د افغانستان د سوداګرۍ او صنایعو خونو یوه پلاوي د شنبې په ورځ په هغه غونډه کې برخه واخیسته چې د سارک یا د جنوبي آسیا د سیمه ییزې همکارۍ سازمان د سوداګرۍ او صنایعو د خونو له خوا جوړه شوې وه.
چین د شنبې په ورځ د سارک یا جنوبي آسیا د سیمه ییزې همکارۍ سازمان د غړیو هېوادونو د سوداګرۍ او صنایعو خونو د استازیو کوربه و.
په چین کې د دغه سازمان په سږنۍ غونډه کې د افغانستان د سوداګرۍ او صنایعو د خونو د مرستیال خان جان الکوزي په مشرۍ یوه پلاوي برخه اخیستې ده.
ښاغلي الکوزي چین تر سفر مخکې له آزادي راډیو سره د دغې غونډې د جوړېدو اهداف داسې یاد کړل:
((د ساختمان او ترانسپورټ په اړه به دغه کلنۍ غونډه کې چې په چین کې جوړیږي؛ بحث وشي.))
خو د یادې غونډې په اړه نور معلومات نه دي خپاره شوي.
افغانستان دوه کاله وړاندې یعنې په ۱۳۹۲ کال کې د سارک د غړیو هېوادونو د سوداګرۍ او صنایعو د خونو د اجراییه کمیټې د نهه پنځوسمې غونډې کوربه توب په غاړه درلود.
د هغې غونډې هدف دا و چې په افغانستان کې د پانګونې او سوداګرۍ لپاره پر فرصتونو بحث و شي.
سارک یا د جنوبي آسیا د سیمه ییزې همکارۍ سازمان یو اقتصادي او سیاسي سازمان دی چې په کې د آسیا د جنوب هېوادونه لکه افغانستان، پاکستان، هند، بنګلدیش، سریلانکا، نیپال، مالدیف او بوتان غړیتوب لري.
خو د اقتصادي چارو کارپوهان وایي؛ د یاد سازمان غړي خپلو کې ډېرې ستونزې لري او دا ستونزې د دوی پریکړې اغیزمنې کوي.
د اقتصادي چارو کارپوه سیف الدین سیحون آزادي راډيو ته په دې اړه وویل:
((زه باور نه لرم چې دا ډول ناستې او هغه هم د سوداګرۍ د خونو په سطحه لاسته راوړنې ولري. خو یو شی باید په یاد ولرو چې د خلکو متقابلې اقتصادې ګټې د دولتي بنسټونو نه پرته رامنځ ته کیږي.))
ښاغلی سیحون زیاتوي چې د دغه سازمان فعالیتونو تر اوسه د پام وړ لاسته راوړنې نه درلودې او یوازې یې تشریفاتي بڼه لرله.
دی وایې، تر هغو چې د جنوبي آسیا غړې هېوادنه خاصتا هند او پاکستان خپلو کې شته سیاسي شخړې حل نه کړي؛ نو د دغه سازمان پریکړې به د پام وړ لاسته راوړنې و نه لري.