د لاسرسۍ وړ لېنکونه

تازه خبر
یکشنبه ۱۹ زمری ۱۳۹۹ کابل ۰۳:۵۷

نړۍ

د ګرجستان پارلمان د ولسمشر د صلاحیتونو د محدودولو په پلوي رایه ورکړه

په ګرجستان کې د ولسمشر میخاییل ساکاشویلي او صدراعظم بیدزینا ایوانیشویلي ترمنځ د قدرت پرسر د لانجې په دوام د هېواد پارلمان د ولسمشر د صلاحیتونو د محدودولو په پلوي رایه ورکړه.

د ګرجستان د رهبرانو ترمنځ د قدرت پرسر لانجه وروسته له هغه راغله، چې د ساکاشویلي د متحد ملي نهضت ګوند په وروستیو پارلماني انتخاباتو کې د ایوانیشویلي د ګوند په وړاندې ماتې وخوړه.

د رايي ورکولو د درېیو پړاوونو په لومړي پړاو کې پارلمان پرون په قاطع اکثریت سره پرېکړه وکړه، چې ولسمشر د حکومت او پارلمان د ړنګولو صلاحیت نه لري.

ولسمشر ساکاشویلي په یوه ټلویزیوني وینا کې وویل، چې په هېواد کې د ډیموکراتیک ډیالوګ او تفاهم لپاره دا رایه ضروري وه.

د ورځې تازه خبرونه دلته ولولئ

پاکستان سر له سبا ټولې نړیوالې الوتنې بېرته پیلوي

د پاکستان کراچۍ کې هوايي ډګر

پاکستان اعلان وکړ چې د اګسټ له نهمې نېټې څخه به ټولې نړیوالې الوتنې بېرته پیل کړي.

څه باندې څلور میاشتې وړاندې دغه هېواد د کرونا ویروس د خورېدو د مخنیوي لپاره دغه الوتنې ځنډولې وې.

د پاکستان د ملکي هوایي چلند ادارې نن شنبه دا اعلامیه خپره کړه.

تر دې یوه ورځ دمخه حکومت د ټولو اقتصادي او ټولنیزو سکټورونو د پرانیستلو اعلان کړی وو.

دغه هېواد د اګسټ پر شپږمه نېټه په خپلو ټولو هوایي ډګرونو کې کورنیو الوتنو ته اجازه ورکړه. په دې هېواد کې تر ۲۸،۳۰۰ ډېر کسان په کرونا ویروس اخته شوي دي.

ولسمشر غني د هند حکومت ته د یوې الوتکې د لوېدو قربانیانو تسلیت ووایه

هند کې لوېدلې الوتکه

د افغانستان ولسمشر د هند حکومت او خلکو ته د هغوی د یوې الوتکې د لوېدو په پېښه کې د ۱۸ کسانو د وژل کېدلو له کبله تسلیت ووایه.

له ارګ څخه په یوې خبرپاڼه کې د محمد اشرف غني له قوله راغلي چې د افغانستان حکومت او خلک له هند سره په دې غم کې شریک دي.

د ایر ایندیا اکسپرس مسافر وړونکې هوایي شرکت الوتکه د جمعې په ورځ په کرالا ایالت کې د کېناستلو پر مهال راولوېده.

د الوتکې د کېناستو پر مهال سخت باران اورېده.

د روېټرز خبري اژانس په خبره په دې پېښه کې ۱۶ کسان سخت ټپیان شوي دي.

په دې الوتکه کې هغه هندي مسافر له دوبۍ څخه هند ته روان ول چې د کرونا ویروس له کبله د نړۍ په بېلابېلو سیمو کې بند پاتې شوي ول.

امریکا له لبنان سره نږدې ۱۵ میلیونه ډالره مرسته کوي

د امریکا ولسمشر ‌ډونالډ ټرمپ

د امریکا ولسمشر ‌ډونالډ ټرمپ به سبا ( یکشنبه) په هغه ټیلیفوني کنفرانس کې شرکت وکړي چې په کې به له لبنان سره په مرستو بحث کېږي.

د فرانسې، لبنان او نورو هېوادونو مشران هم په دې کنفرانس کې برخه اخلي.

د بیروت بندر د سه شنبې په ورځ د یوې خونړۍ چاودنې شاهد و چې په کې نژدې یوسلو څلوېښت کسان ووژل شول او د د بیروت ښار ځېنې برخې یې ویجاړې کړې.

ټرمپ پرون پر خپل ټویټر په دې کنفرانس کې د خپل ګډون خبر ورکړ او ویې ویل ټول غواړي له لبنان سره مرسته وکړي.

