اوکراين وايي، د هېواد په ختيځ کې يې د روسي پلوه جلا غوښتونکو له خوا د نومبرپه دوهمه کېدونکې انتخابات جعلي دي او د روسيې له خوا يې د دې انتخاباتو ملاتړغندلی دی.
په اوکراين کې د لاسوهنې او د اوکراين د کريميا سيمې د جلا کولو پرسرلويديځ هېوادونو پر روسيه ګڼ شمېر بنديزونه ولګول.
پرون بيا اروپايي اتحاديې پرېکړه کړې ده چې پرروسيه لګول شوي بنديزونه به دوام وکړي.
اوکراين د دې هېواد په ختیځ کې د روسي پلوه جلاغوښتونکو د جلا انتخاباتو لپاره د روسيې ملاتړ غندلی دی.
د اوکراين د ملي انتخاتو د مخالفت له کبله، د دې هېواد په ختيځ کې ياغيانو د خپلو جلا انتخاباتو اعلان وکړ او د دې ټاکنو لپاره یې د نومبر ۲مه نېټه ټاکلې ده.
د اوکراين ملي انتخابات د تېرې يکشنبې په ورځ ترسره شول چې په کې اروپا پلوه ګوندونه بريالي شول.
د ناټو عمومي منشي جينزستولتن برګ پرون د خپلې وينا پر مهال په بروکسل کې يوې غونډې ته وويل:
″زه د اوکراين خلکو ته مبارکي وايم چې د يکشنبې په پارلماني انتخاباتو کې یې په خپل حق کارولو سره رايې ورکړې.
پر ستونزمنو حالاتو سربېره دا انتخابات د نړېوالې کچې سره سم وو او د اوکراين اکثريت خلکو په څرګنده او ډيموکراتيکه توګه د اروپا پر لور د اصلاح د اجندا لپاره ږغ پورته کړ.″
د اوکراين ولسمشرپيترو پورشنکو پرون د ياغیانو له خوا کېدونکې انتخابات جعلي وبلل او وې ويل چې دا انتخابات په بشپړه توګه د سپتمبرد مياشتې د منسک د موافقې متضاد دي.
د روسيې د بهرنيوچارو وزيرسرګي لاوروف وايي، مسکو به د جلاغوښتونکو له خوا په دونڅک او لوهانسک کې ترسره کېدونکې انتخابات په رسميت وپېژني.
پوروشنکو مخکې ويلي ووچې هرډول انتخابات بايد د اوکراين د قانون له مخې ترسره شي.
لويديځ هېوادونو د اوکراين د کړکېچ پرسرپرروسيه ګڼ شمېر بنديزونه لګولي دي.
پرون له خبرو وروسته، د اروپايي اتحاد سفيرانو بيا پرېکړه وکړه چې هغه بنديزونه به، چې د دوی د هېوادونو له خوا پر روسيه لګول شوي دي، جاري وساتل شي.
کله چې دا بنديزونه ولګول شول، د اروپايي اتحاد هېوادونو پرېکړه وکړه چې د اکتوبر د مياشتې په پای کې به په اوکراين کې د روسيې فعاليتونه څاري.
د ايټاليا او هنګري مشرانو ويلي چې دا بنديزونه بې نتيجې دي نو يا بايد اسانه کړای شي او يا هم له منځه يوړل شي.