امریکا او اسراییلو پرون چهارشنبې د جون۲۶ وویل، اسراییلو ته د امریکايي پرمختللو وسلو او ممهاتو د محمولو د ورکړې په برخه کې پرمختګونه شوي دي.

دا پرمختګ وروسته له هغې دی چې د اسراییلو صداعظم بنیامین نتنیاهو په ښکاره ولسمشر بایډن دې هېواد د وسلو د لېږد د پروسې په ورو کولو تور کړ.

د اسراییلو د دفاع وزیر یوان ګالانټ په تېرو درېیو ورځ کې په واشنګټن کې له لوړپورو امریکايي چارواکو سره کتلي دي.

هغه د امریکا د ملي امنیت د لوړپوري سلاکار جیک سالیوان سره له کتنې وروسته وویل: "په کتنو کې د پام وړ پرمختګونه شوي او ځنډونه لرې شوي دي."

د امریکا متحده ایالاتونو د روان کال د مې په پیل کې اسراییلو ته د هغو محمولو ورکړه وځنډوله چې د نورو وسلو سربېره ۹۰۰ کیلو ګرامي بمبونه هم په کې شامل وو، له دې سربېره جوبایډن پر اسراییلو فشار راوړه چې پر رفع ښار پراخ پوځي بریدونه ترسره نه کړي.

امیرحسن قاضي زاده هاشمي د ایران په ټاکنو کې د یوه تندلاري نوماند په ګټه له خپلې نوماندۍ تېر شو.

قاضي زاده، چې د ایران د مخکېني مړ شوي ولسمشر ابراهیم رییسي مرستیال و، د چهارشنبې په ورځ د جون۲۶مه يې وویل: "دا کار يې د انقلابي ځواکونو د یووالي په موخه کړی دی."

د پنځو نوماندانونو له ډلې یوازې مسعود پزشکیان چې اصلاح غوښتونکی او منځلاری دی، د ایران د جون میاشتې د ۲۸مې په ټاکنو کې ګډون کوي.

ابراهیم رییسي، د بهرنیو چارو وزیر امیرحسین عبداللهیان او یو شمېر نور چارواکي د مې میاشتې په ۱۹مه د یوې هیلیکوپټرې د نسکورېدو په پېښه کې مړه شول.

وروسته له هغې چې د اوکراین د پلازمېنې کییف په یوه هوټل کې د امریکا د سفارت د یوه اتشې جسد پیدا شو، د امریکا د بهرنیو چارو وزارت وايي، د دې مړینې تر شا "هېڅ توطیه" نه‌شته.

د دې وزارت ویاند متیو مېلر پرون ناوخته د جون۲۶مه د اوکرایني رسنیو راپورونو ته په ځواب کې ویلي: "هغوي پوهېږئ چې د دې اتشې مړینه په طبیعي ډول وه او د توطیې هېڅ نښه نه‌شته."

د اوکراین سترانه یواې(Strana UA) رسنۍ د لومړی ځل لپاره د دې کس د مړینې خبر په کییف کې د امریکا له سفارته ورکړ.

د یوې سرچینې په حواله ویل شوي چې دې مړ شوي کس د وینې لوړ فشار درلود.

د امریکا ولسمشر او د دیموکرات ګوند نوماند جوبایډن او د امریکا پخوانی ولسمشر او د جمهوري غوښتونکو نوماند ډونالد ټرمپ نن د جون ۲۷مه د ۲۰۲۴م کال د ولسمشرۍ انتخاباتو د تاریخي مناظرې لپاری تیاری نیسي.

د فرانس خبري اژانس د راپور پر بنسټ، د دغو دوو نوماندانو دا مناظره داسې مهال کېږي چې میلیونونه امریکايي رایه ورکوونکي به د امریکا په تاریخ کې د تر ټولو زوړ ولسمشر او یو محکوم شوي مجرم ترمنځ د بحث شاهدان وي.

په دې ټاکنیز پړاو کې د نوماندانو ترمنځ یوازې دوه دا ډول جنجالي مناظرې ترسره کېږي چې د نن ورځې مناظره د امریکا په ټاکنو کې مهمه پېښه ده.

د کرکټ د شل اوریز نړیوال جام په لومړنۍ نیمه پایلوبه کې سویلي افریقا د ۹ وېکټو په توپير افغانستان ته ماتې ورکړه او پایلوبې ته یې لار پیدا کړه.

