د لاسرسۍ وړ لېنکونه

تازه خبر
جمعه ۴ کب ۱۴۰۲ کابل ۰۵:۴۲

افغانستان

کرزي په بغلان کې بمي چاودنه وغندله

د افغانستان ولسمشر حامد کرزي په بغلان ولایت کې د تیرې ورځې بمي چاودنه چې نهه ملکي کسان په کې ووژل شول، وغندله.

دغه کسان چې د یوې کورنۍ غړي و، تیره ورځ په پلخمري کې هغه مهال ووژل شول چې موټر یې د سړک د غاړي په ماین وخوت.

د افغانستان د جمهوري ریاست له خوا په یوې خپرې شوې مطبوعاتي اعلامیې کې دغه چاودنه یو بزدلانه عمل بلل شوی.

افغان چارواکي تیره ورځ وویل، چې په تیرو څلورویشتو ساعتونو کې د سړک د غاړې په درېیو بمي چاودنو کې اولس ملکي کسان وژل شوي دي.

د ورځې تازه خبرونه دلته ولولئ

د هند پېژندل شوي سندرغاړي 'انوپ جلوټا' په لومړي ځل یوه افغاني سندره ویلې

 جلوټا په جرمني کې د افغان سندرغاړې فرشتې سما په همکارۍ په دري ژبه د 'در دامان صحرا' په نوم دغه سندره ثبت کړې ده.
جلوټا په جرمني کې د افغان سندرغاړې فرشتې سما په همکارۍ په دري ژبه د 'در دامان صحرا' په نوم دغه سندره ثبت کړې ده.

د هند پېژندل شوي سندرغاړي انوپ جلوټا په لومړي وار یوه افغاني سندره ویلې ده.

د هندي رسنیو د راپورونو له مخې، جلوټا په جرمني کې د افغان سندرغاړې فرشتې سما په همکارۍ په دري ژبه د 'در دامان صحرا' په نوم دغه سندره ثبت کړې ده.

انوپ جلوټا چې په ګڼو ژبو غزلونه او نورې سندرې ویلي، دا لومړی وار دی چې په دري ژبه یوه سندره ثبتوي.

دغه پخوانۍ سندره د افغان کمپوزیټور نینواز له خوا کمپوز شوې چې تر دې مخکې د احمد ظاهر په ګډون نورو سندرغاړو هم ویلې ده.

جلوټا ویلي، له افغانستان سره خاصه مینه لري، ځکه یې پرېکړه وکړه چې د دغه هېواد په یوه رسمي ژبه سندره ووايي.

هغه ویلي چې د هند کلاسیکه موسیقي په افغانستان کې خورا زیات محبوبیت لري او ځینې افغان سندرغاړي هندي راګونه وايي.

ملګرو ملتونو په غزني کې د دوو کسانو له اعدام سره مخالفت وښود

د ملګرو ملتونو د سرمنشي ویاند سټیفن دوجاریک
د ملګرو ملتونو د سرمنشي ویاند سټیفن دوجاریک

په افغانستان کې د دوو کسانو تر قصاص وروسته ملګرو ملتونو پرون پنجشنبه وویل چې دغه بنسټ د مرګ د سزا مخالفت دی.

د ملګرو ملتونو د سرمنشي ویاند سټیفن دوجاریک پرون په نیویارک کې خبریالانو ته وویل: "موږ په قاطعیت د مرګ د سزا د کارونې مخالفت ته دوام ورکوو او فکر کوم چې په مشخص د دغو اعدامونو عامه بڼه زړه بوږنوونکې وه."

دوجاریک دا څرګندونې داسې وخت کړي چې د طالبانو د سترې محکمې پرون خبر ورکړ چې په قتل دوه تورن کسان پرون په غزني کې په عام محضر کې قصاص شول.

په همدې حال کې د بخښنې نړیوال سازمان هم نن په یوه اعلامیه کې له طالبانو د هر ډول اعدامونو او د مرګ سزا د ختمېدو غوښتنه کړې ده.

تر دې مخکې پرون په افغانستان کې د ملګرو ملتونو مرستندوی ماموریت یا یوناما، په غزني کې د دوو کسانو د پروني قصاص په باب خپل سخت مخالفت وښود.

یوناما پرون په خپله ایکس شبکه یا پخواني ټویټر کې لیکلي چې ملګري ملتونه د مرګ د سزا سخت مخالفت کوي او دا سزا د ژوند له اساسي حق څخه سرغړونه ده.

