د خیبرپښتونخوا ایالت د مردان ښار په جلاله پل سیمه کې نن په یوې چاودنه کې درې کسان وژل شوي او د دوو پولیسو په ګډون اته کسان ژوبل شوي دي.

د مردان د پولیسو مشر ظهور افريدي ویلي چې له دغه پله سره له وړاندې چاودېدونکي مواد ځای پرځای شوي وو چې د پوليسو د یوه موټر د تېرېدو په وخت پرې چاودلي.

په ژوبل شویو کسانو کې ماشومان او ښځې هم شامل دي.

ټپیان د درملنې لپاره د مردان روغتون ته انتقال شوي دي.

د مردان د پوليسو په وينا، د پېښې په اړه پلټنې روانې دي.

د دې پېښې مسولیت چا یا کومې ډلې په غاړه نه دی اخیستی.

وروسته له هغې چې په پاکستان کې د تېلو پلورونکو د حکومت د مالیو لوړولو پر وړاندې د کاري اعتصاب غوښتنه وکړه، نن په ټول پاکستان کې د تېلو د توزیع یو شمېر ټانکونه تړل شوي دي.

حکومت د مالیو د لوړولو لپاره دغه نوی اقدام د دې لپاره کړی چې د مالي کسر د کمولو لپاره عواید زیات کړي.

د پاکستان حکومت د عوایدو د راټولولو دغه ستونزمن هدف د دې لپاره ټاکلی چې د پیسو د نړیوال صندوق یا آی‌ایم‌ایف (IMF) نوې مرسته ترلاسه کړي، خو هغه د خلکو له پراخې غصې سره مخامخ شوی.

د پاکستان د تېلو پلورونکو اتحادیې (PPDA) رییس عبدالسمیع خان رویټرز ته ویلي چې له اسلام آباد او راولپنډۍ پرته د پاکستان په ټولو ښارونو کې د تېلو پلورونکو او د تېلو د توزیع ټانکونو اعتصاب کړی دی.

هغه زیاته کړې چې دغه اعتصاب د حکومت د هغې پرېکړې پر وړاندې شوی چې د تیلو پلورونکو پر عوایدو یې ۰،۵ فیصده مالیه وضع کړې ده.

پاکستان د سږ مالي کال لپاره چې د جولای له لومړۍ پیل شوی، د مالیو د راټولولو له درکه د ۴۷ میلیارد ډالرو عوایدو د ترلاسه کولو هدف ټاکلی چې دا د مخکیني کال پرتله نژدې ۴۰ سلنه زیاتوالی ښیي.

د پاکستان حکومت هڅه کوي چې د کورنیو ناخالصو تولیداتو له درکه په بودیجه کې کسر ۵،۹ سلنې ته راټیټ کړي.

تېر کال دغه کسر۷،۴ سلنه و.

د ملګرو ملتونو د بشري چارو د همغږۍ اداره یا اوچا وایي، د افغانستان په لوېدیځ کې د مې میاشتې له لومړیو راهیسې سختو بارانونو او سېلابونو نژدې ۴۰زره کسان زیانمن کړي دي.

د افغانستان لپاره د اوچا څانګې پرون پنجشنبې په خپله ایکسپاڼه یا پخواني ټویټرکې لیکلي چې سېلابونو ډېر زیان کورونو، کرنیزو محصولاتو او څارویو ته رسولی دی.

اوچا وایي، که څه هم له زیانمن شویو ټولنو سره څه بېړنۍ مرستې شوي، خو دوی د اوږدمهاله ملاتړ په شمول زیاتو مرستو ته اړتیا لري.

د افغانستان یو شمېر ولایتونه نن او سبا هم د سېلابونو له ګواښ سره مخامخ دي.

د طالبانو د حکومت د انرژۍ او اوبو وزارت پرون پر خپله ایکسپاڼه لیکلي چې د شنبې او یکشنبې په ورځو د کابل او هلمند د سیندیزو حوزو په ګډون د افغانستان په ځینو سیمو کې د تېزو بارانونو له کبله د سېلابونو د راوتلو اټکل کېږي.

په ځانګړې توګه د پنجشېر، غوربند، لوګر، غزني، کونړ، لغمان، پکتیا، پکتیکا، خوست او زابل د سیندونو په اوږدو کې د اوبو د کچې د لوړېدو وړاندوینه شوې ده.

د دې سیندونو پر غاړو د پرتو سیمو له خلکو غوښتنه شوې چې د سیندونو پر غاړو له تګ راتګ څخه ډډه وکړي.

په سرپل ولایت کې په یوه ترافیکي پېښه کې دوه کسان مړه شوي او اوه نور ټپیان دي.

د چارواکو په وینا، دا پېښه پرون ناوخته د سرپل ښاراړوند لاتي کلي کې د یوه مسافروړونکی بس د چپه کېدو له امله رامنځته شوې ده.

د پېښې ټپیان نژدې روغتون ته لېږدول شوي او روغتیایي وضعیت یې د ډاډ وړښودل شوی دی.

که څه هم د بس د چپه کېدو اصلي لامل نه‌دی ښودل شوی، خو معمولاً د چلونکو بې احتیاطي، د سړکونو خرابوالی او د ترافیکي اصولو نه رعایت په افغانستان کې د زیاتو ترافیکي پېښو اصلي علت ګڼل کېږي.

د بریتانیا په پارلماني ټاکنو کې کارګر ګوند له ۱۴کلونو وروسته اکثریت څوکۍ وګټلې.

که څه هم لا د ټولو څوکیو نتیجه نه ده معلومه، خو د ۵۰۰ معلومو شویو څوکیو له ډلې ۳۸۹ د کایر ستارمر په مشرۍ کارګر ګوند خپلې کړي.

