د افغانستان د ووشو لوبغاړي نصرت الله حبیبي په اسیايي لوبو کې د برنزو مډال خپل کړ.
حبیبي دوشنبه ناوخته په ۷۵کیلو وزن کې د تایلند لوبغاړی مات کړ.
هغه د برنزو مډال د ګټلو تر څنګ په نیمه پایلوبه کې هم ځای پیدا کړ. تمه ده نیمه پایلوبه د چهارشنبې په شپه له ایراني لوبغاړي سره وکړي.
په روانو اسیايي لوبو کې چې د چین په هانګژو کې پیل شوي د افغانستان د تکواندو د ملي تیم لوبډلمشر محسن رضايي هم د دریو سیالانو په ماتولو سره د برنزو مډال ګټلی دی.
په دې اسیايي سیالیو کې شاوخوا ۸۰ افغان لوبغاړي برخه لري.
په دې ډله کې د والیبال، ځغاستې او بایسکل چلوونې په برخه کې اولس افغان نجونې هم ګډون لري، چې د طالبانو له بیا واکمنېدو وروسته له افغانستانه وتلي او بهرنیو هېوادونو کې اوسيږي.