پوتین او میرضیایف د 'افغان-ټرانس' د اوسپنې پټلۍ پروژې په اړه خبرې کړي

د عکس ښي لور ته د روسیې ولسمشر ولادمیر پوتین او چپ لور ته د ازبکستان ولسمشر شوکت میرضیایف د روغبړ پر مهال
د عکس ښي لور ته د روسیې ولسمشر ولادمیر پوتین او چپ لور ته د ازبکستان ولسمشر شوکت میرضیایف د روغبړ پر مهال

ځینو رسنیو راپور ورکړی چې د ازبکستان ولسمشر شوکت میرضیایف د روسیې له ولسمشر ولادمیر پوتین سره د 'افغان-ټرانس' د اوسپنې پټلۍ د پروژې په اړه خبرې وکړې.

د اذربایجان ټرند خبري اژانس پرون پنجشنبه خبر ورکړی چې دواړو ولسمشرانو پرون د روسیې د کازان غونډې په څنډه کې د کتنې پر مهال پر دې موضوع بحث کړی دی.

افغان- ټرانس د اوسپنې د پټلۍ هغه پروژه ده چې د منځنۍ اسیا هېوادونه په سوداګرۍ او ټرانزیټ کې له جنوبي اسیا سره نښلوي.

تر دې مخکې د طالبانو د بهرنیو چارو وزارت سرپرست امیرخان متقي ویلي وو چې ازبکستان، افغانستان او پاکستان پرېکړه کړې، څو له ترمز څخه تر پېښوره پورې د دې پټلۍ عملي کار ډېر ژر پیل کړي.

تمه کېږي دغه پټلۍ د ازبکستان ترمز ښار د مزارشریف، پلخمري، کابل او جلال اباد له لارې له پېښور سره ونښلوي.

د افغانستان او پاکستان د سوداګرۍ ګډې خونې ویلي چې د اوسپنې پټلۍ دغه پروژه منځنۍ اسیا او جنوبي اسیا ته د افغانستان صادرات زیاتوي.

طالبانو د مزار-ازبکستان ترمنځ د اوسپنې پټلۍ د بیارغونې د چارو د پیل خبر ورکړ

ارشیف
ارشیف

د طالبانو حکومت د مزار شریف-ازبکستان ترمنځ د اوسپنې پټلۍ د بیارغونې د چارو د پیل خبر ورکړی دی.

ملي راډیو تلوېزیون چې د طالبانو په کنټرول کې دی، پرون په خپله ایکس شبکه یا پخواني ټویټر کې لیکلي چې د دې پروژې چارې د څه باندې شپږو میلیونو امریکايي ډالرو په لګښت پیل شوې.

په خبر کې ویل شوي چې دغه پروژه به د ۷۵ کیلومترو په اوږدوالي د بلخ د مرکز مزار شریف له هوايي ډګره پیل تر ازبکستان پورې وغځېږي.

په دې مناسبت د ازبکستان د یوه هیئت د حضور خبر هم ورکړل شوی، خو په خپله ازبکستان د دې موضوع په باب رسماً تبصره نه ده کړې.

د طالبانو چارواکي وايي چې د مزارشریف- ازبکستان د اوسپنې پټلۍ بیارغونه به په درېیو میاشتو کې بشپړه او دغه پټلۍ به وروسته ګټې اخیستنې ته چمتو شي.

هند کې یو افغان په غیرقانوني توګه د اوسېدو په تور نیول شوی

د ممبي یوه څنډه کې پولیس
د ممبي یوه څنډه کې پولیس

په هند کې یو ۳۷ کلن افغان په دې تور نیول شوی چې ۱۷ کاله په هند کې په غیرقانوني ډول اوسېدلی دی.

د هند د ممبۍ ښار د جنايي تحقیقاتو څانګې پرون پنجشنبه ویلي، دغه افغان مستعار نوم پر ځان ایښی و او جعلي اسناد یې جوړ کړي وو.

پولیسو پرون ویلي چې دغه مشکوک سړی د چهارشنبې په ورځ د ممبۍ ښار په ودالا سیمه کې نیول شوی دی.

چارواکو ویلي، د پوښتنو ګروېږنو په وخت کې هغه خپل نوم ظاهر علي خان معرفي کړی او د اسنادو له څېړلو وروسته معلومه شوه چې په خټه افغان دی.

زلزلې د کندز ځینې برخې ولړزولې

د افغانستان په عمومي نقشه کې د کندز موقعیت
د افغانستان په عمومي نقشه کې د کندز موقعیت

نن سهار یوې نسبتاً خفیفې زلزلې د کندز ولایت ځینې برخې ولړزولې.

