د روسیې د پهلوانۍ فدراسیون وايي، د روسیې لس تنه پهلوانان چې د پاریس په المپیک کې د ګډون اجازه ورکړل شوې وه، په دې المپیک کې له ګډون څخه ډډه کوي ځکه ځینې مخکښ روسي پهلوانان له هغې ډلې عبدالرشید سعدلایف چې د سروزرو دوه مډالونه لري او د ۲۰۲۳م کال د پهلوانۍ اتل زائور بېګ سیداکوف د دې لوبو له فهرست څخه حذف شوي دي.

د روسیې د پهلوانۍ فدراسیون پرون وویل چې د المپیک لوبو ته د لوبغاړو د غوره کولو په اړه د المپیک د نړیوالې کمیټې اصل ورته د منلو وړ نه دي.

د ۲۰۲۳م کال په ډسمبر میاشت کې د المپیک نړیوالې کمېټې د روسیې او بېلاروس ورزشکارانو ته اجازه ورکړه چې د پاریس په المپیک کې د خپلواکو لوبغاړو په توګه له ملي بیرغ او ملي سرودو پرته ګډون وکړي.

دوی ته به همداراز دا اجازه هم نه وي چې د لوبو د پرانیستونکو مراسمو په پرېډ کې ګډون وکړي.

په تېره یوه لسیزه کې روسیه لومړی د ډوپنګ د تورونو او ورپسې د ۲۰۲۲م کال د فبروري په ۲۴مه پر اوکراین د غیرموجه یرغل له کبله له انزوا سره مخامخ ده.

د زمبابوې د کرکټ ملي لوبډلې د درې شل اوریزو سیالیو د لوبلړۍ په لومړۍ سیالۍ کې هندوستان ته په ۱۳ منډو ماتې ورکړه.

د شنبې په ورځ د جولای په ۶مه نېټه په هرارې کې هند د پچې تر ګټلو وروسته توپ اچونه غوره کړه.

زمبابوې په شلو اورونو کې د ۹ لوبغاړو تر سوځېدو وروسته ۱۱۵ منډې وکړې.

هندوستان د یاد هدف په تعقیب په ۱۹.۵ اورونو کې ۱۰۲ منډې وکړې او ټول لوبغاړي یې له لاسه ورکړل.

د زمبابوې لوبډلمشر سکندر رضا، چې په دې لوبه کې یې ۱۷ منډې کړې وې او ۳ لوبغاړي یې سوځولي وو د لوبې غوره لوبغاړی ونومول شو.

ټاکل شوې چې دواړه لوبډلې دوه نورې شل اوریزې سیالۍ د جولای په ۷مه او ۱۱مه نېټه ترسره کړي.

د نړۍ بېلابېلو هېوادونو د ایران په ولسمشرۍ ټاکنو کې د مسعود پزشکیان په بریا د مبارکۍ پیغامونه ورکړي.

له دې ډلې د افغانستان پخواني ولسمشر حامد کرزي هیله ښودلې چې د پزشکیان په دوره کې د ایران او افغانستان تر منځ دوستانه روابط لا زیات ټینګ شي.

ډاکتر عبدالله عبدالله د پزشکیان په ټاکل کېدو مبارکي ورکړې او ویلي یې دي چې ایران د میلیونونو افغانانو کوربه دی او خپلې بشري مرستې کوي.

د سعودي عربستان مشرتابه، د ایران د ولسمشرۍ تر وخت مخکې ټاکنو کې اصلاح غوښتونکي کاندید مسعود پزشکیان ته مبارکي ورکړه او هیله یې ښودلې چې دا بریا د دواړو هېوادونو د اړیکو ودې ته زمینه برابره کړي.

مسعود پزشکیان د ایران ولسمشرۍ ټاکنو په دویم پړاو کې چې پرون ترسره شو، د اکثریت رایې په ګټلو سره بریالی اعلان شو.

سعودي عربستان او د هغه سیمه‌ییز رقیب ایران چې په یمن او سوریه کې د مخالفو جهتونو ملاتړ کوي، تېر کال د چین په منځګړیتوب خپلې اړیکې عادي کړې.