د امریکا د متحدو ایالتونو نړیوالې پراختیايي ادارې ویلي، په درې راتلونکیو میاشتو کې په لبنان کې پنځوس زره کسانو ته د خوړو برابرولو په شمول به تر ۱۵میلیونه ډالره مرسته دې هېواد ته برابره کړي.

د لبنان ولسمشر میشل عون د جمعې په ورځ وویل، ښايي بم یا بهرنی عامل د دې سترې چاودنې سبب شوی وي.

دا د لبنان لومړۍ لوړپوړی چاروکی دی چې پرون یې وویل، د دې احتمال شته چې دا چاودنه په قصدي توګه رامنځته شوې وي.

ایټالیا کې د کویډ۱۹ مخنیوي په هدف محدودیتونه وغځېدل

ارشیف

ایټالیا د کرونا ویروس د خپرېدو د مخنیوي لپاره تدابیر د سېپټېمبر تر اومې نېټې پورې تمدید کړل.

ایټالیا یو له هغو هېوادونو دی چې د کرونا وبا د خپرېدو د پیل پر مهال تر ټولو زیات ځپل شوی.

د کرونا د خپرېدو د مخنیوي لپاره د تدابیرو د غزولو پرېکړه پرون د دې هېواد په کابینه کې وشوه.

دغلته به په عامه سرپټو ځایونو کې د ماسک کارول لا هم جبري وي او خلک باید له یو بل سره فزیکي واټن هم وساتي.

دې هېواد کې په لویو غونډو هم بندیز لګېدلی دی.

په ایټالیا کې د کرونا ویروس له کبله تر اوسه د پنځه دېرش زرو څخه د زیاتو کسانو مړینه ثبت شوې ده.

چارواکي: ښايي د بیروت په پېښه کې کوم بمب یا "بهرنۍ مداخله" دخیله وي

د تېرې سې شنبې په هغه چاودنه کې د مړو شمېر لږ تر لږه ۱۵۴ ته رسېدلی او د بروت زیاتې برخې تخریب شوي دي.

د لبنان ولسمشر وايي په پلازمېنه بیروت کې په وروستۍ ویجاړوونکې چاودنه کې ښايي کوم بمب یا "بهرنۍ مداخله" دخیله وي.

د تېرې سې شنبې په هغه چاودنه کې د مړو شمېر لږ تر لږه ۱۵۴ ته رسېدلی او د بروت زیاتې برخې تخریب شوي دي.

د ولسمشر میشل عون په پرونیو څرګندونو کې د لومړي وار لپاره د لبنان د کوم لوړپوړي چارواکي له خوا وروستۍ چاودنه قصدي عمل کېږي.

دا څرګندونې په داسې حال کې کېږي چې د ژغورنې نړیوالې ډلې د قربانیانو د موندلو لپاره د کنډوالو په پلټلو بوخت دي.

روسیه کې ۳ فعالانو ته د بند د اوږدمهالې سزا غوښتنه شوې

دغه تمثال د ۲۰۱۸میلادي کال په نوامبر میاشت کې د پرم ښار د لنین په مرکزي میدان کې درول شوی و.

د روسیې په پرم ښار کې یوه څارنوال درېیو فعالانو ته د بند د اوږدمهالې سزا غوښتنه کړې ده.

دغه کسان په ۲۰۱۸میلادي کال د ولسمشر ولادیمیر پوتین د یوه تمثال یا پیکر د نصبولو په قضیه کې په دخالت تورن شوي دي.

د بشري حقونو هغې ډلې چې دغه کسان یې غړي دي پرون وویل، چې څارنوال د دغو درېیو فعالانو لپاره له ۱۸ میاشتو تر درېیو کلونو د بند سزا غوښتنه کړې ده.

څارنوال ادعا کړې، چې دغو فعالانو د سیاسي، ایډیولوژیکي او د ټولنیزې کرکې د انګېزې له مخې داسې اقدامات کړي، چې د عامه نظم د اخلال سبب شوي وو.

په دغو فعالانو کې یو تن د روسیې د اپوزیسیون سیاستوال او اداري فساد ضد کمپاینر الکسي ناوالني ملاتړی دی.

دغه درې فعالان د ۲۰۱۹میلادي کال په جنورۍ میاشت کې د ولسمشر پوتین د تمثال یا ګوډاګي د درولو له کبله ونیول شول.

دغه تمثال د ۲۰۱۸میلادي کال په نوامبر میاشت کې د پرم ښار د لنین په مرکزي میدان کې درول شوی و.