د امریکا د متحدو ایالتونو د جیولوجیکي سروې ادارې د معلوماتو له مخې د ریښتر په مقیاس د دې زلزلې د شدت اندازه ۴ اعشاریه ۶ وه.

په دغو معلوماتو کې ویل شوي، چې د دې زلزلې مرکز د کندز جنوبي برخې وې.

تر اوسه په دې زلزله کې د اوښتې مرګ ژوبلې په باب څه نه دي ویل شوي.

تېره یکشنه د ریښتر په مقیاس یوې پنځه درجې زلزلې د بلخ ولایت ځینې برخې لړزولې وې.

ویل شوي وو، هغه زلزله دا زلزله تر ځمکې لاندې لس کیلومتره ژوره وه او بلخ ولایت یې لړزولی و، خو چا ته یې د سر او مال زیان نه و اړولی.

په تېره اکټوبر میاشت کې څو زلزلې د افغانستان هرات ولایت ولړزاوه چې د ملګرو ملتونو په وینا شاوخوا ۱۵۰۰ کسان یې مړه او نږدې ۲۰۰۰ نور کسان یې ټپیان کړل.

ټوماس وېسټ: ټول په افغانستان کې د ګډو ګټو په اړه قوي اجماع لري

د افغانستان لپاره د امریکا ځانګړی استازی ټوماس وېسټ
د افغانستان لپاره د امریکا ځانګړی استازی ټوماس وېسټ

د افغانستان لپاره د امریکا ځانګړي استازي ټوماس وېسټ ویلي ټول په افغانستان کې د ګډو ګټو په اړه قوي اجماع لري.

وېسټ پنجشنبه په خپله ایکس پاڼه لیکلي چې تازه د دوحې له کنفرانسه بېرته واشنګتن ته ستون شوی.

دوحه د فبروري په ۱۸ او ۱۹ د افغانستان په اړه د یوه نړیوال کنفرانس کوربه و.

ټوماس وېسټ لیکلي چې هېڅ هېواد نه غواړي چې له افغانستانه د ترهګرۍ ګواښ رامنځته شي.

هغه ټینګار کړی چې ټول د نجونو پر مخ د ښوونځیو او پوهنتونو د بیا پرانیستلو او کار او ټولنیز ژوند ته د ښځو د بیا ستنېدو غوښتونکي دي.

د افغانستان لپاره د امریکا ځانګړي استازي همداراز ویلي چې له افغانانو سره د مرستو لپاره کلک تعهد موجود دی، خو تر څنګ یې د اقتصادي ثبات او د افغانانو د اقتصادي راتلونکي د مالکیت په تړاو ځینې اندېښنې موجودې وې.

وېسټ بیا د ګڼو هېوادونو له خوا د کوکنارو د کرکېلو په باب د طالبانو د بندیز د عملي کېدو یادونه هم کړې چې په خبره یې د ملګرو ملتونو د اړوندې ادارې د ارزونې په اساس د کوکنارو کرکېله ۹۵سلنه کمه شوې.

د افغانستان لپاره د امریکا ځانګړي استازي د افغان مدني ټولنې له استازیو سره د لیدنې یادونه هم کړې.

هغه ټینګار کړی چې امریکا د ملګرو ملتونو په مشرۍ د افغانستان اړوند داسې غونډو ملاتړ کوي او په خبره یې باید د افغانانو ښېګڼې او ګډې نړیوالې ګټې د داسې غونډو لارښود وګرځي.

د متقي ادعا: دوحه کې د ملګرو ملتونو په کوربه‌توب شوې غونډې خاصه پایله نه درلوده

د عکس ښي لور ته د طالبانو د بهرنیو چارو سرپرست وزیر امیرخان متقي او چپ لور ته په کابل کې د افغانستان لپاره د ملګرو ملتونو د مرستندوی ماموریت یا یوناما مشره روزا اوتنبایووا
د عکس ښي لور ته د طالبانو د بهرنیو چارو سرپرست وزیر امیرخان متقي او چپ لور ته په کابل کې د افغانستان لپاره د ملګرو ملتونو د مرستندوی ماموریت یا یوناما مشره روزا اوتنبایووا

د طالبانو د بهرنیو چارو سرپرست وزیر ادعا کړې چې په دوحه کې د ملګرو ملتونو په کوبه‌توب د افغانستان په اړه د تېرې یکشنبې او دوشنبې ورځو غونډې، خاصه پایله نه درلوده.

