د ننګرهار چارواکي وایي، د ملي امنیت ځواکونو د داعش هغه غړی نیولی چې یوازې پرون شنبه (د کب ۹مه) یې په جلال اباد کې د یوولسو چاودنو تابیا کړې وه.
د ننګرهار والي ضیاالحق امرخېل پر خپله ټویټرپاڼه د همدې نیول شوي کس انځور خپور کړی او ویلي یې دي، دې کس شپږ کړۍ ماینونه په یوې کراچۍ او پنځه نور یوه ګلدانۍ کې ځای پر ځای کړي وو.
ملي امنيت په جلال اباد ښار کې نن د ۱۱ کړۍ ماينونو ځای پر ځای کوونکی داعشي ونيوه، نوموړي د #ننګرهار مرکز جلال اباد ښار ۹مې ناحيه بارګينو سيمه کې په يوې کراچۍ کې۶ او دسړک په ګلدان کې يې ۵ کړۍ ماينونه ځای پر ځای کړي وو، چې امنيتي ځواکونو ۶ خنثى او ۵ کړۍ ته يې چاودنه ورکړه. 1/2 pic.twitter.com/a5sBnSTaa7
— Ziaulhaq Amarkhil (@ZiaulhaqAmarkhi) February 27, 2021
امرخېل ویلي، نیول شوي کس غوښتل دغو ماینونو ته پرون د سرتیري د ملي ورځې په اوږدو کې چاودنه ورکړي چې د ده په خبره شپږ دا ماینونه شنډ شوي او پنځه یې امنیتي ځواکونو چوولي دي.
دا په داسې حال کې ده چې پرون په جلال اباد ښار کې یوې چاودنې د ولایتي شورا غړی عبدالقهار قدیر ټپی کړی او یو ملکی کس یې وواژه.
د هغې چاودنې مسولیت چا لا نه دی منلی.