د لاسرسۍ وړ لېنکونه

تازه خبر
یکشنبه ۳ سلواغه ۱۴۰۰ کابل ۰۸:۲۴

خبرونه

کامرون: افغان کاندیدان دې د شوو موافقو له مخې کار وکړي

د بریتانیا لومړي وزیر د افغانستان د انتخاباتو له دواړو کاندیدانو څخه غوښتي چې د رایو د تفتیش او د ملي یووالي حکومت د جوړولو پرسر د هغو موافقو له مخې کار وکړي، چې د امریکا د بهرنیو چارو د وزیر په منځګړیتوب یې کړي دي.

په کابل کې د بریتانیا سفیرد یوې اعلامیې په خپرولو سره ویلي چې؛ ډیوید کامرون پرون له غرمې وروسته د افغانستان د انتخاباتو له دواړو کاندیدانو سره په دې برخه کې ټیلفوني خبرې کړي دي.

په اعلامیه کې ویل شوي چې؛ د بریتانیا لومړي وزیرهیله مندي ښودلې چې د انتخاباتو نتیجې په ویلز کې د ناټو له سرمشریزې غونډې له جوړیدو مخکې په ډاګه شي.

د دغه اعلامیې له مخې دواړو کاندیدانو د ډیوید کامرون له څرګندونو ملاتړ کړی او له افغانستان سره یې د بریتانیا له مرستو مننه کړې.

د ورځې تازه خبرونه دلته ولولئ

په هرات کې چاودنه؛ ۵ ملکیان یې او ۱۰ نور ټپیان دي

هرات کې چاودنه

په هرات ښار کې یوې چاودنې ۵ تنه ملکیان وژلي او ۱۰ نور یې ژوبل کړي دي.

په هرات کې د طالبانو د استخباراتو یوه مسؤل ثابت هروي ازادۍ راډیو ته وویل چې چاودنه پرون ماښام پر یوه فلنکوچ ډوله مسافر وړونکي موټر د مقناطیسي ماین له کبله شوې ده.

د هرات د حوزوي روغتون مسؤلانو بیا د چاودنې له کبله د وژل شویو شمېر ۷ او د ټپيانو ۹ تنه یاد کړي دي.

د روغتون یوې سرچینې چې نه یې غوښتل د موضوع د حساسیت له کبله خپل نوم واخلي ازادۍ راډیو ته وویل، وژل شویو کې ۴ ښځې او ۳ نرینه او ټپيان هم ۵ ښځې او ۴ نرینه دي.

تراوسه د قربانیانو د هویت په اړه چارواکو څه نه دي ویلي، خو راپورونو کې راغلي چې چاودنه 'محله حاجي عباس' سیمه کې شوې چې تر ډېره شعیه مذهبه په کې مېشت دي.

مسؤلین: د هرات-بادغیس پر لار هغه مسافر ژغورل شوي چې واوره کې ایسار وو

ارشیف؛ د سالنګ لویه لار

د طالبانو چارواکي وایي چې د هرات-بادغیس پر لویه لار هغه مسافر ژغورل شوي چې واوره کې ایسار پاته وو.

د طالبانو مرستیال ویاند احمدالله وثیق تېره شپه پر خپله ټویټرپاڼه لیکلي، د سبزک کوتل په سیمه کې بند دغه کسان د دوی د اړوندو مسؤلینو او د خلکو په مرسته ژغورل شوي او لار هم د تګ را تګ لپاره خلاصه شوې ده.

د دغو مسافرو شمېر ۲۰ تنه ښودل شوی و چې پرون یې موټر د واورو په توپانونو کې بند شوي وو.

طالبان لا هم وایي چې د ښځینه فعالانو د نېول کېدو په اړه خبر نه دي

د ښځو د حقونو فعالانې

په داسې حال کې چې په کابل کې د دوو ښځینه فعالانو په توقیفېدو نړیوالې ټولنې اندېښنې ښودلي، خو طالبان لا هم وایي چې پر دې پېښې خبر نه دي.

د طالبانو ویاند ذبیح الله مجاهد پرون فرانس پرېس اژانس ته ویلي:" موږ هم کابل کې د ځينو ښځو د توقيفېدو خبر اورېدلی او له ټولو امنیتي ارګانونو سره په تماس کې شوي یو، خو هېڅ ښځه توقیف شوې نه ده، ځیني وخت متاسفانه یو شمېر ښځې د دې لپاره داسې اوازې خپروي چې لوېدیځو هېوادونو کې پناه واخلي."

