د افغانستان کرکټ بورډ وايي چې د افغان ابدالیانو په نوم الف لوبډله یې سبا جمعه د اکټوبر په ۱۸مه نېټه د اسیا ایمرجینګ جام په سیالیو کې خپله لومړۍ لوبه له سریلانکا سره ترسره کوي.

د بورډ په خبر کې راغلي چې سیالي به د کابل پر وخت ماښام ۶:۰۰ بجې پیل شي.

افغان لوبډله چې په اې ګروپ کې قرار لري دوهمه سیالي یې د اکټوبر په ۲۰مه نېټه له بنګله‌دېش او وروستۍ یې په ۲۲مه نېټه له هانګ کانګ سره ده.

افغان کرکټ بورډ د یادو سیالیو لپاره د دروېش رسولي په لوبډلمشرۍ ۱۵ کسیزه لوبډله ټاکلې ده چې له وړاندې یې په عمان کې دوه تمریناتي سیالۍ ترسره کړې او له عمان او هانګ کانګ سره یې په درې اړخیزو سیالیو کې اتلولي هم وګټله.

د ویلو ده چې یادې سیالۍ شل اوریزې دي او پر افغانستان سربېره په کې ۷ نور اسیايي هېوادونه هم ګډون لري او د اکټوبر په ۲۷مه نېټه به یې پایلوبه وي.

د هندوستان او نیوزیلنډ د کرکټ ملي لوبډلو ترمنځ د لومړۍ ټېسټ لوبې په لومړۍ پاڼۍ کې هندۍ لوبډله په ۴۶ منډو وسوځېده.

دغه ټېسټ لوبه د هند په کوربه‌توب په بنګلور ښار کې پیل شوې چې هندوستان د پچې تر ګټلو وروسته توپوهنه غوره کړه.

یادې لوبډلې ۳۱.۲ اورونه ولوبول، ۴۶ منډې یې وکړې او ټول لوبغاړي یې له لاسه ورکړل.

مخکښ منډه جوړونکی یې رېشب پانټ و چې په ۲۰ منډو وسوځېد.

په دې پاڼۍ کې ویرات کهولي، سرفرازخان، کیل راهول، رویندر جدیجا او روي چندرن اشوېن په صفر وسوځېدل.

د نیوزیلنډ په توپ اچونکو کې مت هنري۵، ویلیم اوروک۴ او ټیم ساوتي یوه ویکټ واخیسته.

دا د لومړۍ ټېسټ لوبې دوهمه ورځ ده، په لومړۍ ورځ د ورښت له امله هېڅ لوبه ونه شوه.

د ویلو ده چې دا د ټېسټ اتلولیو اړوند سیالۍ دي چې دواړه لوبډلې به درې ټېسټ لوبې ترسره کړي.

د ایران د بهرنیو چارو وزیر عباس عراقچي تېره پرون چهارشنبه مصر ته ورسېد.

دا له شاوخوا دولسو کلونو وروسته مصر ته د ایران د بهرنیو چارو د یوه وزیر لومړنی سفر دی.

وروستی ځل د ایران د هغه وخت د بهرنیو چارو وزیر علي اکبر صالحي افریقا ته د سفر پر مهال د ۲۰۱۳م کال په جنورۍ کې قاهرې ته تللی و.

عراقچي چې دا مهال د څو هېوادونو په سفر بوخت دی، د اردن له سفر وروسته مصر ته ورسېد او هلته یې له خپل سیال ایمن صفادي سره وکتل.

د ایران د بهرنیو چارو وزارت ویاند اسماعیل بقايي وايي، دواړو چارواکو په سیمه کې د پرمختګونو او پر غزې او لبنان د اسراییلو د بریدونو په اړه خبرې وکړې.

عراقچي تېره اوونۍ لبنان، سوریې، سعودي عربستان، عراق او عمان ته سفرونه وکړل چې د کړکېچ د کمولو لپاره هڅې وکړي.

د ایران د بهرنیو چارو وزارت ویلي، عراقچي به له مصر وروسته ترکیې ته هم سفر وکړي.

د ښځو د کرکټ د شل اورونو په نړیوال جام کې نن په لومړۍ نیمه پایلوبه کې استرالیا له جنوبي افریقا سره مخامخېږي.

دوهمه نیمه پایلوبه به سبا جمعه د وېسټ اینډیز او نیوزیلنډ ترمنځ وشي.

دا نړیوال جام چې د اکټوبر په درېیمه په متحده عربي اماراتو کې پيل شو، پایلوبه به یې د یکشنبې په ورځ د اکټوبر په شلمه په دوبۍ کې ترسره شي.

د اوکراین ولسمشر ولودمیر زیلینسکي نن چهارشنبې یو لړ اقدامات په ګوته کړل چې د ده په وینا هغه به د کییف په ګټه د جګړې څرنګوالی بدل کړي او ښایي راتلونکي کال له روسیې سره جګړه پای ته ورسوي.

زیلینسکي نن چهارشنبې د اوکراین پارلمان ته په وینا کې له خپلو لوېدیځو شریکانو وغوښتل چې د اوکراین پر ټولو هغو سیمو چې روسیې اشغال کړي، د روسیې پر خاوره او د دښمن پر پوځي تاسیساتو د بریدونو لپاره له کییف سره په مرسته شویو لیرې واټن ویشتونکو وسلو باندې لګول شوي محدودیتونه لیرې کړي.

