پر اوکراین د روسیې له یرغل سره سم، د افغانستان په ګډون په ګڼو هېوادونو کې د قربانیو لپاره څارویو بیې لوړې شوې دي.
په افغانستان کې ګڼو کسانو ویلي چې د ګرانیو له کبله نه دي توانېدلي قرباني یا اختری وکړي.
د افغانستان په ګډون د نړۍ په اکثرو اسلامي هېوادونو کې پرون د لوی اختر لومړۍ ورځ وه، چې خلکو په کې قرباني یا اختری هم وکړ.
له کینیا رانیولې تر روسیې او مصر پورې مسلمانانو اوږه پر اوږه د لوی اختر لمونځ وکړ او دعا یې وکړه.
د اسوشېټېډ پرېس اژانس په حواله، سږنی اختر په زیاتو هېوادونو کې د دې لپاره کمرنګه و، چې پر اوکراین د روسیې د یرغل له کبله د خوراکي او نورو موادو بیې لوړې شوې دي.
د لوی کندهار ولسي بنسټ مشر بصیر عطا چې له ولسي کړیو سره په ارتباط کې دی، وايي سږنی اختر په افغانستان کې ځکه کمرنګه و، چې ګڼو کسانو اقتصادي ستونزې درلودې.
نوموړی وايي: "۴۱لکه او ۸۳زره کسانو د بېلابېلو موسسو او ۲۳ وزارتونو یا نورو انجوګانو له لارې معاش ترلاسه کاوه، چې له دې لارې دغو ۴۰ ملیونه انسانانو په مستقیم یا غیرمستقیم ډول مالي ګټه اخیستله. له بده مرغه د هغه حکومت له سقوط سره هغه ټولې مالي منابع پر افغانستان بندې شوي، ځکه نو سږ کال په افغانستان کې اختر کمرنګه شوی، په دې چې افغانان له اقتصادي ستونزو سره لاس و ګرېوان دي."
افغانستان کې د مالونو بيې په کمساري ډول لوړې شوي دي.
په افغانستان او ځینو نورو هېوادونو کې مسلمانانو ویلي، چې د څارویو رانیولو وس یې نه درلود، ځکه نو ځینې یې ونه توانېدل قرباني وکړي.
وروسته له هغې چې طالبانو د ۲۰۲۱م کال په اګست میاشت کې پر افغانستان ولکه ټینګه کړه، بېوزلي، وزګارتیا او نورې ستونزې پراخې شوې دي.
د غنمو، غوښو او نورو ضروري موادو بیې هم څو برابره لوړې شوي، چې زیات کسان یې د رانیولو وس نهلري.
د څارویو یوه پلورونکي محمد قاسم اسوشېټېډ پریس اژانس ته ویلي تېر کال یې له ۴۰ تر ۵۰ پورې څاروي د لوی اختر په ورځو خرڅ کړي وو، خو سږکال یې یوازې دوې بزې پلورلي دي.
د لیبیا د پلازمېنې طرابلس وضعیت هم تر افغانستان بهتره نه دی، ځکه اوسېدونکي یې د کرونا تر دوه کلنې وبا او له تاوتریخوالي ډکو شخړو وروسته سږکال اختر داسې مهال لمانځي چې د یوه پسه بیه ۲۱۰۰ ډالرو ته رسېږي.
سعودي عربستان سږ کال د حج پر مهال د کرونا وایروس د خپرېدو د مخنیوي لپاره یو لړ محدودیتونه لګولي دي، چې د حج کوونکو شمېر کم شوی او ور روان کسان اړ وو چې د کرونا ضد واکسین کړی وي.
د اسوشېټېډ پریس اژانس د راپور له مخې، بیا هم د حج د سږکال مراسم عادي حالت ته راګرځېدلي، چې په سپېڅلو ځایونو کې د زیارت کوونکو ګڼه ګوڼه ښکارېدله او په زیاتو ساحو کې خلکو ماسکونه هم نه دي کارولي.