د طالبانو د حکومت د هوايي چلند او ټرانسپورټ وزارت چارواکي هیله ښيي چې ژر به افغانستان ته د اماراتو او ترکش ایرلاینز پروازونه پيل شي.
د دغه وزارت مرستیال غلام جیلاني وفا ازادي راډیو ته وویل: "د بیمې په لحاظ دوی مشکل نه لري. کابل په میدان کې یې بیمه شته. فعالیت د ځمکې، ټول خدمات، امنیتي چک، د کارګو او مسافرو چک ټول د سټنډرډ او ایکاو مطابق دي. نو انشالله دوی به ژر پروازونه شروع کړي دا وعده یې موږ ته راکړې ده."
د طالبانو له بیا واکمنېدو را وروسته د اماراتو او ترکش ایرلاینز په شمول ګڼو لویو بهرنیو هوایي شرکتونو افغانستان ته خپل پروازونه ودرول.
طالب چارواکي وايي، د بهرنیو شرکتونو په نشتوالي کې اریانا افغان هوایي شرکت او کام ایر خپل پروازونه ډېر کړي خو بیا هم دوی ټولو نړیوالو شرکتونو ته ډاډ ورکوي چې خپل پروازونه پیلولی شي.