د بریا لپاره ۳۲۶ څوکۍ اړینې دي.

اوسني صدراعظم ریشي سوناک چې ګوند یې لویه ماته خوړلې کارګر ګوند ته مبارکي ورکړې ده.

د کارګر ګوند مشر کایر ستارمر تر بریا وروسته وینا کې وویل چې "بدلون اوس پیلېږي او بریتانیا بېرته د کارګر طبقې خدمت کې راولو."

نن په ایران کې د ولسمشرۍ د دویم پړاو انتخابات دي.

په دې ټاکنو کې د تېر پړاو دوه مخکښ کاندیدان مسعود پزشکیان او سعید جلیلي سیالي کوي.

دوی او نورو کاندیدانو یوه هم تېر پړاو کې د بریا لپاره کافي رایې نه وې وړې.

مسعود پزشکیان له اصلاح غوښتونکو کاندیدانو دی او سعید جلیلي هم له تُندلارو نظام پلوه کسانو څخه دی.

ایران کې داسې وخت ټاکنې ترسره کېږي چې ګڼو خلکو له رای ورکولو ډډه کړې ده.

د ولسمشرۍ لومړي پړاو ټاکنو کې د راپورونو په اساس د رایو په شرایطو له برابرو کسانو څه کم څلوېښت فیصدو ګډون کړی وو چې دا د ایران په تاریخ کې د ولسمشرۍ ټاکنو کې د ګډونوالو تر ټولو کمه فیصدي ده.

د اروپا د ملتونو د فوټبال جام کوارټرفاینل سیالۍ نن پيلېږي.

لومړۍ لوبه کې کوربه جرمني له هسپانیې سره مخ دی.

د دوی لوبه د افغانستان په وخت د شپې په اته نیمو پیلېږي. ګټونکی به یې نیمه پایلوبې ته ووځي.

په بله لوبه کې چې ناوخته پیلېږي پرتګال له فرانسې سره مخ دی.

د اروپا د ملتونو د فوټبال جام سیالۍ د جرمني په کوربه توب دوام لري او تمه ده پایلوبه یې د جولای په ۱۴مه وشي.

د طالبانو ستره محکمه په کندهار او غزني ولایتونو کې پر شپږو کسانو د درې وهلو د تعزیري سزا د تطبیق خبر ورکوي.

دې محکمې پرون پنجشنبې په جلا بیانونو کې ویلي چې د کندهار په میوند ولسوالۍ کې پر لواطت تورنو پنځو کسانو د ۳۰ درو وهلو حکم تطبیق شو.

دې محکمې همدارنګه ویلي چې په غزني کې په غلا تورن پر یو کس د ۳۹ درو وهلو سزا تطبیق شوه.

په څه باندې یوه اوونۍ کې د طالبانو د محکمو له خوا پر شاوخوا ۳۰ کسانو دا ډول تعزیري سزاګانې عملي شوې دي.

د بشري حقونو فعالان او مدافعان د طالبانو پر قضایي نظام انتقاد کوي او وایي تورن کسان مدافع وکیل ته له لاسرسي پرته د طالبانو له‌خوا مجازات او زنداني کېږي.

د جرمني د نړیوالې همکارۍ ادارې یا "جي‌ای‌زیټ" GIZ ویلي نیت لري چې خپل ټول جرمني کارکوونکي له افغانستانه وباسي.

د جرمني د "آراین‌‌‌ډي" RND رسنۍ د راپور له مخې دې ادارې ویلي چې له ۲۰۲۵م کال وروسته به په افغانستان کې هېڅ کورنی کارکوونکی استخدام نه‌کړي.

دې ادارې په افغانستان کې د خپلو فعالیتونو د بندېدو د عواملو په اړه جزییات نه دي ورکړي، خو ویلي یې دي چې د ټولو ۱۶۰ افغان کارکوونکو قراردادونه به د روان ۲۰۲۴م کال ترپایه د اعتبار وړ وي.

د "جي‌آی‌زیټ" ادارې ویاند ویلي چې په افغانستان کې د دې ادارې راتلونکې پروژې به د غیردولتي سازمانونو له لارې پلې شي.

د جرمني د نړیوالې همکارۍ ادارې له ۲۰۰۲م کال راهیسې په افغانستان کې کار پیل کړی او د تعلیمي او روغتیایي خدماتو په ګډون یې په مختلفو برخو کې فعالیتونه سرته رسولي دي.

د پاکستان صدراعظم شهباز شریف له نړیوالې ټولنې وغوښتل چې په افغانستان کې د اقتصادي او پراختیایي اړتیاوو د تامین لپاره د طالبانو له سرپرست حکومت سره معنا لرونکی تعامل وکړي.

شریف دغه غوښتنه پرون پنجشنبې د قزاقستان په پلازمېنه استانه کې د شانګهای د همکارۍ د سازمان سرمشریزې ته په وینا کې وکړه.

شریف همدارنګه د طالبانو له حکومت څخه وغوښتل چې دا مسئله دې یقیني کړي چې د دې هېواد له خاورې پر نورو هېوادونو د بریدونو لپاره کار وانه‌خیستل شي او دې برخه کې دې کوټلي اقدامات وکړي.

د پاکستان صدراعظم وویل، هغه تروریستي بریدونه چې په دې وروستیو کلونو کې په پاکستان کې زیات شوي، د دوی ټولو لپاره د اندېښنې وړ دي.

د طالبانو حکومت تراوسه د پاکستان د صدراعظم د دغو نویو څرګندونو پر وړاندې غبرګون نه‌دی ښودلی، خو له دې مخکې یې ویلي وو چې هیچاته به اجازه ورنه‌کړي چې د افغانستان له خاورې نورو ته ګواښ متوجه کړي.