پر تمثال یا ګوډاګي چې په سپینه رسنۍ تړل شوی و، دا شعارونه لیکلي وو: "جنګي جنایتکاره او درواغجنه."

ترکمنستان: دولتي مامورین دې د کویډ۱۹ معاینې لپاره په خپله پیسې ورکړي

ارشیف

د ترکمنستان دولتي کارکوونکو ته امر شوی، چې د کرونا ویروس د جبري معاینې دروند لګښت له خپله جېبه ورکړي.

دا امر په داسې حال کې صادرېږي، چې په دغه هېواد کې روغتيايي چارواکي لا هم ټینګار کوي، چې د کرونا ویروس کومه پېښه نه ده ثبت شوې.

د حکومت د پروني امر دلیل لا روښانه نه دی، خو ګڼو کسانو چې دولتي کارکوونکي دي د نوم نه ښوولو په شرط ازادۍ راډیو ته ویلي، دا امر د میاشتنیو معاشاتو د اخیستو پر وخت صادر شوی، چې حکومت ته د کارکوونکو له معاشونو د دغو لګښتونو د ګرځولو چاره اسانه کوي.

په ترکمنستان کې په انفرادي ډول د کرونا وایروس د معاینې لګښت ۲۸نیم ډالره کېږي، چې په دغه هېواد کې ډېرې پیسې دي.

بېلاروس د ازادې اروپا/ ازادۍ راډیو ۳ خبریالان نیولي

په نیول شویو خبریالانو کې دوه تنه یې د اوکراین او درېیم تن د روسیې وګړی دی.

د بېلاروس چارواکو د ازادې اروپا/ ازادۍ راډیو د کرنټ ټایم ټلویزیوني شبکې درې خبریالان په پلازمېنه مینسک کې نیولي دي.

دا په داسې حال کې ده، چې په پام کې ده، سبا یکشنبه په دغه هېواد کې د ولسمشرۍ مهمې ټاکنې وشي.

دغه درې خبریالان پرون جمعه د مینسک له یوه هوټله نیول شوي او د پولیسو ماموریت ته بېول شوي او د دې نیونې علت نه دی معلوم.

په نیول شویو خبریالانو کې دوه تنه یې د اوکراین او درېیم تن د روسیې وګړی دی.

کرنټ ټایم هغه ټلویزیوني شبکه ده، چې په روسۍ ژبه خپرونې کوي، د ازادې اروپا/ ازادۍ راډیو یې د امریکا غږ په همکارۍ پرمخ بیايي.

بېروت کې د وژل شویو کسانو شمېر ۱۵۴ ته پورته شوی

تیم های نجات در لبنان

د لبنان په پلازمېنه بېروت کې د سې شنبې ماښام درنو چاودنو له امله د وژل شویو کسانو شمېر ۱۵۴ ته پورته شوی دی.

دا درنې چاودنې د بېروت په بندر کې د سرې په یوه ګدام کې وشوې چې ورسره ګڼ کسان مړه او لږ تر لږه څه باندې پنځه زره تنه ټپيان شول.

شاوخوا سیمه هم په بشپړه توګه ورانه شوې ده.

اندېښنه شته چې د وژل شویو کسانو شمېر لا پسې لوړ شي ځکه ویل کېږي چې لا هم ګڼ خلک تر خاورو او ورانیو لاندې پاتې دي.

د لبنان له ژغورونکو سره د مرستې لپاره فرانسې، جرمني، روسیې او ګڼو نورو هېوادونو خپل مرستندویه ټیمونه لبنان ته استولي دي.

دوی له خاورو ورانیو د خلکو د را ایستلو او له زیانمنو سره د مرستو لپاره لبنان ته تللي.

اخوا پلټونکي دا څېړي چې څنګه له کلونو راهیسې یوه لویه اندازه چاودېدونکي مواد په یوه ګدام کې ساتل کېدل.

پرون ګڼ خلک د مظاهرو په هدف ښار ته وتلي و، خو پولیسو یې مخه ونیوله.

مظاهره‌چیانو حکومت تورناوه چې د دغسې پېښو په مخنیوي کې پاتې راغلی.

امریکا کې په یوه ورځ کرونا ویروس له ۲۰۰۰ ډېر کسان مړه کړي

ارشیف

امریکا په تېرو دریو میاشتو کې د لومړي ځل لپاره په یوه ورځ کې د کویډ۱۹ ناروغۍ له کبله د څه باندې دوه زره کسانو مړینه ثبت کړه.