ملي راډیو تلوېزیون چې د طالبانو په کنټرول کې دی، پرون ناوخته په خپله ایکس شبکه یا پخواني ټویټر کې خبر ورکړی چې امیر خان متقي دغه څرګندونې په کابل کې د افغانستان لپاره د ملګرو ملتونو د مرستندوی ماموریت یا یوناما له مشرې روزا اوتنبایووا سره په کتنه کې کړې دي.

وړاندې لیکل شوي چې امیر خان متقي تمه ښودلې چې له افغانستان سره د تعامل په اړه غونډې ښې نتیجې ولري.

د یوناما مشرې ویلي، که برخه‌وال هېوادونه سره سلا شي، په دوحه کې به د افغانستان په اړه لا زیاتې غونډې جوړې شي چې د ملګرو ملتونو او طالبانو حکومت ترمنځ ښه تفاهم رامنځته شي.

د ملګرو ملتونو په کوربه توب په دوحه کې پر افغانستان تازه غونډه تېره یکشنبه او دوشنبه جوړه شوې وه چې طالبانو ته هم په کې د ګډون بلنه ورکړل شوې وه، خو طالبانو تر غونډې یوه ورځ مخکې په دې غونډه کې له ګډون انکار وکړ.

د دوحې په مخکېنۍ غونډه کې چې د ۲۰۲۳م کال په مې میاشت کې، هغه هم د ملګرو ملتونو د سرمنشي انټونیو ګوټېرېش په کوربه‌توب جوړه شوې وه، طالبانو ته د ګډون بلنه نه وه ورکړل شوې چې طالبانو یې له امله انتقاد کړی و.

د امریکا په بهرنیو چارو وزارت کې د افغان ښځو پر اړوندو مسایلو غونډه جوړېږي

د امریکا د بهرنیو چارو وزارت
د امریکا د بهرنیو چارو وزارت

د امریکا د متحدو ایالتونو په بهرنیو چارو وزارت کې د افغان ښځو پر اړوندو مسایلو غونډه جوړېږي چې د دغه هېواد د بهرنیو چارو وزیر انتوني بلېنکن هم ورته وینا کوي.

د ګڼو رسنیو د راپورونو له مخې، د امریکا باسټن پوهنتون پرون پنجشنبه په یوه خبرپاڼه کې ویلي چې دغه غونډه د فبروري میاشتې پر ۲۷مه جوړېږي.

د باسټن پوهنتون د خبرپاڼې له مخې، په پام کې ده په دې غونډه کې په افغانستان کې د حیاتي پانګونې پر پروګرامونو، د اقتصادي ودې پر موضوع، د ښځو او نجونو لپاره د کارموندنې په باب تمرکز وشي.

ویل شوي، د افغانستان لپاره د امریکا ځانګړی استازی ټوماس وېسټ او د افغان ښځو، نجونو او بشري حقونو لپاره د واشنګټن ځانګړې استازې رینا امیري هم په کې برخه اخلي.

طالبانو شاوخوا دوه نیم کاله مخکې پر افغانستان د ولکې له بیا ټینګولو وروسته پر ښځو او نجونو ډول ډول محدودیتونه لګولي چې په نړیواله سطحه ورباندې انتقادونه شوي دي.

یوناما په غزني کې د دوو کسانو پر قصاص سخت مخالفت ښودلی

طالبانو په غزني کې دوه کسان اعدام کړل
هيله ده انتظار وکړئ

No media source currently available

0:00 0:01:07 0:00

په افغانستان کې د ملګرو ملتونو مرستندوی ماموریت یا یوناما په غزني کې د دوو کسانو پر پروني قصاص خپل سخت مخالفت ښودلی دی.

یوناما پرون په خپله ایکس شبکه یا پخواني ټویټر کې لیکلي چې ملګري ملتونه د مرګ د سزا سخت مخالفت کوي او دا سزا د ژوند له اساسي حق څخه سرغړونه ده.

د ملګرو ملتونو مرستندوی ماموریت له اوسنیو حاکمانو د مرګ د سزا د کارونې، د فوري ځنډولو غوښتنه کړې چې دا د دې سزا د له منځه وړلو پر لوري یو ګام وي.

د طالبانو د سترې محکمې پرون خبر ورکړ چې پر دوو کسانو چې په قتل تورن شوي وو، په عام محضر کې دغه قصاص د غزني د مرکز د علي لالا کلي د فوټبال په لوبغالي کې د طالبانو حکومت د یو شمېر چارواکو او ګڼو عامو خلکو په حضور کې پلی شو.

نور راوښيه

XS
SM
MD
LG