ښاغلي مجاهد بیا فرانس پرېس ته ویلي، دوی د هغو معترضانو د ځپلو او زنداني کولو حق لري چې قانون تر پښو لاندې کوي.

د بښنې نړیوال سازمان وړمه ورځ له طالبانو وغوښتل چې د ښځینه زندان د یوې لوړپوړې ښځینه کارکوونکې د توقیف په اړه څېړنه وکړي او که له دوی سره وي، خوشې دې کړي.

کرکټ؛ د افغانستان لوبډله نن له هالند سره دویمه پنځوس اوره مسابقه کوي 

د افغانستان د کرکټ ملي لوبډله

د افغانستان د کرکټ ملي لوبډله نن له هالند سره دویمه پنځوس اوره مسابقه کوي.

دا لوبه چې په دوحه کې کېږي، د کابل پر وخت ۱۱ نیمې بجې پیلېږي.

افغان لوبډلې وړمه ورځ د دغې لوبډلې لومړنۍ لوبه د ۳۶ منډو په توپیر له هالنده وګټله.

د کرکټ په اړه بل خبر دا دی چې د افغانستان تر ۱۹ کلنو کشرې لوبډلې په نړیوال جام کې تېر ماښام زیمبابوې ته په ۱۰۹ منډو ماته ورکړه.

افغان لوبډلې دې نړیوال جام کې تراوسه دوه لوبې ګټلي او یوه یې بایللې ده.

کرکټ بورډ پرون ویلي و که افغان لوبډله زیمبابوې ته ماته ورکړي، د سیالۍ نورو پړاونو ته لاره پيدا کوي.

کویټ د باور جوړونې په پار لبناني چارواکو ته ځینې وړاندیزونه کړي

تصویر تزئیني بڼه لري

د کویټ د بهرنیو چارو وزیر د فارس خلیج د تېلو له بډایه هېوادونو سره د باور جوړونې په پار لبناني چارواکو ته ځینې وړاندیزونه کړي دي.

اسوشیتید پرېس خبري اژانس ویلي چې د کویټ د بهرنیو چارو وزیر شیخ احمد ناصر الصباح د فارس خلیج لومړنی لوړپوړی چارواکی دی چې د لبنان، سعودي او د ګاونډیو له بې سارې ډيپلوماتیکي لانجې وروسته بیروت ته سفر کوي.

دا دیپلوماتیکه لانجه د تېر کال په اکتوبر میاشت کې وروسته له هغه رامنځته شوه چې د لبنان د اطلاعاتو وزیر جورج کرداحی د یمن جګړه بې ګټې او د سعودي په مشرۍ ایتلاف یې یرغلګر وباله.

دا لانجه ځينې نورې ژورې رېښې هم لري او هغه دا چې سعودي په سیمه او په ځانګړې توګه لبنان کې د ایران له نفوذه اندېښمن دی.

اوکراین: جرمني د  یووالي د کمزوري کولو او د پوتین د تشویقولو هڅه کوي

د اوکراین د بهرنیو چارو وزیر

په داسې حال کې چې پر اوکراین د روسیې احتمالي یرغل ته اندېښنې ډېرې شوي، اوکراین تور پورې کړی چې جرمني د " یووالي د کمزوري کولو" او د ولادمیر پوتین د تشویقولو هڅه کوي.

د اوکراین د بهرنیو چارو وزیر دیمیترو کولبا پر خپله ټویټرپاڼه لیکلي چې " اوکراین ته د دفاعي وسلو د لېږد د امکان د نشتوالي په اړه د جرمني وروستی دریځ د اړیکو له کچې او شته امنیتي وضعیت سره مطابقت نه لري.

د اوکراین د بهرنیو چارو وزیر د جرمني پر دې خبره خواشیني څرګنده کړې چې ویلې يې دي، اوکراین ته د دفاعي وسلو د لېږد امکان نه شته.

د جرمني د دفاع وزیرې کریستین لامبرخت پرون وویل چې برلین په فبروري میاشت کې اوکراین ته یو ګرځنده روغتون لېږي، خو دا یې رد کړه چې ګواکي کیف ته به وسلې ورکړي.

اوکراین له جرمني غوښتي چې پر خپل دې دریځ له سره غور وکړي.

طالبان: د بادغیس سبزک سیمه کې ۲۵ کسان په واورو کې ګېر پاتي

ارشیف، عکس تزئیني بڼه لري

په بادغیس ولایت کې د طالبانو چارواکي وايي، په سبزک سیمه کې له تېرماښام لږ تر لږه ۲۵ کسان په واورو کې راګېر پاتې دي.

