په بلخ ولایت کې له عطا محمد نور سره د یو شمېر افغان لوړپوړو چارواکو له خبرو اترو وروسته د افغان حکومت اجرائیه رئیس وايي، د بلخ ولایت په سر راپورته شوې ستونزه د حل کېدو په حال کې ده.
عبدالله عبدالله چې د دوشنبې په ورځ «۱۳۹۶ کال د کب ۱۲» يې د وزیرانو شورا له ناستې وړاندې رسنیو ته خبرې کولې، په دې اړه خوښي ښکاره کړه او ويېویل چې په نورو برخو کې به هم پرمختګونه ولرو.
ښاغلي عبدالله زیاته کړه:
"د کال په وروستیو ورځو کې يوو، زیات خوشحاله یم، هغو مسایلو چې د بلخ په ولایت پورې يې اړه لرله، د حل کېدو په حال کې دي او انشاءالله چې په نورو برخو کې به هم پرمختګونه ولرو."
د افغان حکومت اجرائیه رئیس عبدالله عبدالله
دا په داسې حال کې ده چې اته ورځې وړاندې د افغانستان د ملي امنیت عمومي رئیس معصوم ستانکزی او د ولسمشر محمد اشرف غني د دفتر رئیس سلام رحیمي بلخ تللي وو او له عطا محمد نور سرهيې د بندو دروازو تر شا خبرې اترې وکړې.
د ولسمشر مرستیال ویاند دوا خان مینهپال همغه ورځ د دې لیدنې د پایلو په اړه هیلهمندي وښوده او ویېویل، هیله شته چې وروستۍ خبرې اترې به مثبته نتیجه ورکړي او حکومت د دې مسئلې د سولهییز حل غوښتونکی دی.
نږدې درې میاشتې وړاندې جمهوري ریاست د عطا محمد نور استعفا ومنله او انجنیر محمد داوود يې د بلخ نوی والي اعلان کړ.
خو جمعیت اسلامي ګوند او عطا محمد نور د ارګ دغه پرېکړه یو طرفه وبلله او ويېویل چې تر هغې به د بلخ د والي په توګه خپلې دندې ته دوام ورکړي، تر څو له ارګ سره موافقې ته نهوي رسېدلی.
په ورته وخت کې د بلخ د پخواني والي عطا محمد نور ویاند منیر فرهاد وايي، په دې اړه لا هم د ارګ او د جمعیت د استازو ترمنځ خبرې اترې جریان لري او هیلهمندي شته چې یوې پایلې ته ورسېږي.
منیر فرهاد
ښاغلي فرهاد د دوشنبې په ورځ په دې اړه ازادي راډيو ته وویل:
"خبرې اترې روانې دي، په مهمو مسایلو خبرې شوې دي، موږ د رامنځته شوې ستونزې د حل پلویان یوو او هیلهمندي ښکاره کوو چې دا مسئله ډېر ژر په ښه شکل حل شي، خو د ویتو او پرېکړې وروستی حق یوازې د جمعیت اسلامي ګوند رهبري پر غاړه لري."
د منیر فرهاد د معلوماتو له مخې، له هغې وروسته چې د افغانستان د ملي امنیت عمومي رئیس معصوم ستانکزي او سلام رحیمي په بلخ کې له عطا محمد نور سره وکتل، په دې اړه په کابل کې د ارګ او د جمعیت اسلامي ګوند د استازو ترمنځ خبرې اترې هم شوې دي.
دا په داسې حال کې ده چې له دې مخکې د امریکا د ولسمشر مرستیال له ولسمشر محمد اشرف غني سره په یوه ټیلیفوني اړیکه کې په بلخ ولایت کې په خپل وخت او په سولهیيز ډول د واک پر لېږد ټینګار کړی دی.
راپور: اکرامالله اکرام