د طالبانو حکومت د کډوالو او راستنیدونکو چارو وزارت ویلي، پرون یکشنبه د (کب ۱۹) مه د پاکستان له زندانونو ۲۱ افغان کډوال له بنده خوشې او خپل هېواد ته راستانه شول.
د کندهار ولايت د سپين بولدک د سرحدي امریت د معلوماتو له مخې، دغه کسان د پاکستان د بلوچستان ایالت په بېلابېلو سيمو کې د قانوني اسنادو د نه لرلو له امله نيول شوي وو او ۵ تر ۲۵ میاشتو پورې بنديان وو، چې د بشري مرستو له ترلاسه کولو وروسته خپلو اصلي ځایونو ته ولېږدول شول.
پاکستان په دې وروستیو کې د هغو افغانانو د ایستلو پروسه ګړندۍ کړې ده چې د استوګنې اسناد نلري.
اسلام آباد په دې وروستیو کې پریکړه کړې چې د افغانستان د تابعیت کارت (ACC) لرونکي به هم له پاکستان څخه وباسي.
د جمعې په ورځ، د مارچ په ۷مه، د پاکستان د کورنیو چارو وزارت په یوه بیان کې وویل چې د کارت لرونکي کسان د مارچ تر ۳۱مې پورې وخت لري چې "په عزت سره" له دې هیواده ووځي، که نه نو د دوی د اخراج پروسه به د اپریل په لومړۍ نیټه پیل شي.