د بادغیس لپاره د طالبانو د اطلاعاتو او فرهنګ رئیس او د والي ویاند، مولوي باز محمد سروري، ازادي راډیو ته وویل، دغه کسان د بادغیس هرات پر یوه لار بند پاتې شوي.

نوموړي وویل: "پر دې لویه لار شااوخوا ۲۵ مساپر په څلورو موټرو کې راګېر پاتې دي چې همدا اوس له ځمکنۍ او هوايي لارې د ژغورنې عملیات روان دي."

ښاغلي سروري وویل، دغه کسان چې غوښتل یې له بادغیس څخه هرات ته لاړ شي، پر هغه لویه لار راګیر پاتې دي چې بادغیس له شمالي ولایتونو سره تړي.

په ځینو رسنیو کې د راګیرو پاتې شوېو کسانو شمېر ۶۰ ښوولی، خو د بادغیس چارواکي دغه شمېر نه تاییدوي.

د 'IPL' بولۍ لپاره نوملېکنه د جنوري په ۲۰مه نېټه پای ته ورسېده

د ای پي اېل سیالۍ

د ۲۰۲۲م زیږدیز کال انډین پریمر لیګ 'ای.پي. اېل' بولۍ لپاره نوم لېکنه د جنوري په ۲۰مه نېټه پای ته ورسېده او ټول '۱۲۱۴' لوبغاړو خپل نومونه ثبت کړي دي چې له دې څخه ۸۹۶ د هند او ۳۱۸ د بهرنیو هېوادونو څخه دي.

د ورزشي اژانسونو د راپورونو له مخې د ۲۰۲۲ م زیږديز کال بولۍ مراسم به د فبروري په ۱۲مه او ۱۳ مه نېټه په بنګلور کې ترسره شي.

په دې لیک سږکال دوه نورې لوبډلې لکنهو او احمدا اباد هم وراضافه شوي دي او یادې لوبډلې به د نړۍ مشهور لوبغاړي د لوبو لپاره پېري.

په 'ای.پي.اېل' کې له اسټرالیا ۵۹ له افغانستان څخه ۲۰، له بنګله دیش څخه ۹، د انګلستان څخه ۳۰، له ایرلنډ څخه ۳، د نیوزلنډ څخه ۲۰، له سویلي افریقا څخه ۴۸، سریلانکا څخه ۳۶، د وېسټ انډیز څخه ۴۱ او زمبابوې څخه ۲ لوبغاړو هم نوملېکنه کړې.

وروستیو ورښتونو، سېلابونو او زلزلې افغانستان کې ۳۸ کسان مړه کړي

بادغیس کې یو کور د زلزلې له امله نړیدلی

د طبيعي پېښو پر وړاندې د مبارزې وزارت وايي، په بېلابېلو ولایتونو کې د مرغومي/جدي له ۱۳مې د ورښتونو، سېلابونو او زلزلې له کبله ۳۸ کسان مړه شوي دي.

د دغه وزارت ویاند، محمد نسیم حقاني نن رسنیو ته په لیږلي ویډیويي پیغام کې وویل: "تر اوسه تر لسو په زیاتو ولایتونو کې د زلزلې، توپانونو، ورښتونو او سېلابونو له کبله تر اوسه ۳۸ کسان شهیدان، ۵۴ تنه ټپیان او تر ۸۰۰۰ زیات استوګنځایونه قسمي یا بشپړ تخریب شوي دي. د طبیعي پېښو پر وړاندې د مبارزې وزارت له خوا د هر شهید کورنۍ ته ۵۰زره افغانۍ او د ټپیانو کورنۍ ته ۲۵زره افغانۍ ورکړل شوي دي."

ښاغلی حقاني وايي، د بادغیس- هرات لویه لار هم د درنو واورو له کبله تړل شوې چې د پرانیستلو هڅې یې روانې دي.

د طالبانو حکومت خلکو ته خبرداری ورکړی چې د وروستیو ورښتونو او سېلابونو له کبله له ضرورت پرته سفرونه ونه کړي، ځکه په زیاتو ولایتونو کې لویې لارې تړل شوي دي.


د بریتانیا د بهرنیو چارو وزیره لیز ترس مسکو ته ځي

د بریتانیا د بهرنیو چارو وزیره لیز ترس

د بریتانیا د بهرنیو چارو وزیره لیز ترس له خپل روسي سیال سرګي لاوروف سره د خبرو لپاره را روانه میلادي میاشت مسکو ته ځي.

