پر قلعه‌نو د طالبانو برید؛ د سولې په اړه یې د تهران پر غونډې سیورۍ وغوړاوه

د افغان سولې په تړاو د تهران پر غونډې د قلعه نو جګړې سیورۍ وغوړاوه، خو بیا هم د کوربه هېواد د بهرنیو چارو وزیر د پرونۍ غونډې په پیل کې تمه ښکاره کړه چې د افغان دولت او طالبانو استازي به مهمې پرېکړې وکړي.

د دې غونډې له جوړېدو سره په یوه ورځ طالبانو د بادغیس پرمرکز قلعه نو سخت برید وکړ، دې ښار ته ورننوتل او د ورځې په وروستیو کې دولتي چارواکو وویل چې طالبان یې له ښاره وایستل.

د افغانستان له لوري د ملي مصالحې د عالي شورا پلاوی د پخواني مرستیال ولسمشر یونس قانوني په ګډون د تهران په غونډه کې برخه لرله او د طالبانو د پلاوي مشري د قطر د سیاسي دفتر مرستیال شېر محمد عباس ستانکزي کوله.

د افغانستان د سولې په چار

و کې د دولت د وزارت ویاندې ناجیې انوري ازادي راډیو ته وویل چې دا غونډه د اعتماد جوړولو په هدف ترسره شوه: "دا ناسته د دواړو خواوو د مذاکره کوونکو خواوو د اعتماد د پیاوړتیا او همدا راز د ایران د اسلامي جمهوریت د حمایت د اعلان په هدف جوړه شوه. په دې ناسته کې د دواړو خواوو پلاوي ګډون لري. ایران د یوه اغېزمن ګاونډي په حیث د افغانستان د سولې پر پروسې او په افغانستان کې د یوې باعزته او تل پاتې سولې په راوستو کې اغېزمن هېواد دی."

د افغانستان د سولې په چارو کې د دولت وزارت ویانده ناجیه انوري وایي، چې د تهران غونډه د اعتماد جوړونې په هدف ترسره شوه.

دا خبرې د ښکېلو لوریو ترمنځ د قطر د سولې د خبرو ادامه ګڼل کېږي چې په سېپټمبر کې پیل شوي دي او تراوسه په کې ډېر لږ پرمختګ شوی دی.

د ایران دولتي رسنۍ خبر ورکوي چې د ایران د بهرنیو چارو وزیر د دواړو لوریو هرکلی وکړ او هغوی یې وهڅول چې د خپل هېواد د راتلونکي لپاره په غونډه کې سختې پرېکړې وکړي.

محمد جواد ظریف وویل، بین الافغاني خبرو ته ورستنېدل او سیاسي حل لاره تر ټولو غوره لاره ده.

ښاغلي ظریف د ورځې په پای کې په ټویټر کې ولیکل چې په یوه حساس زمان کې د یوې مهمې غونډې کوربه و.

ظریف زیاته کړه چې افغانان نن کولی شي، د بهرنیانو له مداخلې پرته خپل راتلونکی برخلیک وټاکي.

بل لور ته د ایران نیمه دولتي اژانس ایسنا خبر ورکړ چې د هند د بهرنیو چارو وزیر اېس جي شنکر مسکو ته د سفر پر مهال پرون چهارشنبه (د چنګاښ ۱۶مه) مازدېګر په تهران کې ښکته شو او د ایران له منتخب ولسمشر او بهرنیو چارو وزیر سره یې وکتل.

هندوستان ټایمز ورځپاڼې پرون ولیکل چې ښاغلی شنکر مسکو ته د تهران له لارې سفر کوي چې د افغانستان پېښې هم د خبرو برخه دي.

د هند د بهرنیو چارو وزیر اېس جي شنکر مسکو ته د تهران له لارې ځي چې د افغانستان پېښې هم د خبرو برخه دي.

پر قلعه نو د طالبانو پروني برید د تهران پر غونډې سیورۍ غوړولی و او داسې وایسېده چې سیاسي حل لارې ته د رسېدو لپاره باید اوږده لاره کچ شي.

د بادغیس والي حسام الدین شمس پرون رسنیو ته د ورځې په وروستیو کې وویل چې طالبانو ته درانه تلفات اوښتي دي.

د بادغیس پر مرکز قلعه نو د طالبانو برید

که څه هم تراوسه د دې جګړې د تلفاتو دقیقه شمېره څرګنده نه ده، خو په بادغیس کې چارواکي وایي چې تر اتیا ډېر طالبان وژل شوي یا ټپیان شوي دي.

د افغان سولې ناڅرګند بهیر د ایران پر وضعیت هم تاثیر کوي، ځکه چې د ملګرو ملتونو د شمېرو له مخې په دغه هېواد کې لا هم شااوخوا دوه میلیونه افغان کډوال دېره دي او که د افغانستان جګړې پسې سختې شي ممکن دغه هېواد ته نور کډوال پسې ورشي.