د ایران ولسمشر حسن روحاني پر پاکستان غږ کړی چې د هغې وسله والې ډلې پر ضد جدي اقدام وکړي چې د دواړو هېوادونو پر ګډ سرحد یې انتحاري حمله کړې ده.
روېټرز خبري اژانس د ایران د دولتي خبري اژانس ایرنا په حواله لیکلي چې حسن روحاني پاکستان ته ویلي چې که اقدام ونه کړي، د دواړو هېوادونو روابط به له ګواښ سره مخ شي.
ایرنا ویلي چې د ایران ولسمشر پرون د مارچ په نهمه د پاکستان صدراعظم عمران خان ته دا خبرې په ټيليفون کړې دي.
د ایرنا په حواله، عمران خان روحاني ته ډاډ ورکړی چې ډېر ژر به ایران ته ښه خبر ورکړي.
د روان میلادي کال په فبرورۍ میاشت کې د ایران په جنوب ختيځ کې د پاکستان پولې ته په نږدې سیمه کې انتحاري حمله وشوه چې د ایران د انقلابي ګارد ۲۷ غړي په کې ووژل شول.
د ایران پر سپاه پاسداران انقلاب ځواکونو د برید د ځای یو انځور
د حملې مسؤلیت د جیش العدل په نوم سني ډلې واخیست.
د روېټرز خبري اژانس په حواله، جیش العدل په سیمه کې د اقلیت بلوچانو د حق د زیاتېدو او د هغوی د ژوند د شرایطو د ښه کېدو لپاره مبارزه کوي.
د ایران په سرحدي سیمو کې د اقلیت سنيانو ملېشه ډلو د ایران پر امنیتي ځواکونو حملې زیاتې کړې دی.
د ایرنا په حواله، حسن روحاني په پرونۍ ټيليفوني مکالمه کې عمران خان ته ویلي:
"موږ د ترورېستانو پرضد ستاسو د جدي عملیاتو په تمه یوو."
حسن روحاني ویلي:
"موږ باید هغو کوچنیو ترورېستي ډلو ته چې د وسلو او پيسو د تمویل ځایونه یې ټولو ته معلوم دي، اجازه ورنه کړو چې زموږد هېوادونو دوستانه روابط خراب کړي."
په مقابل کې یې د ایران خبري اژانس ایرنا د عمران خان په حواله لیکلي چې د ترورېستي ډلو پر ضد مبارزه په اصل کې پاکستان د ځان په ګټه بولي.
د پاکستان صدراعظم عمران خان
عمران خان ویلي چې د ایران له لوري د ور رسېدلو معلوماتو له مخې به، د پاکستان پوځ قاطع عمل وکړي.
د پاکستان صدراعظم ایران ته ډاډ ورکړی چې امنیتي ځواکونه یې د ترورېستانو پټو ځایونو او زېرمتونونو ته نږدې شوي او ډېر ژر به تهران ته زېری ورکړي.
ایران تر دې وړاندې هم د پاکستان له خاورې پر خپلو سرحدي سیمو د حملو له امله شکایت کړی دی.
پاکستان ادعا کوي چې د ترورېزم ضد مبارزه کوي او د ترورېزم قرباني دی.