د سعودي عربستان دولتي اژانس ایس‌پي‌اې (SPA) خبر ورکړی چې ملک سلمان پزشکیان ته د مبارکۍ پیغام لېږلی او هیله یې ښودلې چې د دواړو هېوادونو ترمنځ به ډیپلوماتیکې اړیکې دوام ومومي.

د هواپېژندنې ادارې د افغانستان په لسو ولایتونو کې سبا یکشنبه د بارانونو اورېدلو اټکل کړی دی.

د طالبانو د ټرانسپورټ او هوايي چلند وزارت د هواپېژندنې ریاست نن په یوه اطلاعیه کې ویلي په بدخشان، نورستان، کونړ، لغمان، ننګرهار، لوګر، پکتیا، خوست، پکتیکا او غزني کې به د اورښتونو اندازه له ۱۵ تر ۳۰ ملي مټرو پورې وي.

دغې ادارې دغه راز د سالنګونو په ګډون په شمالي، لوېدیځو، جنوبي او مرکزي ولایتونو کې د بادونو، دوړو او خاورو اټکل کړی چې د بادونو سرعت به په یوه ساعت کې له ۵۰ تر ۸۰ کیلومټرو پورې وي.

د غويي یا ثور له وروستیو د افغانستان تر نیمايي زیاته برخه تر سختو اورښتونو وروسته د سېلابونو له کبله زیانمنه شوه چې سلګونو کسانو ته یې مرګ ژوبله واړوله او زرګونه کورونه یې یا بشپړ یا څه ناڅه تخریب کړل.

د حماس تر ولکې لاندې د غزې روغتیا وزارت نن ویلي چې د فلسطینیانو په دغه قلمرو کې د نهه میاشتنۍ جګړې په نتیجه کې د وژل شویو شمېر ۳۸زره ۹۸ ته ورسېد.

د امریکا متحد ایالتونه او اروپايي ټولنه حماس ډله یو تروریستي سازمان ګڼي.

په وژل شویو کې هغه ۸۷ کسان هم شامل دي چې د وزارت په وینا په تېرو ۴۸ ساعتونو کې وژل شوي دي.

له کله چې د اکټوبر پر اوومه د حماس او اسراییل ترمنځ په غزه کې جګړه پیل شوې د غزې د روغتیا وزارت په وینا ۸۷زره ۷۰۵ نور کسان ټپیان شوي دي.

په غزې تړانګه کې دا جګړه وروسته له هغې پیل شوه چې لومړی توندلارې ډلې حماس د اکټوبر میاشتې پر ۷مه پر اسراییل په حملې سره ۱۲۰۰ کسان ووژل او شا و خوا ۲۵۰ نور کسان یرغمل کړل.

له پاکستان او ایرانه افغانستان ته په ډله‌ییز ډول د ۱۷۷ کورنیو د ستنېدو خبر ورکړل شوی دی.

باختر اژانس چې د طالبانو په کنټرول کې دی، نن خبر ورکړی چې پرون له پاکستانه د تورخم له لارې ۷۰ کورنۍ، د سپین بولدک له لارې ۲۸ کورنۍ او له ایرانه د نیمروز له لارې ۴۹ کورنۍ او د هرات د اسلام کلا له لارې ۳۰ کورنۍ افغانستان ته ستنې شوې دي.

په خبر کې نه دي ویل شوي چې دغه کورنۍ په خپله خوښه که په جبري ډول افغانستان ته ستنې شوې دي.

د نومبر میاشتې له لومړۍ نېټې له پاکستانه د بې اسناده افغان کډوالو ډله‌ییز اخراج روان دی، ورسره ایران هم افغانستان ته د افغان کډوالو د ایستلو لړۍ ګړندۍ کړې ده.

د ملګرو ملتونو د روغتیا نړیوال سازمان په افغانستان کې خلکو ته سپارښتنه کړې چې په ډینګي تبې د نه اخته کېدو لپاره ځینې ټکي په پام کې وساتي.

د دې ادارې د افغانستان څانګې نن په یوه اطلاعیه کې لیکلي چې خلک دې د اوبو ساتلو ټول زاړه شیان لکه بوتلونه، قوطۍ ګانې او نور توکې لیرې واچوي، هره اوونۍ دې د اوبو ساتلو لوښي تش، پاک کړي او ومینځي.

