د طالبانو یوه مخالفه ډله، د افغانستان د ملي مقاومت جبهه ادعا کوي چې په کندز کې د یوه برید په نتیجه کې د طالبانو د استخباراتو درې غړي وژل شوي او دوه نور ټپیان شوي دي.

دې جبهې تېره شپه په یوه بیان کې ویلي چې د دوی ځواکونو تېر ماښام د کندز ښار په واټ کې د طالبانو د استخباراتو د عمومي مدیریت پر ضد هدفي عملیات وکړل.

طالبانو تر اوسه د افغانستان د ملي مقاومت جبهې د دې ادعا په اړه څه نه دي ویلي.

د آزادې اروپا راډیو/ ازادۍ راډیو نه شي کولی په خپلواکه توګه دا ادعا تایید کړي.

د افغانستان د ساحلي فوټبال غوره لیګ سیالیو له پیل سره پرون شنبه په کابل کې دوې لوبې وشوې.

د افغانستان د فوټبال فدراسیون پرون پر خپله فېسبوک پاڼه لیکلي چې په لومړۍ لوبه کې د امید افغان لوبډلې د افغان کلب لوبډلې ته ۶-۳ ماتې ورکړه.

په بله لوبه کې اتفاق لوبډلې ولیعصر ټیم ته ۵-۴ ماتې ورکړه.

د افغانستان د ساحلي فوټبال غوره لیګ سیالۍ د دوو اوونیو لپاره د افغانستان د فوټبال فدراسیون د ساحلي فوټبال په لوبغالي کې د اتو لوبډلو په ګډون دوام کوي.

د ایران د بشري حقونو غیردولتي سازمان وايي، د یوه افغان په ګډون په ټوله کې ۱۰ کسان د ایران د کرج ښار په قزل حصار زندان کې اعدام شوي دي.

په ناروې کې دېره دغه سازمان پرون شنبه په یوه اعلامیه کې ویلي چې په اعدام شویو کې دوه کردان او یوه ښځه هم شامله ده.

دغه کسان د مخدره موادو د کار و بار او عمدي قتل په څېر تورونو له کبله اعدام شوي دي.

د اعدام شوي افغان وګړي نوم خالد تاجیک یاد شوی دی.

د ایران د بشري حقونو سازمان وايي دغه اعدامونه د چهارشنبې په ورځ شوي دي.

د دغه سازمان په وینا د احمد علیزاده په نوم یو بل کس هم چې مخکې د دار تر تختې بېول شوی و او بیا یې اعدام ځنډول شوی و، پرون اعدام شو چې له دې سره پرون په قزل حصار زندان کې د اعدام شویو کسانو شمېر لسو ته ورسېد.

د پاکستان په کراچۍ ښار کې د افغانستان قونسلګرۍ چې د طالبانو په کنټرول کې ده، د سند ایالت له زندانونو د ۱۱ افغان وګړو د خوشې کېدو خبر ورکړ.

په کراچۍ کې د طالبانو جنرال قونسل عبدالجبار تخاري د شنبې په ورځ په یوه ویډیويي پیغام کې وویل چې د یوې ښځې او اوو ماشومانو په ګډون دغه ۱۱ افغانان خوشې او د چمن-سپین بولدک له لارې افغانستان ته لېږدول شوي دي.

دا نه دي ویل شوي چې دغه افغانان ولې او کله نیول شوي وو.

د سند امنیتي چارواکو د تېر لمریز کال په تلې میاشت کې ویلي وو چې شاوخوا ۱۸۰۰ بې اسناده افغانان یې نیولي دي.

تخاري وویل، تر دې مخکې د سند ایالت له زندانونو څخه د ښځو او ماشومانو په ګډون ۴۲۵۸ افغانان خوشې شوي او افغانستان ته لېږدول شوي او دا مهال هم د دغه ایالت په زندانونو کې شاوخوا ۳۵ افغانان بندیان دي.

د کاناډا صدراعظم جستین ترودو پرون شنبه ویلي، اوتاوا په افغانستان کې د کاناډا د ځانګړو ځواکونو د یوه پخواني غړي د نیولو موضوع ډېره جدي ګڼي.

کاناډايي رسنیو راپور ورکړی چې متقاعد ډېوېډ لاوري تېره دوشنبه کابل ته له رسېدو سره سم د طالبانو له‌خوا نیول شوی دی.

د کاناډا سي‌ټي‌وي CTV ټلوېزیوني شبکې د جمعې په ورځ د څو سرچینو په حواله دغه راپور ورکړ، خو طالبانو تر اوسه په دې اړه څه نه دي ویلي.

وړاندې راغلي، تر اوسه معلومه نه ده چې دغه کاناډايي وګړی چېرته ساتل کېږي.

د راپورونو له مخې، لاوري د ۲۰۲۱م کال په اګست میاشت کې د طالبانو لاس ته د کابل د سقوط پر مهال له ۱۰۰ کسانو سره له افغانستانه په وتلو کې همکاري کړې وه.

هغه پخوا په افغانستان کې د یوې خصوصي امنیتي کمپنۍ خاوند و.

د سي‌ټي‌وي د راپور له مخې، د کاناډا د نړیوالو چارو ادارې په یوه برښنالیک کې تایید کړې چې په افغانستان کې د یوه کاناډایي وګړي په باب خبره ده او کاناډايي چارواکي له نږدې د وضعیت څار ته دوام ورکوي.

