د امریکا استازو جرګې له څو ساعته بحثونو وروسته د ولسمشر ډونالد ټرمپ د استیضاح پرېکړې ته رایه ورکړه.
د جرګې دننه څو ساعته له احساساتو ډک بحثونه وشول او بهر د امریکا د ملي ګارد زرګونه سرتېري د امنیت لپاره ځای پر ځای شوي وو.
د امریکا کانګرس کې د امریکا د ملي ګارد سرتېري
ټرمپ تورن دی چې د جنورۍ په شپږمهیې خپل پارېدلي پلویان پر کانګرس یرغل ته هڅولي دي، هغه کار چې د امریکا پر ډیموکراسۍ برید بلل شوی دی.
دا د امریکا په تاریخ کې لومړنی ولسمشر دی چې د واک پر مهال دوه ځله استیضاح کېږي.
په جرګه کې ۲۳۲ قانون جوړوونکو د ټرمپ استیضاح ته د هو او ۱۹۷ نورو د نه رایه ورکړه.
په مثبتو رایو کې ۲۲۲ د ډیموکراتانو او ۱۰ نور یې د جمهوري غوښتونکو غړو دي.
اوس به د امریکا په سنا جرګه کې چې د ټرمپ پلویان پهکې ډېر دي، د ټرمپ د استیضاح لپاره محکمه جوړېږي، خو اټکل دا دی چې سنا به د جنورۍ له ۲۰مې یا د ټرمپ د واک له پای ته رسېدو مخکې د محکمې دا غونډه ترسره نهکړي.
د امریکا ولسمشر ډونالد ټرمپ
دا په دې معنی چې که سنا د استیضاح پرېکړه تأیید هم کړي، ټرمپ له ټاکلې مودې مخکې له واکه د لیرې کېدو له خطره بچ کېږي.
په استازو جرګه کې ځینو جمهوري غوښتونکو د ټرمپ د استیضاح په ضد غږونه اوچت کړل او ویېویل، ټرمپ پر کانګرس د هغه د پلویانو په یرغل کې لاس نهدرلود.
دا دوهم ځل دی چې د استازو جرګې ډیموکراتان د ډونالد ټرمپ د استیضاح هڅه کوي.
د هغه لومړنۍ استیضاح چې له اوکراین سره د اړیکو او له واکه د ناوړه ګټې اخیستنې په اړه وه، د سنا جرګې له مخالفت سره مخامخ شوه، دغې جرګې چې جمهوريپال پهکې اکثریت دي، هغه مهال پر ټرمپ لګول شوي تورونه رد کړل.
د امریکا استازو جرګې یوه ورځ وروسته تر دې د ولسمشر ډونالد ټرمپ د استیضاح پرېکړه وکړه چې د ټرمپ لومړي مرستیال مایک پنس ونهمنله چې د ښاغلي ټرمپ لیرې کولو لپاره د اساسي قانون یوه ماده وکاروي.
د امریکا مرستیال ولسمشر مایک پنس
د استیضاح دا پرېکړه داسې مهال کېږي چې د امریکا منتخب ولسمشر جو بایډن د جنورۍ په ۲۰مه، یعنې راتلونکې چهارشنبه لوړه کوي.
که څه هم په سپینه ماڼۍ کې د ډونالد ټرمپ د واک یوازې یوه اوونۍ پاتې ده، خو د هغه د استیضاح پرېکړه تر ډېره سیاسي پيغام لري.