امریکا چې وروستیو اونیو کې د کرونا ویروس پېښې په کې مخ په زیاتېدو وې، پرون په ۲۴ ساعتونو کې د څه باندې ۵۸۰۰۰ نویو پیښو او له کبله یې د ۲۰۶۰ کسانو د مړینې شمېر ثبت کړ.

په یوه شپه او ورځ کې د مړینې دا شمېر په تېرو دریو میاشتو کې دومره نه و ختلی، وروستی ځل د مې په ۷مه نېټه په ۲۴ ساعتونو کې څه باندې دوه زره امریکایان کویډ ۱۹ مړه کړي وو.

په ټوله نړۍ کې په کرونا وبا د اخته شویو کسانو شمېر نژدې ۱۹ میلیونو ته ورسېد، تراوسه له دې کبله ۷۱۲۰۰۰ کسان مړه شوي دي.

ټرمپ د ټیک ټاک او ويچټ له مالکانو سره د معاملو د بندیز اجرایي حکم صادر کړ

د امریکا ولسمشر ډونالډ ټرمپ

د امریکا ولسمشر ډونالډ ټرمپ د ټیک ټاک او ويچټ شبکو له چینایي مالکانو سره د معاملو د بندیز اجرایي حکم صادر کړ.

دغه بندیز د راتلونکو پنځه څلویښتو ورځو په موده کې پیلېږي.

ټرمپ د ټیک ټاک له مالک ‌سره د معاملو د بندیز لامل د ملي امنیت په اړه اندېښنې وښودې.

په دې اړه حکم کې ویل شوي، د لنډو ویډیو اپلیکیشن ټیک ټاک ملي امنیت ته یو ګواښ ګڼل کېږي او باید د مالک په وړاندې یې تاوتریخجن چلند وشي.

په حکم کې راغلي، ويچټ شبکه هم په اتومات ډول د کاروونکو معلومات ترلاسه کوي.

تر دې وړاندې د امریکا سنا هغه لایحه په قاطع اکثریت سره تصویب کړه چې د حکومت مامورین پر دولتي وسایلو د لنډو ویډیوګانو د شریکولو د نامتو چینايي شبکې ټیک ټوک له لیدو منع کوي.

پاکستان د کویډ۱۹ له امله لګول شوي محدودیتونه لرې کوي

آرشیف

پاکستان وايي چې د کرونا ویروس د مخنیوي لپاره ډېر لګول شوي محدودیتونه به لیرې کړي.

د پاکستان د پلان، پراختیا او ځانګړو نوښتونو وزیر اسدعمر پرون وویل چې ټول رستورانتونه، پارکونه، تیاترونه، سینماګانې او د عامه ترانسپورت وسایل به له راتلونکې دوشنبې ورځې، د اګست له لسمې نېټې څخه فعالیت پیل کړي.

د پاکستان حکومت ویلي چې د سرپټو لوبغالو بیا پرانیستو او د هغو ټورنمنټونو او سپورتي لوبو پیل ته به اجازه ورکړي چې لوبغاړي تماس نه پکې کوي.

اسدعمر چې په پاکستان کې د کرونا پرضد د مبارزې د هڅو مشري کوي خبریالانو ته دا خبره هم وکړه چې د سیمې د نورو هېوادونو پرتله د پاکستان په وضعیت کې د پام وړ ښېګڼه راغلې ده.

هغه زیاته کړه چې د دې هېواد ښوونځي او پوهنتونونه به د سېپټېمبر په پنځلسمه نېټه پیل شي.

د پاکستان د حکومت د رسمي شمېرنو له مخې په جون میاشت کې د کویډ۱۹ ناروغۍ له کبله په دې هېواد کې د مړینو ورځنی شمیر ۱۵۰ تنو ته رسېده خو په دې شمېرو کې اوس کموالی راغلی او پرون په یوه ورځ کې د ۲۱ کسانو د مړینې خبر ورکړل شو.

په پاکستان کې په کویډ۱۹ د اخته کسانو شمیر له ۲۸۰ زرو اوښتی او په دې ناروغۍ تراوسه له شپږ زرو زیات کسان مړه شوي دي.

فرانسې د بیروت د وروستۍ پېښې په تړاو د نړیوالو څېړنو غوښتنه کړې

مکرون بیروت کې د چاودنې سیمه ته تللی.

د فرانسې ولسمشر ایمانویل مکرون د لبنان په پلازمېنه بیروت کې د وروستۍ خونړۍ چاودنې په اړه د نړیوالو څېړنو غوښتنه کړې.

مکرون پرون د اګست په شپږمه په داسې حال کې بیروت ته ولاړ چې د لبنان د روغتیا وزارت وویل د چارشنبې ورځې په لویه چاودنه کې لږترلږه ۱۳۷ کسان وژل شوي، لسګونه تري تم دي او لږترلږه پنځه زره کسان ټپیان شوي دي.

