د لاسرسۍ وړ لېنکونه

تازه خبر
دوشنبه ۷ کب ۱۴۰۲ کابل ۰۱:۰۱

نړۍ

د تاجکستان ولسمشر اروپايي ټولنې او ناټو سره خبرو لپاره پورکسل ته ځي

ټاکل شوې ده، چې د ازبکستان ولسمشر اسلام کریموف د اروپایي اتحادیې او د ناټو له جګپوړو چارو اکو سره د رسمي خبرو لپاره نن د بلجیم مرکز بروکسل ته لاړ شي.

کریموف به په دې سفر کې د اروپا د کمیسیون له مشر خوزي مانویل باروسو او دغه راز د اروپایي اتحادیې د انرژۍ د چارو له کمیشنر ګونتر اویتنګر سره خبرې وکړي.

دواړه لوري تمه کوي، چې په دې کتنه کې به د انرژۍ په برخه کې د همکارۍ د تفاهم یوه موافقه لاسلیک کړي او په تاشکند کې د اروپایي اتحادیې د دفتر د پرانستلو موضوع وڅیړي.

د ازبکستان ولسمشر به د ناټو په مقر کې د دې تړون له عمومي منشي اندرس فوګ راسموسن سره په ګاونډي هیواد افغانسان کې په روانه جګړه کې د ناټو په عملیاتو کې د ازبکستان او د دې تړون ترمنځ د همکارۍ په اړه خبرې وکړي.

د بشري حقونو مدافع ډلو له کریموف سره په بروکسل کې د لویدیځو هیوادونو د چارواکو لیدنې کتنې ترسوال لاندې رواستي او وایي، چې د هغه حکومت د بشري حقونو خرابه سابقه لري، چې اکثرا په نړۍ کې د بشري حقونو د وضعیت په اړه د نړیوالو څیړنیزو موسسو په راپورونو کې په ټرټولو ټیټه کچه کې راوستل شوی دی.

د ورځې تازه خبرونه دلته ولولئ

ایران پر یمن د امریکا او برېتانیا وروستي بریدونه وغندل

په یمن کې د حوثي یاغیانو خلاف د امریکا او برېتانیا د بریدونو یوه څنډه
په یمن کې د حوثي یاغیانو خلاف د امریکا او برېتانیا د بریدونو یوه څنډه

ایران پرون یکشنبه د امریکا د متحدو ایالتونو او برېتانیا له خوا پر یمن تازه حملې وغندلې او ویې ویل چې دا هېوادونه هڅه کوي چې په سیمه کې د کړکېچ زیاتېدو ته لمن ووهي.

د امریکا او برېتانیا ځواکونو د شنبې په ورځ په یمن کې د ایران له ملاتړه د برخمنو حوثي یاغیانو پر ۱۸ اهدافو حملې وکړې.

دا حملې په سره سمندرګي او عدن خلیج کې د حوثي یاغیانو له خوا د حملو په ځواب کې وشوې.

د ایران د بهرنیو چارو وزارت ویاند ناصر کنعاني په یوه اعلامیه کې ویلي، امریکا او برېتانیا په دغسې حملو سره په سیمه کې د کړکېچ د زیاتولو هڅه کوي او غواړي د جګړې او بې ثباتۍ لمن پراخه کړي.

اسوشېټېډ پریس اژانس د ځینو امریکايي چارواکو په حواله چې نومونه یې نه دي اخیستل شوي راپور ورکړی چې د امریکا او برېتانیا جنګي جټ الوتکو تېره شنبه په یمن کې اته ساحې وویشتلې چې میزاییل، راکټ لانچرونه، توغندي، بې پېلوټه الوتکې او د هوايي مدافع دستګاوې یې په نښه کړې دي.

دا د جنورۍ میاشتې له ۱۲مې څلورم وار دی چې د امریکا او برېتانیا پوځونه د حوثي یاغیانو خلاف ګډ پوځي عملیات کوي، خو امریکا په یوازې سر هم تقریباً هره ورځ د حوثیانو ځینې اهداف ولي.

سوریه: یو ماین چاودنې ۱۴ تنه وژلي

په نقشه کې د سوریې تصویر
په نقشه کې د سوریې تصویر

د سوریې په یوه دښته کې د یوه ماین په پرونۍ چاودنه کې ۱۴ کسان ووژل شول.

د سوریې سانا دولتي اژانس لیکلي چې د اسلامي دولت ډلې د تروریستانو له خوا د یوه پاتې شوي ماین په چاودنه کې د ۱۴ ملکیانو د وژل کېدو تر څنګ ۸ نور ژوبل شوي دي.