دا لومړی ځل دی چې سویلي افریقا د شل اوریزو سیالیو پایلوبې ته رسېږي.

یاده سیالي چې نن پنجشنبه د کابل پر وخت سهار ۵:۰۰ بجې پیل شوې وه، پچه یې افغانستان وګټله او توپوهنه یې انتخاب کړه.

افغان لوبډلې د ټولو لوبغاړو په له لاسه ورکولو سره په ۱۱.۵ اورونو کې ۵۶ مندې وکړې.

په افغان توپوهونکو کې یوازې عظمت‌الله عمرزي ۱۰ منډې وکړې، نور ټول توپوهونکي یې تر لسو په کمو منډو وسوځېدل.

د سویلي افریقا لپاره په توپ اچونه کې مارکو یانسن او تبریز شمسي ۳ـ۳ لوبغاړي، نارکیا او رباډا دوه دوه لوبغاړي وسوځول.

د سویلي افریقا لوبډلې ورکړل شوی هدف د یوه لوبغاړي تر سوځېدو وروسته په ۸.۵ اورونو کې پوره کړ او پایلوبې ته ورسېدل.

تر یادې سیالۍ وروسته په نړیوال جام کې د افغانستان ملي لوبډلې سفر هم بشپړ شو.

ټاکل شوې چې نن سه شنبه به دویمه نیمه پایلوبه د هندوستان او انګلستان ترمنځ د کابل پر وخت ماښام ۷:۰۰ بجې پيل شي.

د دویمې نیمه پایلوبې ګټونکې لوبډله به د جون په ۲۹مه نېټه له سويلي افریقا سره پایلوبه ولوبوي.

د افغانستان د ښځو، نجونو او بشري حقونو لپاره د امریکا ځانګړې استازې رینا امیري وايي، تر هغو چې د بشري حقونو موضوع د افغانستان په اړه د راتلونکو غونډو اجنډا ونه ګرځي، شخړې پای ته نه رسېږي.

مېرمن امیري دا خبره تېره شپه ناوخته چهارشنبه د سرطان ۶مه په خپله ایکسپاڼه یا پخواني ټویټر کې د شکنجې له قربانیانو څخه د ملاتړ د نړیوالې ورځې په مناسبت کړې ده.

هر کال د جون ۲۶مه د شکنجې له قربانیانو څخه د ملاتړ د نړیوالې ورځې په توګه نمانځل کېږي.

هغې زیاته کړه چې د اوسني رژیم په ګډون په تېرو پنځلسو کلونو کې بې شمېره افغانان له تاوتریخوالي سره مخ شوي دي.

طالبانو په تېرو درېیو کلونو کې واک ته له رسېدو وروسته په عام محضر کې د ښځو په ګډون سلګونه کسان په دورو وهلي دي.

د کرکټ شل اوریز نړیوال جام لومړنۍ نیمه پایلوبه د افغانستان او سویلي افریقا ترمنځ پیل شوې او افغان لوبډلې د خپلې توپوهنې پاڼۍ هم پای ته ورسوله.

د دې سیالۍ پچه چې افغان لوبډلې ګټلې وه د توپوهنې تر انتخاب وروسته یې په ۵۶ منډو ټول لوبغاړي له لاسه ورکړل.

په افغان توپوهونکو کې یوازې عظمت‌الله عمرزي ۱۰ منډې وکړې، نور ټول توپوهونکي یې تر لسو په کمو منډو وسوځېدل.

د سویلي افریقا لپاره په توپ اچونه کې مارکو یانسن او تبریز شمسي ۳ـ۳ لوبغاړي، نارکیا او رباډا دوه دوه لوبغاړي وسوځول.

د طالبانو د حکومت د بهرنیو چارو سرپرست وزیر امیر خان متقي وایي، دوحه کې به د دوی پلاوی پر دوو مسایلو بحث ته چمتو وي، لومړی له نشه‌یي توکو سره مبارزه او دویم هم پر دوی د بندیزونو لرې کول.

متقي دغه څرګندونې پرون چهارشنبه په کابل کې د ملګرو ملتونو له ځانګړې استازې روزا اتونبایووا سره په کتنه کې وکړې.

د وزارت ویاند عبدالقهار بلخي پر خپله ایکسپاڼه یا پخواني ټویټر لیکلي، دغو لیدو کتو کې د دوحې د غونډې پر اجنډا او د طالبانو د پلاوي پر جوړښت خبرې وشوې.

