د افغانستان د ولسي جرګې د نړیوالو اړیکو کمېسیون وايي چې د امریکا په بهرنیو چارو وزارت کې د افغانستان لپاره د ځانګړي سلاکار په توګه د زلمي خلیلزاد ګمارل به د افغانستان پر وضعیت مثبت تأثیر ولري.
د امریکا په بهرنیو چارو وزارت کې د افغانستان لپاره د زلمي خلیلزاد د ځانګړي سلاکار په توګه له ټاکلو سره هممهاله د افغانستان د ولسي جرګې د نړیوالو اړیکو کمېسیون وايي چې ښاغلی خلیلزاد به د دغه هېواد لپاره مهم رول ادا کړي.
د دغه کمېسیون مرستیال داوود کلکانی وايي چې زلمی خلیلزاد د ترورېزم د تمویل او د ترورېستانو د پټنځایونو په اړه بشپړ معلومات لري او له ګمارنې سره به د دغې پدیدې په وړاندې مبارزه جدي او چټکه شي.
خلیلزاد د پاکستان د دوه مخي سیاست په اړه درست معلومات لري.
ښاغلي کلکاني د چهارشنبې په ورځ «۱۳۹۷ کال د وږې ۱۴» ازادي راډيو ته وویل چې خلیلزاد د افغانستان په اړه د پاکستان د دوه مخي سیاست په اړه هم معلومات لري.
داوود کلکاني
نوموړی وايي:
"نوموړی د افغانستان او سیمې په اړه کافي معلومات لري او هغه څوک دی چې تل د افغانستان او د سیمې په جریانونو کې ښکېل و، د پاکستان د دوه مخي سیاست په اړه درست معلومات لري، نو ښاغلی خلیلزاد کولای شي په سیمه کې د امنیت او سولې راوستو او له ترورېزم سره مبارزه کې بریالی وي."
د امریکا د بهرنیو چارو وزیر مایک پامپيو د سې شنبې په ورځ پاکستان ته د سفر پر مهال ویلي و چې د امریکا په بهرنیو چارو وزارت کې د افغانستان مسؤلیت زلمي خلیلزاد ته سپارل شوی دی.
ښاغلي پامپيو ویلي، د امریکا د رهبرۍ هڅې دا دي چې د افغانستان د اوربند او سولې پروسې زلمي خلیلزاد ته وسپارل شي.
په دې اړه نور: د امریکا د بهرنیو چارو وزیر نن اسلاماباد ته ځيزلمی خلیلزاد افغانيالاصل امریکايي ده او د پاکستان له منتقدانو شمېرل کېږي.
نوموړي له دې وړاندې په افغانستان، عراق او ملګرو ملتونو سازمان کې د امریکا د متحده ایالاتو د سفیر په توګه دندې ترسره کړي.
په یو شمېر راپورونو کې راغلي چې ښاغلي خلیلزاد پاکستان ته د امریکا د بهرنیو چارو وزیر مایک پامپيو او د دغه هېواد لوی درستیز جوزف ډانفورد سره په سفر کې ملګرتیا کوي.
بلخوا یو شمېر پاکستاني څېړونکي وايي، که څه هم امریکا غواړي چې له پاکستان سره ترینګلې اړیکې ښه کړي، خو د خلیلزاد ګمارنه له دغې مسئلې سره مرسته نهشي کولای.
په پاکستان کې د پوځي چارو کارپوه زاهد حسین رسنیو ته ویلي چې خلیلزاد تل د پاکستان په اړه جدي انتقادونه کړي چې دا مسئله د چارو له سمون سره مرسته نهشي کولای.
په ورته وخت کې د سیاسي چارو افغان کارپوه شهزاده مسعود وايي، ښاغلی خلیلزاد هغه شناخت چې له سیمې او افغانستانیې لري، کولای شي د دغه هېواد په مسایلو کې مهم نقش ادا کړي.
شهزاده مسعود
ښاغلي مسعود زیاته کړه:
"جناب خلیلزاد په افغانستان کې د سفیر په توګه کار کړی، له افغانانو، افغانستان او هم سیمې سره ښه بلدیت لري، افغانان د نوموړي کار ته خوشبین دي او تمه لري چې له افغانانو د سیمې هېوادونو په ځانګړې توګه د سولې د موضوع په اړه لیده کاته ولري."
زلمی خلیلزاد پهداسې حال کې د افغان سولې د هڅو د دوام لپاره پهدغه پوست په دنده ګمارل کېږي چې په دغه هېواد کې سوله او پهدې برخه کې د پاکستان مرسته د خبرونو سرټکي جوړوي.
په دې اړه نور: خلیلزاد د افغانستان لپاره د امریکا د بهرنیو چارو وزارت خاص سلاکار وټاکل شود امریکا د بهرنیو چارو وزیر مایک پامپيو اسلاماباد ته د سفر پر مهال ویلي چې له پاکستاني چارواکو سره به په لیدنه کې ټینګار وکړي چې اسلاماباد په ځانګړې توګه د دغه هېواد نوی صدراعظم عمران خان په افغانستان کې د جګړې ختمېدو او سولې او ثبات سره مرسته وکړي.
راپور: رحمتالله افغان