د سوریې د بشري حقونو د څار ډلې چې په لومړیو کې د وژل شویو شمېر ۱۳ ښوولی و، ویلي دي چې په قربانیانو کې ښځې هم شاملې دي.

دغو کسانو په یوه دښته کې یو ډول طبي بوټي را ټولول.

د قطر، امریکا او مصر په منځګړتوب د اسراییل او حماس د مذاکرې هڅې روانې دي

د غزې یوه څنډه
د غزې یوه څنډه

له حماس ډلې سره د اسراییلي یرغملو د خلاصون او اوربند د رامنځ ته کېدو د احتمال په اړه غیر مستقیمې خبرې پرون (د فبرورۍ ۲۵) هم روانې وې.

حماس د امریکا متحده ایالاتو او اروپايي اتحادیې لخوا یو تروریستي سازمان ګڼل کیږي.

قطر، امریکا او مصر په دې خبرو کې منځګړیتوب کوي.

اسراییلي رسنیو خبر ورکړی چې که هوکړه وشي، نو په لومړي پړاو کې به له حماس ډلې څخه ۳۵ تر ۴۰ یرغمل شوي بندیان خوشې شي.

دا هم ویل شوي چې اسراییل به د دوی په بدل کې شاوخوا ۳۰۰ فلسطینیان خوشې کړي.

اټکل کیږي چې د ماشومانو، ښځو او لویانو په ګډون به شاوخوا سل تنه لا هم د حماس له خوا یرغمل وي.

وړاندوېنه کیږي چې که یوې موافقې ته ورسیږي، د حماس او اسراییلو ترمنځ به شپږ اونۍ اوربند رامنځ ته شي.

زیلینسکي: ۳۱ زره اوکرایني سرتېري له روسیې سره په جګړه کې وژل شوي

د اوکراین ولسمشر، ولودومیر زیلینسکي
د اوکراین ولسمشر، ولودومیر زیلینسکي

د اوکراین ولسمشر له روسیې سره په جګړه کې د وژل شویو اوکرایني پوځیانو شمېر ۳۱ زره اعلان کړ.

ولودومیر زیلینسکي پر اوکراین د روسیې د برید د دویمې کلیزې په مناسبت په یوه خبري غونډه کې د وژل شویو اوکراییني سرتېرو شمېر اعلان کړ.

د اسوشیېټډ پرېس خبري اژانس د راپور له مخې، دا لومړی وار و چې په تېرو دوو کلونو کې د اوکرایین ولسمشر ولودومیر زیلینسکي له روسیې سره په جګړه کې د وژل شویو اوکراییني سرتېرو شمېر رسنیز کړ.

ښاغلي زیلینسکي د ټپي یا ورکو پوځي پرسونل کره شمېره اعلان نه کړه.

اخوا د ملګرو ملتونو د بشري حقونو عالي کمېشنرۍ هم په یوه بیانیه کې ویلي چې په اوکراین کې د ملګرو ملتونو د بشري حقونو د څارنې ادارې د جګړې پر مهال د ۳۰ زره ۴۵۷ ملکي وګړو د مرګ ژوبلې په اړه پلټنې کړي چې په اساس یې ۱۰ زره ۵۸۲ تنه وژل شوي او ۱۹ زره ۸۷۵ تنه نور ټپيان شوي دي.

مصر: روانه اوونۍ به د حماس او اسراییل د اوربند د موافقې منځګړیتوب وکړو

د غزې یوه څنډه
د غزې یوه څنډه

د مصر امنیتي سرچینې وايي قطر به روانه اوونۍ د حماس او اسراییل ترمنځ د اوربند د موافقې پر نهايي کولو د خبرو منځګړیتوب وکړي.

رویټرز خبري اژانس د سرچینو په حواله راپور ورکړی چې د دواړو لوریو استازي به وروسته قاهرې ته سفر وکړي چې هدف یې د یرغمل شویو د خوشې کولو په ګډون د یوې موافقې پر مهالوېش او میکانیزم سلا کېدل دي.

د اسراییل یو هیئت چې د یرغمل شویو د خلاصون پر سر د نویو مذاکرو لپاره پاریس ته تللی و، بېرته اسراییل ته ستون شوی او د اسرائیل جنګي کابینې ته یې تېره شپه د دغو خبرو په باب معلومات ورکړل.

دا چې د اسراییل په جنګي کابینه کې په دې باب څه پرېکړې وشوې، رسماً څه نه دي ویل شوي.