د روغتیا نړیوال سازمان، له خلکو غوښتي چې د اوبو د ذخیرې وسایل دې وپوښي، د اوبو هغه وسایل دې چې نه یې کاروي سرچپه کېږدي اوبه دې نه په کې پرېږدي، ویالې، ډنډونه او کنارابونه دې پاک کړي او د ګلدانونو اوبه دې بدلې کړي.

ډینګي تبه هغه ناروغي ده چې له یو ډول غوماشې څخه انسان ته انتقالېږي او پر روغتیا ناوړه تاثیر کوي.

د ډينګي تبې ناروغي، له والګي یا ریزش څخه پیلېږي چې ورو ورو سختېږي او که پر وخت یې درملنه ونه شي ناروغ د مرګ تر سرحده رسوي.

د طالبانو مخالفې ډلې د افغانستان د ازادۍ جبهې ادعا کړې چې پرون یې وسله‌والو د کابل پر دهمزنګ سړک د طالبانو پر سرحدي بدري قطعې حمله کړې او د طالبانو د دې قطعې یو مشکوک مشر عبدالله عمري یې له دوو نورو طالب وسله‌والو سره وژلی او بل تن ټپي کړی دی.

طالبانو د دې ادعا په باب څه نه دي ویلي.

ازادي راډیو هم دغه ادعا په بې پرې ډول نه شي تاییدولی.

یاده جبهه د افغانستان په یو شمېر سیمو کې کله ناکله پر طالبانو د بریدونو راپورونه ورکوي.

د سعودي عربستان مشرتابه د ایران د ولسمشرۍ تر وخت مخکې ټاکنو کې اصلاح غوښتونکي کاندید مسعود پزشکیان ته مبارکي ورکړه او هیله یې ښودلې چې دا بریا د دواړو هېوادونو د اړیکو ودې ته زمینه برابره کړي.

مسعود پزشکیان د ایران ولسمشرۍ ټاکنو په دویم پړاو کې چې پرون ترسره شو، د اکثریت رایې په ګټلو سره بریالی اعلان شو.

سعودي عربستان او د هغه سیمه‌ییز رقیب ایران چې په یمن او سوریه کې د مخالفو جهتونو ملاتړ کوي، تېر کال د چین په منځګړیتوب خپلې اړیکې عادي کړې.

د سعودي عربستان دولتي اژانس ایس‌پي‌اې(SPA) خبر ورکړی چې ملک سلمان پزشکیان ته د مبارکۍ پیغام لېږلی او هیله یې ښودلې چې د دواړو هېوادونو ترمنځ به ډیپلوماتیکې اړیکې دوام ومومي.

د اوکراین هوايي ځواکونه وايي، نن سهار یې د روسیې د بې پیلوټه الوتکو د یوې بلې حملې څپه شنډه کړې چې د اوکراین ۱۲ ساحې یې په نښه کړې وې.

تر دې مخکې د اوکراین یوه محلي چارواکي ویلي وو چې مسکو پر دونیڅک سیمې د رهبري شویو بمونو په حملې سره لږ تر لږه ۵ کسان ووژل او ګڼ نور ټپیان کړل.

د اوکراین هوايي ځواکونو نن په ټلګرام کانال کې لیکلي چې نن سهار وختي د دوی دښمنانو د شاهد په نوم د ۲۷ بې پیلوټه الوتکو په ذریعه حملې کړې دي.

د اوکراین دغه ځواک وايي، دوی توانېدلي د دغو الوتکو له جملې ۲۴ یې پر دنیپروپیټروفسک، پولتاوا، زاپوریژیا، خرسون، خارکیف، دونیڅک، سومي، چرنيهیف، وینیڅیا، کییف، کیروفوهراد او میکولاییف سیمو نسکورې کړي.

بلخوا د پلازمېنې کییف په شمالي سیمه سومي کې محلي چارواکو ویلي چې د روسیې بې پیلوټه الوتکو د اوبو د سیستم برښنا پرې کړې ده چې د اوبو د رسولو بهیر یې ټکنی کړی دی.

د اوکراین دولتي رسنیو په عین حال کې د پلازمېنې کییف په شمال ختیځه سیمه سسپلاین کې د څو چاودنو خبر ورکړی دی.