د وسله والو طالبانو د قطر د دفتر یوه ډله مسکو ته تللې چې له روسي چارواکو سره خبرې وکړي.
دوی څو ورځې وروسته تر دې دا سفر کړی چې د امریکا ولسمشر ډونالد ټرمپ تېره اوونۍ د سپټمبر د پنځمې نېټې برید ته چې د کابل په شش درک کې وشو، په اشارې په واشنګټن کې وویل چې له طالبانو سره د سولې خبرې نورې نه شته.
د امریکا ولسمشر په خپل ټوېټر کې د قهرجنو پيغامونو په لیکلو سره وايي، غوښتلیې چې د سپټمبر په اتمه، په ډېوېډ کمپ کې د طالبانو له مهمو مشرانو سره محرمانه لیدنه ولري.
خو ښاغلي ټرمپ ویلي: د سولې خبرې له منځه تللي، ختمې شوې، تر کومه ځایه چې په ما پورې اړه لري، خبرې له منځه تللي، طالبانو فکر کاوه چې د خلکو په وژلو سره به یې په مذاکراتو کې دریځ لوړ شي، دوی د یوه تکړه امریکایي سرتېرې په ګډون دولس تنه ووژل.
Unbeknownst to almost everyone, the major Taliban leaders and, separately, the President of Afghanistan, were going to secretly meet with me at Camp David on Sunday. They were coming to the United States tonight. Unfortunately, in order to build false leverage, they admitted to..
— Donald J. Trump (@realDonaldTrump) September 7, 2019
روسي اژانس تاس د طالبانو د قطر د دفتر د ویاند سهیل شاهین په وینا خبر ورکړ چې د طالبانو پلاوي د افغانستان لپاره د روسیې له ځانګړي استازي ضمیر کابلوف سره د جمعې په ورځ کتلي دي.
ازادي راډیو دا تأییدوي چې د طالبانو پلاوی پرون په مسکو کې و.
بل لور ته افغان اسلامي اژانس راپور ورکړی چې مسکو ته د طالبانو د تللي پلاوي مشري په قطر کې د طالبانو د مذاکراتي ټیم مشر شېر محمد عباس ستانکزی کوي او په دې پلاوي کې سهیل شاهین او قاري محمد حنیف شامل دي.
افغان اسلامي اژانس څرګندوي چې د طالبانو پلاوی د مسکو له روان سفر وروسته پر دې فکر کوي چې چین ته سفر وکړي، خو د چین د سفر په اړه دې اژانس تر اوسه په خپله له طالبانو سره خبرې نه دي کړي.
په قطر کې د طالبانو د دفتر غړي
د افغانستان حکومت له طالبانو سره د سولې خبرې مشروطې کړي دي.
افغان ولسمشر اشرف غني تېره اوونۍ په کابل کې وویل: سوله بې قیده او شرطه نه ده او مذاکرات له اوربند پرته ممکن نه دي، موږ مذاکراتو ته تیار یوو.
مسکو روان میلادي کال دوه ځله د طالبانو د غونډو کوربه و.
له طالبانو سره د امریکایي پلاوي د خبرو له لغوه کېدو وروسته د افغانستان د سولې لپاره د امریکا ځانګړی استازی زلمی خلیلزاد کانګرس احضار کړی دی.
د امریکا متحده ایالتونو د کانګرس یوې کمېټې زلمی خلیلزاد په دې خاطر احضار کړی چې غواړي پوښتنې ترې وکړي.
د کانګرس دغه استماعیه غونډه د سپټمبر نولسمې (راتلونکې پنجشنبې) ته پلان شوې ده.
د استازو جرګې د بهرنیو چارو د کمېټې رئیس ایلیوټ اینګل وړمه ورځ وویل، د ټرمپ ادارې له دې چې خلیلزاد یې د خپلو فعالیتونو په اړه د خلکو استازو ته د جزیاتو له ورکولو لېرې ساتلی، ستړي شوي یوو.
هغه د ټرمپ اداره ملامته کړه چې عام امریکایان یې هم د سولې د پروسې په اړه بې خبره ساتلي دي.