د طالبانو تر کنټرول لاندې (د افغانستان بانک) مشر هدایت الله بدري د اسلامي مالي خدماتو د بورډ په ۲۲مه ناسته کې برخه اخیستې.
دا ناسته د جیبوتي هېواد په پلازمینه کې نن دوشنبې (د جولای لومړۍ) پیلیږي او سبا هم دوام کوي.
د افغانستان بانک په یوه بیان کې ویلي چې په دې ناسته کې به د اسلامي بانکدارۍ د ستندردونو، د مالي بنسټونو مدیریت، په اسلامي بانکدارۍ کې د دیجیتالیزیشن رول او په نړیواله کچه د اسلامي بانکدارۍ په پراختیا باندې بحث وشي.
مولوي هدایت الله بدري په تېرو دوو لسیزو کې د طالبانو د مالي کمیسیون مشر پاتې شوی او د تېر جمهوري نظام او لویدیځو هېوادونو په وړاندې یې د طالبانو د جګړې د تمویل سرچینې برابرولې.
د امریکا متحدو ایالتونو څو واره د افغانستان بانک په مشرتابه کې د جګپوړو طالب چارواکو پر ځای د مسلکي کسانو په ګومارنه ټینګار کړی.