د روسیې خبري اژانس تاس، د بهرنیو چارو وزارت د ځینو سرچینو په حواله دا خبر ورکړی دی.

تاس نن شنبه (د سلواغې ۲مه) د سرچینو په حواله ویلي چې د بهرنیو چارو وزیرې مسکو ته د سفر د فرصت غوښتنه کړې وه چې دا کتنه یې تصویب شوه.

تر اوسه د بریتانیا حکومت د دې سفر په باب تبصره نه ده کړې.

دا به د ۲۰۱۷م کال له ډسمبر میاشتې را وروسته لومړی وار وي چې د بهرنیو چارو یو وزیر روسیې ته سفر کوي.

په بلخ کې وزلوبه وشوه

آرشیف- عکس تزئیني بڼه لري

په بلخ ولایت کې وزلوبه وشوه.

د افغانستان د بدني روزنې او ورزش ریاست په خپل فیسبوک پاڼه کې لیکلي چې یادې سیالۍ له بلخ ولایت د پنځو ولسواليو لوبغاړو په ګډون د یوې ورځې لپاره 'پرون' ترسره شوې.

د دې ریاست د معلوماتو له مخې، عبدالصبور پهلوان او ګلبدین پهلوان د دې سیالیو اتل چاپندازان ونومول شول او د نغدي جایزیو ترڅنګ ورته ستاینلیکونه هم ورکړل شول.

د بدني روزنې او ورزش ریاست د دغو سیالیو موخه د کابل لیګ ته د بلخ ولایت د چاپندازانو چمتو والی ښودلی دی.

ټاکل شوې د کابل لیک د سړې هوا په کمېدو سره د راتلونکي یو میاشت په لړ کې په کابل کې پیل شي.

د افغانستان کرکټ بورډ غوره لوبغاړو ته په افغانیو جایزې ورکړې

د دې لوبې غوره لوبغاړی د افغان لوبډلې لوبډل مشر حشمت الله شاهدي ونومول شو

د افغانستان کرکټ بورډ له هالنډ سره په پرونۍ سیالۍ کې د لوبې غوره لوبغاړو ته په افغانیو جایزې ورکړې.

د کرکټ بورډ دغه ګام په ټولنیزو رسنیو کې د ورزشکارانو له خوا ستایل شوی او د ورزش نورې ادارې هم ورته ګام ته تشویق کړی.

د افغانستان د کرکټ بورډ‌ ویاند فرید هوتک د شنبې په ورځ(د سلواغې ۳مه) ازادي راډيو ته وویل، دا ګام د افغانیو د دودولو لپاره پورته شوی.

افغانستان د جمعې په ورځ له هالنډ سره درېیو پنځوس اووریزو نړېوالو لوبو لوبړلۍ پیل کړه.

افغانستان په خپله لوموړنۍ لوبه کې هالنډ ته په ۳۶ منډو ماتې ورکړه او لومړۍ بریا یې په خپل نوم کړه.

د دې لوبې غوره لوبغاړی د افغان لوبډلې لوبډل مشر حشمت الله شاهدي ونومول شو چې د دې لوبړلۍ د ملاتړي 'سپانسر' له خوا ورته ۴۰ زره افغانۍ جایزه ورکړل شوه.

د نورستان ځینې اوسېدونکي: د مرستو وېش کې توپيریز چلند کېږي

نورستان کې له ځینو خلکو سره شوې مرسته

د نورستان یو شمیر اوسېدونکي شکایت کوي چې د مرستو په وېش کې ورسره توپيریز چلند کېږي.

دوی وايي، د سروې مامورین چې څوک پېژني د هغوی نومونه لیکي او مرستې ورسره کوي او په وینا یې د چا واسطه او پېژندګلوي نه وي هغوی له هر ډول مرستو بې برخې کیږي.

د منډول ولسوالۍ قومي مشر خان محمد خان یې په اړه وايي: "زموږ ولسوالۍ کې۴۰ سلنه هغو کسانو مرستې اخستي چې د کورونو سړک سره نږدې پراته دي او یا هم د سروې کوونکو سره پېژندګلوې لري. د سړک له غاړې بل خوا نه دي تللې."

د منډول په څېر د نورستان له نورو سیمو هم د سروې کوونکو او د مرستو له وېشونکو ورته شکایتونه کېږي.

دوی له طالب چارواکو او موسساتو غواړي چې داسې کسان په دندو وګماري چې خپلې دندې په سمه توګه ترسره کړي او د خپل پردي توپیر ونه کړي.