د بیروت ښاروال ویلي چې دې چاودنې تر درې لکو پورې کسان د لندې مودې لپاره بې کوره کړي دي.

ښاغلی مکرون وویل چې د دې پېښې په اړه روښانه او شفافو نړیوالو څېړنو ته اړتیا شته څو هېڅ شی پټ پاتې نه شي او شکونه لیرې شي.

د مکرون د سفر پرمهال مسوولو چارواکو په سیمه کې د دې چاودنې د عواملو د نښو نښانو د موندلو هڅه کوله.

د لومړنیو څېړنو تمرکز د امونیم نایتریټ سرې پر هغه زېرمه دی چې له څو کلونو راهیسې په دې بندر کې په غیرمصوونه طریقه ساتل شوې ده.

له امونیت نایتریت څخه د چاودېدونکو موادو د جوړولو لپاره هم کار اخیستل کېږي.

امریکا کې پر دولتي وسایلو د ټیک ټاک شبکې د ګټنې د منع لایحه تصویب شوه

آرشیف

د متحدایالاتو سنا هغه لایحه په قاطع اکثریت سره تصویب کړه چې د حکومت مامورین پر دولتي وسایلو د لنډو ویډیوګانو د شریکولو د نامتو چینايي شبکې ټیک ټاک له لیدو منع کوي.

دا اقدام یوه وروسته له هغه کېږي چې د بهرنیو چارو وزیر مایک پومپیو وویل، امریکا به هڅه وکړي چې د چین پر ځانګړو اپلیکېشنونو او مخابراتي شرکتونو بندیز ولګوي.

پومپیو د چین ټکنالوژي چې حکومت یې ملاتړ کوي د متحدایالاتو د ملي امنیت او د وګړو د شخصي معلوماتو لپاره ګواښ وباله.

جمهوري غوښتونکي سناتور جاش هاولي چې د دې لایحې طرح یې وړاندې کړې وه، په یوه بیان کې وویل چې دی په دې برخه کې د دواړو ګوندونو د همکارۍ له کبله خوښ دی.

ولسمشر ډونالډ ټرمپ د چین پر ټکنالوژۍ خپلې حملې زیاتې کړې دي او د تېرې جولای میاشتې په ۳۱مه یې د ټیک ټاک د بندېدو غوښتنه وکړه.

هغه وروسته بیا وویل چې دی به مایکروسافټ امریکايي شرکت ته اجازه ورکړي چې د سېپټېمبر تر ۱۵مې نېتې پورې ټیک ټوک وپېري.

چین په ۲۰۱۷ کال کې هغه قانون نافذ کړ چې له مخې یې کمپنۍ د دې هېواد د استخباراتو په ملاتړ او له هغو سره په همکاري مکلفې بلل شوي.

د فرانسې ولسمشر بېروت ته ورسېد

د فرانسې ولسمشر امانوئل مکرون

د فرانسې ولسمشر امانوئل مکرون نن د لبنان پلازمېنې بېروت ته ورسېد.

نوموړي د وړمې ورځې د درنې چاودنې ځپل شویو لبنانیانو ته په وینا کې وویل چې هېواد به‌یې له لبنان سره خپلو همکاریو ته دوام ورکړي، خو د دې هېواد پر چارواکو یې ټینګار وکړ چې د فساد مخه ونیسي او اصلاحاتو ته زمینه برابره کړي.

د نویو راپورونو له مخې د بېروت د وړمې ورځې په چاودنه کې چې د بېروت بندر په یوه ډیپو کې د امونیم نایتریت کیمیاوي سرې له کبله شوې ده، د وژل شویو کسانو شمېر ۱۳۷ تنو ته رسېدلی، شاوخوا ۵،۰۰۰ کسان ټپیان دي او لسګونه کسان لا هم تري تم دي.

د رسنیو د راپور له مخې، شاوخوا ۲،۷۰۰ ټنه امونیم نایتریت چې د چاودنې وړتیا لري، احتمالاً کلونه مخکې دغه بندر کې له یوې بېړۍ نیول شوي وو او په ناخوندي ډول ساتل کېدل.

د بېروت حکومت وایي په دې پېښه کې ۳۰۰ زره کسان بې‌کوره شوي او د زیان کچه‌یې شاوخوا درې میلیارده ډالره ته رسېږي.

هڅې روانې دي چې د دې چاودنې اصلي علت پیدا شي.

نور راوښيه

XS
SM
MD
LG