د لغمان په مرکز مهترلام کې د پرونۍ پېښې قرباني کورنۍ وايي، طالبانو یې د کورنۍ دوه تنه په ډزو وېشتلي، خو لا یې د دوی پوښتنه هم نه ده کړې.
د دې پېښې په ویډیو کې لیدل کېږي چې په کې یوه مور او لور په وینو لړلې روغتون ته لېږدول کېږي.
په ویډیو کې ادعا کېږي چې پر دې دواړو ښځو یوه طالب وسلهوال په پاسپورټ مدیریت کې دننه هغه مهال چې دوی بایومټریک ته کتار کې ولاړې وې، ډزې وکړې.
دا دواړه مور او لور اوس د لغمان په دولتي روغتون کې تر درملنې لاندې دي.
د قرباني کورنۍ یو غړی او د پېښې عیني شاهد عبدالرزاق قاضيزاده ازادي راډیو ته وویل، پېښه هغه مهال رامنځته شوه چې دوی پرون په پاسپورټ مدیریت کې د خپلې کورنۍ له غړو سره د بایومټریک لپاره کتار کې ولاړ وو.
دی وايي، طالب وسلهوالو قصداً دوی په نښه کړل او درې ډزې یې وکړې چې په دوو مرمیو یې د دوی د کورنۍ غړې چې مور او لور دي، په اوږه ولګېدې او درېیم ډز یې خطا شو: "پنځه لس کم څلور بجې وې. دې غوښتل چې له خپلو ۹ بچیانو سره دننه ولاړه شي. په دې وخت کې طالب نظامي راځي ورته وايي، مخکې مه راځه، خو دا ورته وايي چې زما نوبت دی. په همدې حال پرې مخامخ ډزې کوي."
خو له پېښې وروسته د لغمان د والي ویاند صلاحالدین زاهد ازادي راډیو ته وویل، له یوه وسلهوال په تېروتنې ډزې شوي چې په کې دوه ښځې ټپیانې شوي: "یوه نجلۍ او یوه ښځه لګیدلي او دواړه ټپیان شوي. تر عملیات وروسته یې روغتیا ښه ده او بله ستونزه نهشته."
په دې اړه نور: طالبان: لغمان کې یوه طالب ساتونکي په خطایي ډزو ۲ تنه ټپیان کړيخو ښاغلی قاضيزاده د طالب چارواکو دا څرګندونې بېعدالتي او د حقایقو پټول ګڼي.
عبدالرزاق قاضيزاده دا هم وايي، ټپیانې دواړه د لغمان ولایت مقام مخامخ په روغتون کې بستر دي، خو لا یې طالب چارواکو هېڅ پوښتنه نه ده کړې: "متاسفانه د دوی دا موقف د دې ښکارندويي کوي غواړي په دې جنایت پرده واچوي. یو زړه بوږونکی پېښه او ظلم شوی، خو د ولایت مقام رسنیز دفتر یوه اعلامیه خپروي."
د پېښې قرباني کورنۍ عدالت غواړي او وايي، هغه شخص ته باید سزا ورکړل شي چې په ملکي ادارو کې بېګناه انسان په ډزو ولي.
ازادي راډیو د دې ادعاوو او غوښتنو په اړه د طالبانو د حکومت د ویاندویانو نظر پوښتلی، خو د راپور تر خپرېدو یې ځواب ورنه کړ.
دا څوم ځل دی چې طالب نظامیان ملکیان په نښه کوي او وروسته یې د تېروتنې پایله بولي.
تېره اوونۍ د زینب په نوم یوه کوژده شوې نجلۍ هغه مهال چې له واده راستنېده موټر یې په نښه شو او ووژل شوه چې کوژدن یې ازادي راډیو سره په خبرو کې ویلي:" دیارلسمې حوزې یې پړه ومنله او ویې ویل چې موږ بښنه غواړو چې دا پېښه موږ کړې بس همداسې دا موضوع د بښنې تر حده پاتې ده."
په دې اړه نور: د وژل شوې زینب کورنۍ: طالبانو زینب ووژله او د غم په ټغر یې کینولومیاشت وړاندې د کابل په قوايي مرکز سیمه کې هم د مور یوازینی زوی فیصل د طالب نظامیانو په ډزو کې ووژل شو، خو طالبانو دا پېښه هم خپله تېروتنه وبلله.
له دې وړاندې طالب چارواکو په ځلونو ویلي چې د حکومت له پیل وروسته یې په افغانستان کې د مرګژوبلې شمېر صفر ته را ښکته شوی، خو ښکاري چې لاهم د ټوپک له خولې وتلې مرمۍ د چا ژوند اخلي او څوک د روغتون تر بستره رسوي او مسوولین هم پېښو ته د رسېدنې په اړه څه نه وايي.