بلخي د میرمن اتونبایووا په حواله ویلي چې نوموړې د دوحې غونډه د نړیوالې ټولنې او طالبانو د نظر شریکولو لپاره ښه فرصت یاد کړی دی.

د طالبانو بهرنیو چارو وزارت د سه شنبې په ورځ اعلان کړی چې د دوی د حکومت ویاند ذبیح‌الله مجاهد به د دوحې په غونډه کې د طالبانو د پلاوي مشري کوي.

د دوحې غونډه د راتلونکې یکشنبې په ورځ د جون په ۳۰مه پيلېږي.

تر دې وړاندې روزا اوتونبایووا ویلي، مېرمنې په د دوحې غونډې په اصلي بحثونو کې برخه ونه لري، هغه اعلان چې د بشري حقونو د ملاتړو بنسټونو غبرګونونه یې پارولي دي.

د پاکستان دفاع وزیر خواجه آصف د امریکا د استازیو جرګې پر هغه پرېکړه‌لیک انتقاد کړی چې په پاکستان کې د فبرورۍ د میاشتې په عمومي انتخاباتو کې یې د بې نظمیو د ادعاوو په اړه د یوې خپلواکې څېړنې غوښتنه کړې ده.

د رویترز خبري آژانس د راپور له مخې دغه انتخابات چې په نتیجه کې یې هېڅ یو ګوند ونه توانېد چې په یوازې توګه اکثریت ترلاسه کړي، له تاوتریخوالي، د ټیلیفوني او نورو ټولنیزو شبکو د بندېدو او د پخواني زنداني صدراعظم عمران خان د ګوند له‌خوا د درغلیو له ادعاوو سره مله وه.

خو د پاکستان د انتخاباتو کمېسیون دغه ادعاوې رد کړي دي.

د پاکستان دفاع وزیر خواجه آصف د پاکستان جیونیوز ته ویلي چې د امریکا متحده ایالات حق نه لري چې د پاکستان په کورنیو چارو کې مداخله وکړي یا په دې اړوند کومه فیصله صادره کړي.

هغه ویلي چې دغه پرېکړه‌لیک چې د سې شنبې په ورځ تصویب شوی، هېڅ ارزښت نه لري، خو د عمران خان ګوند د هغه هرکلی کړی دی.

د دې ګوند یوه جګپوړي مشر ذوالفقار بخاري ویلي، دوی هیله‌من دي چې نور هېوادونه او مشران هم د امریکا د استازیو جرګې په لاره پل واخلي.

د عمران خان ملاتړو خپلواکو کاندیدانو ډېرې څوکۍ وګټلې، خو د حکومت د جوړولو لپاره یې کافي اکثریت نه وو پوره کړی. پرځای یې د هغه د سیالانو اتحاد د صدراعظم شهباز شریف په مشرۍ حکومت جوړ کړ.

د افغانستان لپاره د ملګرو ملتونو د بسپنې وجهي صندوق له اړو افغانانو سره د مرستو د نویو پروګرامونو د تصویب خبر ورکوي.

دې صندوق پرون چهارشنبې په خپله ایکسپاڼه یا پخواني ټویټر کې لیکلي چې د دې صندوق د رهبرۍ کمېټې د په زرګونو داخلي بېځایه شویو او هېواد ته د ستنو شویو د لومړنیو اړتیاوو او هم د مخدره موادو د استعمال له امله اختلالاتو ته د رسېدو د چارو د ملاتړ لپاره پروګرامونه تصویب کړل.

په دې اړه زیات جزییات نه‌دي ورکړل شوي، خو د افغانستان لپاره د ملګرو ملتونو د سرمنشي د ځانګړې استازې مرستیال او د افغانستان لپاره د بشري چارو همغږي کوونکي اندریکا راټویټ په یوه ویډیويي پیغام کې ویلي چې دغه صندوق په ۲۰۲۱م کال کې د خپل تاسیس راپه‌دېخوا د پنځه میلیونه افغانانو لاسنیوی کړی.

د هغه په وینا، تراوسه له دې صندوق سره دیارلسو هېوادونو د څه باندې ۲۳۰ میلیون ډالرو مرسته کړې، خو د دې لپاره چې په افغانستان کې میلیونونو کسانو ته مرستې ورسوي ترڅو هغوی سولې او هوساینې ته ورسېږي او هم د ټولنو مقاومت زیات شي، دا صندوق نورو مرستو ته اړتیا لري.