د ایران ستر مذهبي مشر ايتالله علي خامنهاي د دغه هېواد د ولسمشريزو ټاکنو د کانديدانو تر منځ لفظي لانجې بېمعنی بللې دي.
ده ويلي چې په دغو ټاکنو کې به د خلکو ګډون دغو لانجو ته د پای ټکی کېږدي.
د ايران په انتخاباتو کې مخالفو کانديدانو په ټلوېزيوني مناظرو او ويناوو کې پر يو بل د اداري فساد تورونه پورې کړي دي او دغه کمپاين د ايران د تېرو څلوېشتو کلونو په اوږدو کې تر ټولو ډېر له شخړو ډک بلل شوی دی.
د ايران ستر مذهبي مشر ایتالله علي خامنهاي د چهار شنبې په ورځ په خپله وينا کې وويل:
"د ټاکنو په بحث کې ځينې داسې خبرې وشوې چې د ايران ملت ته بېمعنی وې، خو په ټاکنو کې د خلکو پراخ ګډون به دا هر څه لهمنځه يوسي."
د ایران ولسمشر حسن روحاني.
د ايران اوسنی ۶۸ کلن ولسمشر حسن روحاني غواړي د دوهم ځل لپاره ولسمشر وټاکل شي.
محافظهکار مخالفينيې وايي، دی د اقتصاد په ښه کولو کې پاتې راغلی دی.
دا په داسې حال کې ده چې د ايران اقتصاد له لسيزو راهيسې د نړیوالو بنديزونو له کبله تر فشار لاندې دی، که څه هم یو شمېر بنديزونه وروسته له هغه لیرې شول چې روحاني له نړيوالو سره اټمي موافقه وکړه.
ابراهیم رئیسي.
د روحاني تر ټولو لوی سیاسي مخالف ۵۶ کلن محافظهکاره مذهبي مشر ابراهيم رئيسي دی چې وايي ايران بهرنیو مرستو ته اړتيا نهلري او د ۱۹۷۹ میلادي کال د اسلامي انقلاب د ارزښتونو د راژوندي کولو ژمنې کوي.
په ۲۰۰۹ میلادي کال کې د لانجمنو انتخاباتو وروسته ايران له ناکرارۍ سره مخامخ شو چېرته چې سیاسي لاريونونه کمساري وو.
لاريونونو امنيتي ځپنې ته د پای ټکی کېښود.
د ايران ستر مذهبي مشر ایتالله علي خامنهاي د ایران په ټولو مسايلو کې د اخري پرېکړې حق لري او که دی مړ شي، ولسمشر د راتلونکي مذهبي مشر په ټاکلو کې مهم رول لري.
ایتالله عالي خامنهای.
خامنهاي په ۱۹۸۰مه لسيزه کې هغه مهال ولسمشر وو چې د ايران د اسلامي انقلاب طراح او د هغه وخت مذهبي مشر ايتالله خميني مړ شو.
وروسته خامنهاي د شورای نګهبان لهخوا د ايران مذهبي مشر وټاکل شو.