په افغانستان کې د پخواني شوروي اتحاد د جګړې په اړه يو هنري فلم جنجالي شوى دى.
په افغانستان کې د پخواني شوروي اتحاد د ځواکونو قوماندان جنرال بوريس ګراموف او د روسيې د پارلمان د مشرانو جرګې غړي ايګور مورازوف پر هغه فلم انتقاد کړى چې په افغانستان کې د پخواني شوروي اتحاد د جګړې په اړه جوړ شوى دى.
په پام کې ده دغه فلم چې د شوروي اتحاد سرتېرو ته سپکاوى ګڼل شوى، په درېيو اوونيو کې نندارې ته وړاندې شي.
له افغانستانه د وتلو په نوم دغه فلم د روسيې د مشهور فلم لارښود پاول لونګين له خوا برابر شوى دى.
دغه فلم د روسيې د نورو فلمونو له محتوا سره چې په هغو کې د روسانو وطنپالنه نندارې ته وړاندې شوى، توپير لري.
په پام کې ده له افغانستانه د وتلو په نوم فلم د مې مياشتې پر ٩مه چې د نازي جرمني په وړاندې د بريا له کليزې سره برابره او په روسيه کې عمومي رخصتي ده، نندارې ته وړاندې شي.
خو وروستيو انتقادونو د دغه فلم د نندارې د نېټې په اړه شکونه ولاړ کړي دي.
په افغانستان کې د پخواني شوروي اتحاد قوماندان جنرال بوريس ګراموف د روسيې د کلتور وزارت ته ليک ليکلى او دغه فلم يې له روسانو د بېرې له سپکاوي ډک دوديز مثال بللى دى.
پهدغه فلم کې له ١٩٧٩میلادي کال څخه تر ١٩٨٩میلادي کاله پورې په افغانستان کې د پخواني شوروي اتحاد سرتېري انځور شوي
ګراموف چې د پخواني شوروي اتحاد تر سقوط وروسته سياسي صحنې ته داخل شوى او له ٢٠٠٠میلادي کال څخه تر ٢٠١٢میلادي کاله پورې د مسکو والي و، ليکلي:
له افغانستانه د وتلو فلم کې روسي سرتېري د اوباشانو، جنايتکارانو او نامردو کسانو په توګه معرفي شوي دي.
راپورونه وايي، پهدغه فلم کې له ١٩٧٩میلادي کال څخه تر ١٩٨٩میلادي کاله پورې په افغانستان کې د پخواني شوروي اتحاد سرتېري انځور شوي دي.
د دغو کلونو په جګړه کې څه باندې ١٤٠٠٠ روسي سرتېري وژل شوي او بالاخره افغانستانه د شوروي اتحاد د سرو لښکرو د وتلو سبب شوه.
په فلم کې ښوول شوي چې روسي سرتېري د خلکو مالونه لوټي او شراب څښي.
ګروموف د يوه انجمن مشري کوي چې د جګړې په لسګونو زره سابقه دار کسان پهکې غړي دي.
دغه انجمن د روسيې له کلتور وزارت څخه غوښتنه کړې چې د فلم د خپرېدو اجازه دې نه ورکوي
د روسيې د مشرانو جرګې د فرهنګي چارو کمېسيون رئيس ايګور مورازوف چې په خپله هم د افغانستان د جګړې له سابقه لرونکو څخه دى، ويلي دي چې د فلم جوړوونکي پاول لونګين د هېوادپالنې د روحيې خلاف فلم جوړ کړى چې په اردو کې د خدمت کولو لپاره د ځوانانو لېوالتيا کموي.
د ښاغلي مورازوف په خبره دغه فلم د پخواني شوروي اتحاد سرتېري ښيې چې پر هر سړک نشه ګرځي، جنګ او لانجې کوي او کاروانونه تالا کوي.
مورازوف ويلي، دغه فلم د شوروي اتحاد د وژل شويو غړو پر يادونو تور داغ لګوي او د روسيې حيثيت ته تاوان رسوي.