د روغتیا نړیوال سازمان یا who د سې شنبې په ورځ د تنباکو د زیانونو په اړه نوي معلومات خپاره کړل چې پکې راغلي، تنباکو هر کال د ميليونونه انسانو ژوند اخلي.
دا سازمان وایي، تنباکو د چاپیریال او د انسانانو روغتیا دواړو ته زیان رسوي اوغوښتنه کوي چې باید داسې ګامونه پورته شي چې صنعت یې د هغه ویجاړۍ لپاره چې د تنباکو په تولیداتو سره یې رامنځه ته کوي، ډېر حساب ورکوونکی وي.
د روغتیا نړیوال سازمان وایي، هر کال د تنباکو صنعت په نړۍ کې له اتو میلیونو د زیاتو انسانانو ژوند اخلي، شپږ سوه میلیونه ونې له مینځه وړي، یو ميلیون جریبه ځمکه ویجاړوي، ۲۲ ملیارد ټنه اوبه مصرفوي او څلور اتیا ميلیون ټنه کاربن ډای اکسایډ تولیدوي.
هر کال د تنباکو صنعت په نړۍ کې له اتو میلیونو د زیاتو انسانانو ژوند اخلي، شپږ سوه میلیونه ونې له مینځه وړي
د تنباکو ډیری برخه په ټیټ او متوسط عاید لرونکو هېوادونو کې کرل کېږي، چېرې چې اوبو او کرنیزې ځمکې ته ډېری وختونه په سیمه کې د خوړو د تولید لپاره سخته اړتیا وي.
د روغتیا نړیوال سازمان، تنباکو زموږ سیاره مسموموي، ترسرلیک لاندې په دې راپور کې یادونه کړې چې هغه کاربن چې د تنباکو د صنعت د تولید، پروسس او ټرانسپورټ په نتیجه کې تولیدیږي، د هغه کاربن یو پر پنځه برخه ده چې ټرانسپورټي هوایي شرکتونه یې په کال کې تولیدوي او هغه د ځمکې د کرې د تودوخې د لازیاتوالي سبب کیږي.