راپور: خان محمد "سیند"
د افغانستان د ځوانانو ملي او ټولنیزه موسسه له دولته غواړي چې؛ د هېواد د ځوانانو د ستونزو اواری ته دې تدابیر ونیسي.
د دې موسسې غړو د چهارشنبې په ورځ په کابل کې په یوې غونډه کې وویل، د هېواد ځوانان په وروستۍ څه باندې یوه لسیزه کې په مختلفو برخو کې له پامه غورځول شوي او پکار ده چې؛ د پرمختګونو په ټولو برخو کې ونډه ورکړل شي.
افغان چارواکې وایي، د ځوانانو د ستونزو حل او پرمختګونو ته یي یوه پنځه کلنه ستراتیژي ترتیب کړې او عملي کول به یي د ځوانانو ستونزې کمې کړي.
د دې موسسې له خوا په وروستیو څه باندې لسو کلونو کې د افغانستان د ځوانانوعمده ستونزه بیکاري او بهرنیو هېوادونو ته د غیر قانوني تګ هڅه بلل شوې ده.
د افغان ځوانانو د ملي ټولنې مسوولینو وویل، د حکومت په مربوطو ارګانونو کې د ځوانانو لپاره د ځانګړو پروګرامونو کموالی د دې سبب شوی چې؛ ځوانان له مختلفو ستونزو سره مخ شي.
د دې موسسې مشر ارش بارک له حکومته وغوښتل چې، د دغه ځواک له جسمي او فکري توان څخه دې د پراختیا او پرمختګ په مختلفو برخه کې کار واخیستل شي:
"کومې ستونزې چې؛ په دې غونډه کې مو ورته لومړیتوب ورکړی، هغه د هېواد د ځوانانو بیکارې او بهر ته غیر قانوني تګ دی.
دې دوه ستونزو زموږ د ځوان نسل پر ذهنونو ناوړه اغیز کړی.
اوس د دې وخت را رسیدلی چې؛ د دې ستونزې حل ته تدابیر ونیول شي."
دوی وویل، د هېواد د نفوسو څه باندې پنځوس فیصده له ځوانانو جوړه ده او په هېواد کې د اقتصادي ستونزو له امله د دوي ځیني اړ وځي چې؛ بهر ته لاړ شي، یا په مخدرو موادو روږدي شي او یا د مخالفینو پر لیکو ورګډ شي.
په غوڼده کې د اطلاعاتو او فرهنګ د ځوانانو د چارو مرستیال تیمورشاه اسحق زی وویل، د هېواد د ځوانانو د ستونزو حل او د دوي پرمختګونو ته یې د یوې پنځه کلنې ستراتیژي طرح ترتیب کړې او عملي کېدل به یې د ځوانانو ستونزې کمې کړي:
"له نیکه مرغه د ځوانانو د ملي پالیسۍ په جوړولو مو کار پیل کړی.
په کار کې د حکومت څو وزارتونه برخه لري، پلانونه سره هم اهنګ شوي او هر وزارت مکلف شوی چې په خپله کاري برخه کې د دې ستونزې حل ته پروګرامونه ترتیب کړي.
دا طرح به لومړی د وزیرانو شورا او بیا به د جمهوررییس توشیح ته وړاندې شي."
ده دا هم وویل، د ځوانانو په حاضره غونډه کې به د دوي نظریات او پیشنهادونه هم یاد داشت او ترتیب شي او ستراتيژی به پرې نوره هم بډایه کړي.
کارپوهان په هېواد کې د کار نشتوالی یوه لویه ټولنیزه اقتصادي او حتی امنیتي ستونزه ګڼي.
دوی وایي، سره له دی چې اوس مهال په لکونو ځوانان د کار په لټه کې دي.
هرکال د هېواد له ښوونځیو څخه په لسګونو زره نور هم فارغیږي، چې ټول یې پوهنتونونه نه شي جذبولی او اکثره یې وزګار پاتې کېږي.