د اوکراین د ولسمشر د بریا په شپږ ماده‌ییز پلان کې د اوکراین د خاورې له لاسه ورکول رد شوي او غوښتنه شوې چې ناتو دې له دې پوځي تړون سره د اوکراین د یوځای کېدو لپاره کییف ته له قید او شرط پرته بلنه ورکړي او هم غوښتل شوي چې په اوکراین کې له ستراتیژیکو اټومي وسلو پرته دې په دې هېواد کې د دفاع په هدف یو ځواک ځای پرځای شي.

په نایجیریا کې د تېلو د یوه ټانکر د چاودنې له امله د مړو شمېر تر ۱۴۰ کسانو واوښت.

د نایجیریا پولیسو دغه ارقام پرون د چهارشنبې په ورځ ناوخته اعلان کړل او ویې ویل چې په پېښه کې د ماشومانو او ښځو په ګډون شاوخوا ۵۰ کسان نور ټپیان شوي دي.

د جرمني د "ډي‌پي‌اې" خبري اژانس د راپور له مخې، دا پېښه وروسته له هغه رامنځته شوه چې د سه شنبې په شپه د تېلو د یوه ټانکر له چپه کېدو وروسته ګڼ خلک د پیښې ځای ته ورغلل.

د نایجیریا چارواکو ویلي چې د پېښې له ځای څخه د لیرې کېدو لپاره د پولیسو له خبرداریو سره سره خلک هلته د تېلو د وړلو په خاطر ورټول شول چې چاودنه پرې وشوه.

تېره میاشت هم د نایجریا په شمال لوېدیځ کې د تېلو د ټانکر او مسافر وړونکي موټر د ټکر پېښه کې ۵۰ کسان مړه شوي وو.

د اروپایي ټولنې او د خلیج د شپږو هېوادونو چارواکو د منځني ختیځ په تړاو د لومړي ځل لپاره په بروکسل کې غونډه وکړه.

د اروپایي کمېسیون مشرې اورزلا فون دیر لاین پرون د دې غونډې په پرانیستې وینا کې د مهمو جیوپولیټیک مسایلو په تړاو لکه د اوکراین د جګړې او په غزه او لبنان کې د جګړې په تړاو پر همکاریو ټینګار وکړ.

اسوشېټېډ پرېس اژانس د چارواکو په وینا څرګندوي چې په دې برخو کې د یوه مشترک بیان خپرېدل سخته دي، ځکه چې د اروپایي ټولنې یو شمېر غړي هېوادونه د روسیې په برخه کې متفاوت نظر لري.

طالبانو د څلورو ښځو په ګډون لس کسان په کابل، خوست او لغمان ولایتونو کې په عام محضر کې په دُرو ووهل.

د طالبانو سترې محکمې پرون په یوه بیان کې وویل چې دا کسان ځینې ۳۰ او ځینې ۳۹ دُرې، د جنسي اړیکو او غلا په تور وهل شوې دي.

په دې بیان کې وړاندې راغلي چې دغه تورن کسان له څلورو تر شپږ میاشتو د جرم په اساس په بند هم محکوم شوي دي.

له دې وړاندې د یو شمېر نړیوالو بنستونو له لوري په عام محضر کې د سزا په ورکولو نیوکې شوي دي.

د تورخم-پېښور لاره تېر ماښام پرانیستل شوه.

دا لاره له ۵۵ ورځو راهیسې د بیګاړي چک پوسټ په سیمه کې بنده وه.

په ننګرهار کې د پاک-افغان د سوداګرۍ خونو سلاکار مخلص احمد ازادي راډیو ته پرون ناوخته په یوه پيغام کې وویل چې له دې سره به د افغان سوداګرو د صادراتو او افغانستان ته د وارداتو ستونزه حل شي.

په خیبر دره کې د دوشنبې په ورځ د پښتنو قامي جرګې په پرېکړو کې یوه هم دا وه چې له افغانستان سره دې د ډیورنډ کرښې په اوږدو ټولې لارې د خلکو او مالونو پرمخ خلاصې شي.

د پاکستان حکومت د تورخم لارې د پرانیستلو په تړاو د جرګې پرېکړې ته اشاره نه ده کړې، خو پرون د اپریدیو او کوکي‌خېلو یو شمېر قومي مشرانو د خیبرپښتونخوا له اعلی وزیر علي امین ګنډاپور سره تر خبرو وروسته موافقه وکړه چې د بیګاړي چک پوسټ په برخه کې به لاره نه بندوي.

بیګاړي چک پوسټ له تورخمه ۳۸ کیلومتره لرې دی.

د کندهار په ښار کې د اورلګېدو له امله د لسګونو میلیونو افغانیو زیان اوښتی دی.

د کندهار ښار د بوش بازار په سیمه کې د پروني اور له امله یو تن ټپي شوی هم دی.

په کندهار کې د طالبانو د امنیه قومانداني ویاند اسدالله جمشد ویلي چې د دې اور له امله ۴۸ میلیونه او دوه لکه څلوېښت زره افغانۍ زیان اوښتی دی.

د عامو خلکو په دوکانونو کې د دې اور لګېدو علت تراوسه نه دی معلوم شوی.