په بیلاروس کې جمهوري ریاست ته د اپوزېسیون کاندیده سویتلانا څيخانوسکایا وایي چې هېواد به یې د یوه سړي په لاس کې برمته پاتې نه شي.
څيخانوسکایا پرون د سېپټېمبر په ۳مه له لیتوانیا د ملګرو ملتونو امنیت شورا ته په ویډیو کنفرانس کې خبرې کولې.
هغې وویل چې په بیلاروس کې یو سړی په قدرت کې د پاتې کېدو تږی خو د خلکو زغم پای ته رسېدلی دی.
په بیلاروس کې د اګسټ په نهمه د جمهوري ریاست ټاکنې وشوې او الکساندر لوکاشینکا د ګټونکی اعلان شو.
لوکاشینکا له تېرو ۲۶ کلونو راهیسې په بیلاروس کې د واک پر ګدۍ ناست دی.
سویتلانا څیخانوسکایا د لوکاشینکا د بري له خبر سره خپل مخالفت د اګسټ په لسمه د خپل هېواد د ټاکنو په کمېسیون کې ثبت کړ او لیتوانیا ته وتښتېده.
د امنیت شورا ته په خبرو کې څیخانوسکایا په خپل هېواد کې د روانو مظاهرو یادونه وکړه او وې ویل چې د پولیسو له سخت چلند سره هره ورځ زرګونه وګړي د مظاهرې لپاره له خپلو کورونو را وزي اودا څرګندوي چې هغوي یې نه نور نه شي زغملای.
مینسک کې د اعتراض کوونکو یو انځور
سویتلانا څيخانوسکایا د امنیت شورا غونډې ته وویل: "زما د ولس له نظره د ښاغلي لوکاشینکا رژیم له اخلاقي اړخه فاسد، له حقوقي اړخه تر سوالونو لاندې دی، اساساً د پاتې کېدو وړ نه دی."
د بیلاروس د اپوزېسیون کاندیدې د ملګروملتونو له سازمانه غوښتنه وکړه چې د دې په وینا، د اروپا په منځ کې پر بشري حقونو روان تېری ودروي او مرسته وکړي.
سویتلانا څيخانوسکایا وویل چې په بیلاروس کې د الکساندر لوکاشینکا له رژیم سره همکاري او د هغه ملاتړ په زغرده د تشدد او پر بشري حقونو د څرګند تېري ملاتړ دی.
هغې پر نړیواله ټولنه غږ وکړ چې له ټولو امکاناتو کار واخلي او په بیلاروس کې د روان زور او زیاتي مخنیوی وکړی.
سویتلانا څيخانوسکایا همدا راز پر هغو وګړو چې په بیلاروس کې د جمهوري ریاست په ټاکنو کې په درغلیو کې لاس لري او د دې په وینا د بشريت ضد جنایتونه یې کړي، د بندیزونو د لګېدو غوښتنه وکړه.
هغې وویل چې لوکاشینکا نور د بیلاروس استازیتوب نه کوي.
روسیه په بیلاروس کې د الکساندر لوکاشینکا د رژیم له کلکو ملاتړ کونکو ده.