د افغانستان روغتيا وزارت راتلونکې دوشنبه په ١٨ ولايتونو کې د ګوزڼ يا پوليو پرضد د واکسين فرعي کمپاين پيلوي.
د وزارت په خبره، د دغه کمپاين په مرسته به ٥ ميليونه او درې لکه ماشومان واکسين شي.
د افغانستان د روغتيا وزارت د ګوزڼ له منځه وړلو د ملي پروګرام د عامه اړيکو مسؤل ډاکتر ميرجان راسخ ازادي راډيو ته وويل:
"د کمپاين موخه دا ده چې پنځه اعشاريه درې ميليونه ماشومانو ته د پوليو ضد واکسين ورکړل شي، دا کمپاين په هغو سيمو کې پلى کېږي چې د دې ويروس له لوړ خطر سره مخ وي."
د روغتیا وزارت چارواکو ویلي چې د روان ۲۰۱۸ میلادي کال له پیل راهیسې په هلمند، کندهار، ارزګان، کونړ، نورستان او ننګرهار ولایتونو کې د ماشومانو د ګوزڼ یا پولیو ۱۹ مثبتې پېښې ثبت شوي دي.