او ازادۍ زنداني کړې دي، نوروز یې هم بند کړی دی.

د افغانستان د ښځو د سیاسي مشارکت شبکې له نړیوالو غوښتې دي چې د ښځو د حقونو د ځپلو په تړاو غلي پاتې نه شي.

نن په افغانستان کې د نوروز لومړۍ ورځ ده.

په افغانستان او یو شمېر نورو هېوادونو کې نن د جمعې ورځ، د حمل لومړۍ نېټه، د نوي هجري لمریز کال لومړۍ ورځ او نوروز دی.

په افغانستان کې د طالبانو له بیاځلي واکمنۍ مخکې د نوروز ورځ عمومي رخصتي وه، حکومت او خلکو نوروز او د نوي هجري لمریز کال پیل د ځانګړو مراسمو په ترسره کولو سره لمانځل.
د هېواد له بېلابېلو سیمو څخه خلک مزار شریف ته تلل، چېرې چې به په دې ورځ، په ځانګړو او پراخو مراسمو کې، حضرت علي ته پر منسوبه روضه د نوروز جنډه پورته کېدله.

په کورونو کې د خلکو ترمنځ د سمنک، هفت میوې او نورو ځانګړو خوړو تیارول هم د افغانانو له لرغونو دودونو څخه دی.
ښځو او نجونو هم د سړیو په څېر، په دې مراسمو کې فعال حضور درلود.

خو د طالبانو له بیاځلي واکمنۍ وروسته، د نوروز په ورځ عمومي رخصتي لغوه شوې، او د طالبانو یو شمېر مشرانو په ښکاره توګه د نوروز د جشن له لمانځلو سره مخالفت کړی، او د پخواني جمهوري نظام پر خلاف، د نوروز په مناسبت هر ډول رسمي مراسم منع شوي دي.

له کوره د ښځو او نجونو پر وتلو د محدودیتونو سربېره، د خلکو خراب اقتصادي وضعیت، پر موسیقۍ او نورو تفریحي مواردو محدودیتونو، د خلکو ترمنځ په دودیزه توګه هم د نوي کال د لومړۍ ورځې نوروز لمانځل کمرنګه کړي دي.

په یمن کې د حوثیانو په واک کې د المسیره تلویزیون تیره شپه خبر ورکړ چې امریکایي الوتکو پلازمینه صنعا په نښه کړې ده.

دا د امریکایي الوتکو تازه بریدونه دي، چې په سره سمندرګي کې د امریکا او نورې نړۍ پر کښتیو د حملو په ځواب کې ترسره کیږي.

د صنعا درې استوګنو رویټرز اژانس ته وویل چې امریکایي الوتکو د الجراف سیمه چې د ښار هوایي ډګر ته څیرمه پرته ده ویشتلې ده.

د حوثیانو د روغتیا وزارت ویاند انیس الاصبحي په ایکسپاڼه کې لیکلي دي چې د الثوره په سیمه کې الوتکو نهه ملکیان ټپيان کړي دي.

د المسیره تلویزیون د راپور له مخې په البیضا ولایت کې هم امریکایي الوتکو بمبارۍ کړې دي. د یمن په جنوب کې دا ولایت د حوثیانو نظامي مرکز دی.

امریکایي ځواکونو د شنبې په ورځ پر حوثیانو حملې پيل کړې چې لږ تر لږه یو دیرش کسان یې ووژل.

د جنوري له شلمې راوروسته چې ډانالډ ټرمپ د امریکا د ولسمشر په توګه لوړه کړې ده دا د امریکا تر ټولو ستر پوځي عملیات دي.

د افغانستان د ساحلي فوټبال ملي ټیم به سبا له متحد عربي اماراتو سره لوبه وکړي.

د افغانستان د فوټبال فدراسیون په وینا دا لوبه به د جمعې په ورځ د کابل په وخت د مازدیګر په څلورو بجو شروع شي.

افغان لوبډله به د یکشنبې په ورځ له ایران سره او د سې شنبې په ورځ د خپل ګروپ وروستۍ لوبه له اندونیزیا سره وکړي.

د اوکراین ولسمشر وایي، چې هغه د متحده ایالاتو له ولسمشر سره واضح او ګټورې خبرې کړې دي.

ولسمشرانو ډانالډ ټرمپ او ولودومیر زیلنسکي پرون په تیلفون خبرې وکړې. د زیلنسکي تر څرګندونو مخکې ولسمشر ټرمپ په خپله خواله رسنۍ« سوشل تروت» کې لیکلي و چې دې خبرو نژدې یو ساعت دوام وکړ او د خبرو لویه برخه تر دې راڅرخیده چې د سې شنبې په ورځ یې د روسیې له ولسمشر ولادیمیر پوتین سره د اوکراین د جګړې په تړاو کړې وې.

ټاکل شوې ده چې د اوکراین د جګړې په ارتباط د راروانې یکشنبې په ورځ د امریکا او روسیې د پلاوو ترمنځ د سعودي عربستان په جدې ښار کې بیا مذاکرات پيل شي.

دواړه لوري تیره اونۍ هم د جدې په ښار کې د اوکراین پر مسالې غږیدلي وو.