د طالبانو تر واک لاندې د تعلیماتو تخنیکي او مسلکي اداره وايي، نن د نومبر ۱۷مه د کابل په بادام باغ کې د افغانستان د ملي نوښتونو نندارتون پرانیستل شوی دی.

د دې ادارې په خبره، دا نندارتون چې څلور ورځې به دوام وکړي، د تعلیماتو د تخنیکي او مسلکي ادارې د محصلینو پروژې او نوښتونه په کې نندارې ته وړاندې شي.

د دې ادارې په خبره، نندارتون د ټولو هېوادوالو پر مخ خلاص دی او کولی شي چې له دې نوښتونو لیدنه وکړي.

څلور ورځې وړاندې د کابل ښاروالۍ د "کابل نوي انځور" په نوم یو نندارتون جوړ کړی و چې په کې د کابل ښاروالۍ د ۱۲۰ مهمو پروژو انځورونه نندارې ته وړاندې شوي وو.

د ملګرو ملتونو د ماشومانو د ملاتړ وجهي صندوق یا یونېسف په مرسته په پکتیا ولایت کې د اوبو رسونې دوه شبکې جوړې شوي دي.

د طالبانو تر واک لاندې ملي راډیو تلوېزیون پرون د نومبر ۱۶مه پر خپلې ایکس‌پاڼې یا پخواني ټویټر ویلي، د اوبو دا شبکې د څه باندې ۵ میلیونو افغانیو په ارزښت د پکتیا په برمل او شکین ولسوالیو کې جوړې او ګټې اخیستې ته سپارل شوي دي.

بل پلو د طالبانو تر واک لاندې باختر خبري اژانس پرون پر خپلې ایکس‌پاڼې ویلي، د جوزجان په قوش‌تېپې ولسوالۍ کې د نژدې درېیو میلیونو افغانیو په ارزښت یو ښوونځی جوړ او ګټې اخیستې ته سپارلی دی.

باختر وړاندې وايي، دغه ښوونځی د یوه خیرته بنسټ او د سیمې د خلکو په همکاري جوړ شوی دی.

د طالبانو امنیتي سرتېرو دوه کسان د یو خرس د ښکار په تور نیولي دي.

د بدخشان د چاپېریال ساتنې د ادارې رییس فیض‌الرحمن ابراهیمي پرون د نومبر۱۶مه رسنیو ته ویلي، دا دوه تنه يې په "شکي" ولسوالۍ کې د هغه قهويي خرس د ښکار په تور نیولي، چې څو ورځې وړاندې ښکار شوی و.

بل پلو په نیمروز ولایت کې د طالبان د چاپېریال ساتنې ادارې پرون ویلي، ایران ته يې د ۳۵ نادرو مرغانو د قاچاق مخه نیولې ده.

که څه هم طالب چارواکي د چاپېریال ساتنې او وحشي حیواناتو د ساتنې خبر ورکوي، خو وخت ناوخته د افغانستان په بېلابېلو ولایتونو کې د ناقانونه ښکار او له چاپېریال سره د ناوړه چلند راپورونه ورکول کېږي.

د بلوچستان په بلوڅ مېشته سیمه قلات کې وسله‌والو د ملېشه ځواک پر یوې پوستې په برید کې اووه عسکر وژلي او ۱۳ نور يې ټپیان کړي دي.

د قلات مرستیال کمېشنر علي ګل بلوڅ پرون د نومبر۱۶مه د ازادي راډیو مشال برخې ته ویلي، دا برید شپې مهال د جوهان په غزنۍ سیمه کې شوې ده.

د بلوڅ په خبره، وسله‌والو دا برید د شاه مردان په نامه د ملېشه ځواک پر امنیتي پوستې کړی او له سیمې په تېښته بریالي شوي دي.

بلوڅ دا نه دي ویلي چې د امنیتي ځواکونو له‌خوا وسله والو ته کوم زیان رسېدلی او که‌نه، خو د نوموړي په خبره، په برید کې وژل شوي او ټپیان روغتون ته انتقال شوي دي.

بلوڅ بېلتون غوښتونکې وسله‌والې ډلې د برید مسوولیت منلی دی.

یادې دلې د ازادي راډیو مشال برخې ته په رالیږلې خبرپاڼه کې ادعا کړې چې په دې برید کې يې پاکستاني عسکرو ته په لویه کچه زیان رسولی، خو د بلوچستان صوبايي حکومت تراوسه په دې اړه څه نه دي ویلي.

د پاکستان د کورنیو چارو وفاقي وزیر محسن نقوي دا برید غندلی دی.

له دې وړاندې د نومبر په نهمه د کوټې د اورګادي په تمځاي کې په یوه ځانمرګي برید کې لږ تر لږه ۲۷ کسان وژل شوي او له ۶۰ نور ډېر ټپیان شوي وو چې ډېر شمېر يې پوځیان وو.

د دې برید مسوولیت هم بلوڅ بیلتون غوښتونکې ډلې منلی و.

د افغانستان فوټبال ملي لوبډلې له نیپال څخه دوه د صفر پر وړاندې ماتې وخوړه.

دا لوبه پرون د نومبر۱۶مه د تاجکستان په پلازمېنه دوشنبې کې د درې اړخیزه دوستانه ټورنمنټ په لړ کې ترسره شوه.

د افغانستان راتلونکې لوبه له کوربه تاجکستان سره ده.

دا لوبه به سبا دوشنبې د افغانستان په وخت پنځه نیمې بجې د دوشنبې په مرکزي لوبغالي کې ترسره شي.