د ترکیې خلک نن یکشنبه د خپل هېواد د اساسي قانون د تعدیل په ټولپوښتنه کې ګډون کوي.
د ترکیې ولسمشر رجب طیب اردوغان پر ترکانو غږ وکړ چې د اساسي قانون د تعدیل ملاتړ وکړي.
اردوغان: په دې هېواد کې به بدلون راشي.
هغه پرون په استانبول کې یوې غونډې ته وویل:
"زه وایم چې سبا به په دې هېواد کې بدلون راشي، زما خلک به د ترکیې جمهوري په تاریخ کې د اصلاح ستر بدلون راولي."
د نظر پوښتنو پر اساس داسې ګڼل کېږي چې د اساسي قانون د تعدیل پلویان تر مخالفانو لږ برلاسي دي.
هغوی وايي چې د قانون تعدیل به د ترکیې له ثبات او ډموکراسۍ له ودې سره مرسته وکړي.
خو مخالفینیې وايي چې د اساسي قانون تعدیل به د اردوغان په ګټه تمام شي، پارلمان به کمزوری کړي، قضا به سیاسي شي او د ولسمشر اجرايي صلاحیت به زیات کړي.
په ترکیه کې د تېر کال د جولای له میاشتې چې د حاکم نظام پر ضد ناکامه کودتا وشوه، اضطراري یا بېړنی حالت ټینګ دی.
هلته د کودتا تر ناکامې هڅې وروسته، لسګونه زره ترکان چې محصلین د پوهنتونونو استادان، خبریالان او مدني فعالان پهکې دي، بندیان شوي یا له دندو لیرې شوي دي.
په ترکیه کې څو مطبوعاتي ادارې هم وتړل شوې.
په ترکیه کې د نننۍ ټولپوښتنې لپاره د ملاتړ راغونډولو کمپاینونو له یو شمېر اروپايي هېوادونو سره د انقرې اړیکې خرابې کړې.
جرمني او هالنډ د ترکیې حکومت استازو ته اجازه ورنهکړه چې هلته د مېشتو ترکانو تر منځ د کمپاین لپاره غونډې وکړي.
دې مسئلې د ترکیې ولسمشر رجب طیب اردوغان سخت په غوسه کړ.
اردوغان پرون هم په استانبول کې غونډې ته په وینا کې پر یو شمېر اروپايي هېوادونو تور پورې کړ چې د دې ټولپوښتنې مخالف کمپاین کې یې لاس درلود.
اردوغان غونډې ته وویل:
"له دې سره د هغوی څه کار؟ دا «ټولپوښتنه» له اروپايي قانون جوړونکو سره څه تړاو لري؟"