د قزاقستان ولسمشرچمتووالی ښودلی چې د اوکرایین په ختیځ کې به د کړکېچ د هواري لپاره د یوه صادق منځګړي په توګه مرسته وکړي.
د روسیې انټرفکس خبري اژانس د نورسلطان نظربایف له قوله لیکلي چې وایې، له دې کبله کولای شي په دې برخه کې د سولې ریښتونی منځګړی اوسي چې له دواړو هېوادونو هم اوکرایین او هم روسیې سره اړیکې لري.
روسیه تورنه ده چې د سرتیرو او وسلو په لیږلو سره یې د اوکرایین په ختیځ کې ناکرارۍ رامنځته کړي دي، خو مسکو دا تورونه ردوي.
د قزاقستان ولسمشر نورسلطان نظربایف د اوکرایین په ختیځ کې د شخړو د هواري پرمرستې سربیره دا غوښتنه هم کړې ده چې د اوکرایین خپلواکې او ځمکنۍ بشپړتیا باید ډاډمنه شي.
نظربایف د یکشنبې په ورځ اوکرایین ته ترسفر دمخه په پلازمینه آستانه کې دا خبرې وکړې.
هغه ویلي چې کولای شي له روسیې او اوکرایین دواړو سره د اړیکو څخه په استفادې د سولې د یوه صادق منځګړي په توګه رول ولوبوي.
ټاکل شوې نظربایف نن په کېف کې له ولسمشر پترو پروشینکو سره وګوري.
پروشینکو پرون یکشنبه د بیلاروس له ولسمشرالکساندرلوکاشینکا سره هم په کېف کې ولیدل.
لوکاشینکا هم ژمنه کړې چې له اوکرایین سره به د دغه هېواد په ختیځ کې د بیلتون غوښتونکو په وړاندې د مبارزې او هم د هغو اقتصادي ستونزو په له منځه وړلو کې مرسته وکړي چې د همدې جګړو له کبله رامنځته شوي دي.
د بیلاروس دولتي خبري اژانس بیلتا د لوکاشینکا له قوله لیکلي چې وایې:
″زه غواړم په اوکرایین کې هرڅه ښه وي. که چېرې له بیلاروس څخه کوم څه ته اړتیا لري، نو ووایاست، موږ به ټول په یوه ورځ درته وکړو.″
د سپتمبر پرپنځمه منسک د هغو خبرو کوربه وو چې په نتیجه کې یې د اوکرایین د حکومتې ځواکونو او په ختیځ کې د روسي پلوه بیلتون غوښتونکو ترمنځ پر اوربند موافقه وشوه.
څیړونکې وایي، ښایي لوکاشینکا په خپل هېواد کې د هغو اعتراضونو له تکراره ویره لري چې په فبرورۍ کې په اوکرایین کې وشوه او په نتیجه کې یې د پخواني ولسمشرویکتور یانوکویچ حکومت ړنګ شو.
یانوکویچ هم د لوکاشینکا په څیرد مسکو یو نژدې متحد وو، خو بل خوا له مسکو سره د یانوکویچ اړیکې خرابې دي او د روسیې هغه طرح یې نه ده عملي کړې چې غواړي له بیلاروس سره یو متحد دولت جوړ کړي.
لوکاشینکا د ډسمبر پراتلسمه خپل حکومت ته امرکړی چې له دې وروسته له روسیې سره خپلې سوداګرۍ په یورو او امریکایې ډالرو ترسره کړي.
په دې وروستیو کې د امریکا او لویدیځ له خوا پر ورسیې اقتصادي بندیزونه او د نړۍ په مارکېټونو کې د تیلو د بیو کمیدل، چې د روسیې یو اساسي عاید دی، د دې سبب شوه چې د ډالروپه وړاندې د روسيې د روبل ارزښت کم شي.
دغه اقتصادي بندیزونه په اوکرایین کې د مسکو د مداخلې له کبله لګول شوي وه.
قزاقستان او بیلاروس دواړه له روسیې سره د یوې ګمرکې اتحادیې غړي دي، خو د روسیې اقتصادي ستونزو په منسک او آستانې دواړو کې اندیښنې راپورته کړي دي.