بلخوا د اسراییل رسنیو نن یکشنبه راپور ورکړی چې د اوربند پر سر د موافقې لپاره منځګړو پرمختګونه کړي چې په مرسته یې له غزې په لسګونو یرغمل شوي کسان د فلسطیني بندیانو د خوشې کېدو په بدل کې ازاد شي.

حماس ډلې د اکتوبر میاشتې پر اوومه پر اسرائیل په حملې سره لږ تر لږه ۱۲۰۰ کسان ووژل او شا و خوا ۲۴۰ نور کسان یرغمل کړل.

د امریکا متحد ایالتونه او اروپايي ټولنه توندلارې ډله حماس یو تروریستي سازمان ګڼي.

په نومبر میاشت کې د یوه لنډمهاله اوربند پر مهال چې ۷ ورځې یې دوام وکړ، د لسګونو فلسطیني بندیانو د خوشې کېدو په بدل کې ګڼ یرغمل شوي کسان خوشې شول؛ خو تر سلو زیات کسان لا هم یرغمل دي.

روسیې ۳۲ تنه د ناوالني د ملاتړ او پر اوکراین د برید د مخالفت په تور نیولي

د روسیې پولیس د یوې معترضې د نیولو پر مهال
د روسیې پولیس د یوې معترضې د نیولو پر مهال

په روسیه کې پرون لږ تر لږه ۳۲ کسان چې د کرملین د سیاسي مخالف الکسي ناوالني پر مړینه د ویر او پر اوکراین د روسیې د یرغل د دویمې کلیزې په مناسبت راغونډ شوي وو، نیول شوي دي.

د OVD-Info په نوم د بشري حقونو څارونکې ډلې راپور ورکړی چې دغه ۳۲ کسان د روسیې په نهو ښارونو کې نیول شوي دي.

له دې ډلې ۲۷ یې د ناوالني لپاره په یادګاري ساحه کې د ګلو ګېډۍ ایښودلې چې نیول شوې دي.

د کرملین دغه ۴۷ کلن منتقد الکسي ناوالني د فبروري میاشتې پر ۱۶مه د روسیې په یوه زندان کې تر نامعلومو شرایطو لاندې مړ شو.

د روسي سرتېرو دوې مېرمنې چې د یوې ډلې له خوا له سرتېرو سره د عادلانه چلند د غوښتنې لپاره په تنظیم شوي لاریون کې برخه اخیستې وه له درېیو نورو کسانو سره چې په اوکراین کې د روسیې د جګړې خلاف راوتلي وو، نیول شوي دي.

د اوکراین لوی درستیز او دفاع وزیر د جګړې لومړۍ کرښې ته څېرمه سفر وکړ

د اوکراین د دفاع وزیر رستم عمروف
د اوکراین د دفاع وزیر رستم عمروف

د اوکراین د پوځ لوی درستیز اولیکساندر سرسکي او دفاع وزیر رستم عمروف د جګړې لومړۍ کرښې ته څېرمه د قوماندې مرکزونه وکتل.

سرسکي نن یکشنبه ویلي، دوی د جګړې د ډګر د ارزونې او د دفاع د پیاوړتیا لپاره دغه ځایونه کتلي دي.

په داسې حال کې چې پر اوکراین د روسیې د یرغل پرون دوه کاله پوره شول، د کییف پوځ هڅه کوي د جګړې د لومړۍ کرښې په اوږدو کې د روسي ځواکونو د مخکې تګ مخه تر ډېره ونیسي.

اولیکساندر سرسکی په ټلګرام کې لیکلي، روان وضعیت یې په تفصیل وارزاوه او پر نورو اقداماتو یې بحث وکړ.

ده ویلي چې له بې پېلوټه الوتکو او هوايي بمباریو د پوځیانو د خوندیتوب، دغه راز د جګړې د لومړۍ کرښې د مشخصو ساحو د استحکام ارزونه وشوه.

د اوکراین ولسمشر د سویډن د دفاع له وزیر سره وکتل

د اوکراین ولسمشر او د سویډن د دفاع وزیر
د اوکراین ولسمشر او د سویډن د دفاع وزیر

د اوکراین ولسمشر ولودمیر زلینسکي د سویډن له دفاع وزیر پاول یوهنسن سره پرون په کییف کې وکتل.

دا کتنه پر اوکراین د روسیې د غیرموجه یرغل د دوو کلونو پوره کېدو په مناسبت وشوه او دواړه مشرانو کییف ته د سویډن د پوځي مرستو د بلې بستې پر ورکړه او د وسلو د ګډ تولید پر امکاناتو بحث وکړ.

