د لاسرسي لېنکونه

دوشنبه ۳۱ چنګاښ ۱۳۹۸ کابل ۰۶:۵۹

نړېوالو د افغان ځواکونو د مالي ملاتړ لپاره پخې ژمنې ورکړي


د ناټو عمومي منشي وايي، وروسته تر هغه چې په ٢٠١٤میلادي کال کې په افغانستان کې د ايساف رول پايته رسېږي او اکثريت نړېوال ځواکونه له افغانستان څخه وځي، ناټو او متحدان به مرستندوي ماموريت پرمخ بيايي.

اندريس فوګ راسموسن د افغان امنيتي ځواکونو وړتيا وستايله او ويې ويل ډېر ژر به ناټو په افغانستان کې د پاتې نورو سيمو امنيتي مسووليتونه هم افغان ځواکونو ته وسپاري، دا ځکه چې افغان ځواکونه ورو- ورو په پښو درېږي او د پخوا په پرتله د نړېوالو پوځي مرستې ته اړ نه دي:

(دوي [افغان امنيتي ځواکونه] کولاى شي په راتلونکي کې خپل هېواد غښتلى او خوندي وساتي.

تر هغه وخته پورې به موږ په تېرو کلونو کې د ډېرو مالي او ځاني لګښتونو په بدل کې ترلاسه شوې برياوې وساتو، موږ هره ورځ ګورو چې افغان ځواکونه له قوت او ظرفيت څخه برخمنېږي.

دوي په ټول هېواد کې د څلوېښت فيصده معمولي عملياتو مشري کوي. دوي د هغو سيمو د امنيت رهبري په لاس کې لري، چې د افغانستان پنځوس فيصده نفوس په کې اوسېږي.

زه تمه لرم موږ ډېر ژر وګورو چې دوى د نورو ولايتونو او ولسواليو مشري واخلي.)

د ناټو عمومي منشي پرون د دې تړون د غړو هېوادونو د بهرنيو چارو او دفاع وزيرانو د لومړۍ ورځې د غونډې په پاى کې يوه کنفرانس ته وويل، متحدو هېوادونو له افغانستان څخه د نړېوالو ځواکونو تر وتلو وروسته د افغان امنيتي ځواکونو د مالي ملاتړ لپاره پخې ژمنې ورکړې دي، خو ده ونه ويل چې متحدو هېوادونو د څومره اندازه پيسو د ورکړې ژمنه کړې ده.

د ناټو د دې غونډې د اجنډا يوه مهمه مسئله د افغان ځواکونو مالي اړتيا ده، چارواکي وايي په دې باب به وروستۍ پرېکړه راروانه مياشت د شيکاګو په کنفرانس کې کېږي.

تمه کېږي، نن د افغانستان دفاع وزير ستر جنرال عبدالرحيم وردک چې د بهرنيو چارو له وزير زلمي رسول سره بروکسل ته راغلي، پر دې مسئله له خپلو متحدانو سره خپلې اندېښنې او غوښتنې مطرح کړي.
XS
SM
MD
LG