د سرپل ولایت سیمه ییز چارواکي وايي، د دې ولایت د کوهستاناتو ولسوالي د دولت پرضد، د وسله والو مخالفینو د جلب وجذب په مرکز اوښتې ده.
د سرپل والي وايي، دغه ولایت د پېچلي جغرافیايي موقعیت او د صعب العبورو سیمو د لرلو له امله، د بل هرشمالي ولایت په پرتله، د وسله والو مخالفینو پام ځانته اوړلی دی.
د سرپل والي ظاهر وحدت د شنبې په ورځ ازادي راډیو ته وویل چې د دغه ولایت د کوهستاناتو ولسوالي چې له شااوخوا یو نیم کال راهسې د طالبانو په ولکه کې ده اوس د مخالفینو د روزنې، تجهیز او د دولت پرضد د جلب وجذب په مرکزونو اوښتې ده.
هغه وویل که حکومت ورته تدابیر، ونه نیسي، جدي امنیتي ګواښ به رامنځته کړي.
وحدت: مخالفین ډېره توجه سرپل ته لري.
نوموړي زیاته کړه:
"مخالفین ډېره توجه سرپل ته لري، په دې دلیل چې سرپل یوه غرنۍ سیمه ده، د کوهستاناتو ولسوالۍ پېچلې او خطرناکه اراضي لري او مخالفینو پکې اډې د امن ځایونه او روزنېز مرکزونه جوړ کړي دي او حتې اوسمهال پکې ځان وژونکي هم روزي."
ښاغلي وحدت وویل، د سرپل ولایت امنیتي ګواښونه یې ډېر ځلې، د مرکزي حکومت له مسؤلینو سره شریک کړي، خو د ده په خبره، د مختلفو دلایلو له مخې په دې برخه کې اقدام نه دی شوی.
وحدت: بهرنیو ترورېستانو سرپل کې د انتحاري زدهکړو مرکزونه جوړ کړي
د ښاغلي وحدت په خبره په دغه ولایت کې اکثره جنګیالي د بهرنیو هېوادونو اتباع دي.
په ورته وخت کې د سرپل د ولایتي شورا رئیس محمد نور رحماني هم په سیمه کې د ناامنیو پر زیاتېدو اندېښنمن دی او وايي چې د کوهستاناتو پر ولسوالي سربېره، د دغه ولایت څو نورې سیمې هم د وسله والو طالبانو تر کنټرول لاندې راغلي دي.
رحماني: طالبانو څو نورو سیمې هم لاندې کړي دي.
نوموړي زیاته کړه:
"د سرپل ولایت خلک له جدي امنیتی ستونزو سره مخ دي، اندېښنې مخ په زیاتېدو دي، د کوهستاناتو د ولسوالۍ تر سقوط وروسته، د کته کلا، شېرم های او یوشمېر نورې سیمې د مخالفینو تر کنټرول لاندې راغلي، له بده مرغه په دې وروستیو کې د صیاد ولسوالۍ څه باندې اویا فیصده برخه هم د دولت د مخالفینو لاس ته ورغلې ده."
د سرپل ولایت چارواکي وايي چې پر وسله والو طالبانو سربېره، د داعش ډله هم په دغه ولایت کې فعالیتونه لري.
سرپل هغه شمالي ولایت دی چې د سیمه ییزو مسؤلینو په خبره، ډېر ځله د حکومت د وسله والو مخالفینو د پراخو بریدونو شاهد و.
سرپل چارواکي: ۲۱ کمینونو کې ۱۲ وسلهوال طالبان وژل شوي
په ورته وخت کې د دفاع وزارت ویاند دولت وزیري ازادي راډیو ته وویل په سرپل ولایت کې پوځي ځواکونه موجود دي او د دولت د وسله والو مخالفینو مخه به ونیسي.
وزیري: اوس په سرپل ولایت کې د اردو قطعات لرو.
ښاغلي وزیري په دې اړه ازادي راډیو ته وویل:
"اوس په سرپل ولایت کې د اردو قطعات لرو، په هرځای کې چې امنیت کمزوری وي هغوی عملیات کوي، ما د والي صاحب خبرې واورېدلې، د دفاع په وزارت په جریان کې دی په هرځای کې چې ضرورت وي، عملیات اجراء کېږي."
د پوځي چارو کارپوه یوسف همت ازادي راډیو ته وویل، کشفي ارګانونه مخکې له دې چې د هر ډول امینتي ګواښ په اړه خبر ترلاسه کړي باید د مخنیوي لپاره یې له امینتې ځواکونو سره شریک کړي، اوکه نه نو، د یوې سقوط شوې سیمې بېرته نیول به ستونزې او تلفات ولري.
راپور: خان محمد سیند