زلینسکي پرون چې د روسیې د یرغل دوه کاله پوره شول، ویلي: دا هغه ورځ ده چې غمیزه پیل شوه او دا ډېره مهمه ده چې زموږ ملګري دلته زموږ تر څنګ دي.

د اوکراین ولسمشر، اوکراین ته د سویډن د دفاع وزیر سفر له اوکراین سره د پیوستون مهمه نښه وبلله.

سویډن تېره سې شنبه اعلان وکړ چې اوکراین ته به د ۶۸۲ ملیون ډالرو په ارزښت پوځي مرسته ورکړي.

دا له کله چې روسیې پر اوکراین یرغل پیل کړی، د سویډن د مرستو پنځلسمه بسته ده.

د اوو صنعتي هېوادونو مشران: د روسیې د جګړې پر وړاندې د اوکراین ملاتړ ته دوام ورکوو

د اوکراین یو شمېر سرتېري
د اوکراین یو شمېر سرتېري

د جي اووه یا د نړۍ د اوو لویو صنعتي هېوادونو رهبرانو پرون د اړتیا تر وخته، د روسیې په وړاندې په جګړه کې د اوکراین د ملاتړ ژمنه وکړه.

دغو هېوادونو ویلي چې دوی به داسې لارې چارې ولټوي چې مسکو پر اوکراین د خپل یرغل له کبله د اړولو زیانونو بیه پرې کړي.

د جي اووه ډلې رهبرانو پرون د اوکراین له ولسمشر ولودمیر زلینسکي سره پر اوکراین د روسیې د غیرموجه یرغل د دوو کلونو پوره کېدو په مناسبت د ویډیو کنفرانس له لارې خبرې وکړې.

د دې یرغل له کبله د اوکراین په لسګونو زره کسان وژل شوي، د دغه هېواد د قلمرو زیاته برخه ویجاړه شوې او اقتصاد یې زیانمن شوی دی.

د اوو لویو صنعتي هېوادونو رهبرانو په یوه ګډه اعلامیه کې ویلي، په داسې حال کې چې په اوکراین کې روانه جګړه درېیم کال ته داخله شوه، د اوکراین وګړي او حکومت د اړتیا تر وخته پر موږ حساب کولی شي.

د اسراییل کابینې حماس سره د مذاکرې پر اقداماتو بحث وکړ

د اسراییل د کابینې غونډه
د اسراییل د کابینې غونډه

د اسراییل جنګي کابینې تېره شپه د یرغمل شویو د خلاصون او له حماس سره د اوربند لپاره د مذاکرو پر نورو اقداماتو بحث وکړ.

دا په داسې حال کې ده چې په جګړه ځپلې غزې تړانګه کې پرون شنبه د پراخېدونکي بشري بحران په باب اندېښنې نورې هم زیاتې شوې.

د فرانسې خبري اژانس د یوه چارواکي د یوې محلي رسنۍ د راپور پر اساس لیکلي چې د اسراییل یو هیئت د یرغمل شویو د خلاصون پر سر د نویو مذاکرو لپاره پاریس ته تللی و چې بېرته ستون شو او د اسراییل جنګي کابینې ته یې د دغو خبرو په باب معلومات ورکړل.

د محلي رسنیو د راپورونو له مخې، د اسراییل جنګي کابینې موافقه وکړه چې د مذاکرو د دوام لپاره په راروانو ورځو کې یو هیئت قطر ته ولېږي.

د امریکا متحد ایالتونه او اروپايي ټولنه توندلارې ډله حماس یو تروریستي سازمان ګڼي.

حماس ډلې د اکتوبر میاشتې پر اوومه پر اسراییل په حملې سره لږ تر لږه ۱۲۰۰ کسان ووژل او شا و خوا ۲۴۰ نور کسان یرغمل کړل.

اسراییل د حماس تر حملې وروسته د حماس ډلې د وسلوالو خلاف په غزې تړانګه کې هوايي او ځمکني پوځي عملیات پیل کړل.

د حماس تر ولکې لاندې د غزې روغتیا وزارت ویلي، چې د اسرائیل د دغو حملو له کبله تر اوسه نېږدې ۳۰زره کسان وژل شوي او شا و خوا ۷۰ زره کسان ټپیان شوي دي، هغه شمېرې چې خپلواکو سرچینو تایید کړي نه دي.

ملګرو ملتونو خبرداری ورکړی چې د غزې ۲ ملیونه او ۲ لکه اوسېدونکي له قحطۍ سره مخامخ دي.

نور راوښيه

XS
SM
MD
LG