افغان ولسمشر وايي د سولې د ټينګښت لپاره د عملي کار وخت رارسېدلى دى.
اشرف غني احمدزي دا خبره د ملي امنيت او بهرنيو اړيکو په چارو کې د پاکستان د صدراعظم له سلاکار سرتاج عزيز سره په ارګ کې د کتنې پر مهال وکړه.
د جمهوري رياست په اعلاميه کې راغلي چې دواړو لوريو پر دوه اړخيزو اړيکو، امنيتي او اقتصادي مسايلو او نورو موضوعاتو خبرې وکړې.
اشرف غني احمدزي وويل چې د سولې او ثبات ټينګښت د افغانستان په لومړيتوب کې راځي او افغانستان به اجازه ورنه کړي، چې دغه هېواد د تروريستانو په پناهځاى بدل شي.
ښاغلي احمدزي ټينګار کړى چې د سولې لپاره بايد يوازې پر خبرو اکتفا ونه شي بلکې د سولې د ټينګښت لپاره د عمل وخت رارسېدلى.
د پاکستان د صدراعظم سلاکار د خپل حکومت له خوا ولسمشر اشرف غني ته بلنه ورکړه، چې پاکستان ته سفر وکړي.
سرتاج عزيز نن کابل ته سفر وکړ.