نورستان کې طالب چارواکي هم مني چې په ترسره شوېو سروې ګانو کې یاده ستونزه موجوده وه.

د دې ولایت لپاره د طالبانو مطبوعاتي مسول مولوی سمیع الحق حق بیان ازادي راډیو ته وویل: "نورستان کې د بېلابېلو موسساتو له خوا مرستې شوي، د وېش په اړه یې ډېر شکایتونه راغلي، زموږ له خوا ټاکلي پلاوي ته معلومه شوه چې ځینو سیمو کې توپيرېز چلند شوی او د دغه ډول چلند د بندیدو امر يې کړی."

په نورستان کې په داسې حال کې د مرستو په وېش کې د توپیر چلند څخه خلک شکایت کوي چې په یاد ولایت کې د یونېسف له خوا په ترسره شوې سروې کې ۱۵۰۰۰کورنۍ مستحقې ګڼل شوي چې هرې کورنۍ ته ۲۷۵ ډالر ورکول کېږي او د یادې مرستې وېش اوس مهال دوام لري.

نورستان د هېواد په ختیځ کې لېرې پروت، غرنی او یخ ولایت دی چې اوسېدونکي يې لږه ځمکه لري او تل د خوراکي موادو کمي سره مخ وي.

یوناما د دوو افغان ښځینه فعالانو پر لادرکۍ اندېښنه وښوده

پرون د بښنې نړیوال سازمان له طالبانو د عالیې عزیزي په نوم د نیول شوې پخوانۍ چارواکې د بې قید و شرطه خوشې کېدو غوښتنه وکړه.

د ملګرو ملتونو مرستندوی ماموریت یا یوناما د دوو افغان ښځینه فعالانو پر لادرکۍ اندېښنه وښوده.

یوناما نن په خپل ټویټر کې لیکلي، ملګري ملتونه د دوو ښځینه فعالانو تمنا زریابي پریاني او پروانې ابراهیمخېل پر لادرکۍ سخته اندېښنه لري.

د یوناما په ټویټ کې ویل شوي چې د راپورونو له مخې دغه دوې ښځینه فعالانې د چهارشنبې ناوخته له خپلو کورونو نیول شوي دي.

د ملګرو ملتونو دغې ادارې له طالبانو غوښتنه کړې ده چې د دغو ښځینه فعالانو د ځای ځایګي په اړه معلومات ورکړي او د ټولو افغانانو حقونه خوندي کړي.

طالبانو د دغو ښځینه فعالانو د برخلیک په اړه تازه تبصره نه ده کړې، خو پرون د بښنې نړیوال سازمان له طالبانو د عالیې عزیزي په نوم د نیول شوې پخوانۍ چارواکې د بې قید و شرطه خوشې کېدو غوښتنه وکړه.

عالیه عزیزي چې په تېر حکومت کې د هرات د ښځینه زندان مشره وه، د ۲۰۲۱م کال د اکتوبر میاشتې پر دویمه نېټه کار ته پر لار ونیول شوه.

یونېسف: افغانستان کې د اساسي توکو د وېش لپاره زموږ هڅې روانې دي

ارشیف، عکس تزئیني بڼه لري

د ماشومانو د ملاتړ لپاره د ملګرو ملتونو مرستندوی صندوق یا یونېسف وايي، په افغانستان کې د اساسي توکو د وېش لپاره د دوی هڅې روانې دي.

یونیسف نن شنبه په خپل رسمي ټویټر کې له یوه متن سره یوه ویډیو هم خپره کړې چې وايي، د ژمي له سختېدو سره د دوی ټیمونه د خیمو، کالیو او بړستونو په ګډون د ضروري مرستو په رسولو بوخت دي.

دغه اداره وايي، یوازې یې په هرات ولایت کې پر ۱۷۰۰ کورنیو دغه مرستې وېشلي دي.

د ملګرو ملتونو سرمنشي انتونیو ګوتیریش د پنجشنبې په ورځ په یوه مرکه کې وویل، دا ډېره مهمه ده، چې له افغانستان سره بشري مرستې لا زیاتې شي، ځکه افغانان په داسې وضعیت کې دي، چې د لوږې له کبله یې ژوند ته د مرګ خطر پېښ دی.

انتونيو ګوتیریش په خپلو خبرو کې وویل، د افغانستان نیمايي وګړي بشري مرستو ته سخته اړتیا لري او په کاد ده چې د اقتصادي پیاوړتیا لپاره له دغه هېواد سره د نقدو پیسو مرستې وشي.

نور راوښيه

XS
SM
MD
LG