مسکو نن د هغې غونډې کوربه دی چې پهکې د درې هېوادونو روسیې، چین او پاکستان استازي ګډون کوي او د افغانستان پر وضعیت خبرې کېږي.
په دې غونډه کې افغانستان ته د ګډون بلنه نهده ورکړل شوې او دا چې ولې؟ په اړهیې جزئیات نهشته.
د افغانستان د بهرنیو چارو وزارت ویاند احمد شکیب مستغني ازادي راډیو ته وویل، د یو هېواد په اړه خپله د هغه هېواد د استازي په نهموجودیت کې دا ډول غونډې پوښتنې راپورته کوي.
ښاغلي مستغني ازادي راډیو ته وویل، د افغانستان د بهرنیو چارو وزارت، په دا ډول غونډو کې موجود ګونګوالی او ابهام د اندېښنې وړ بولي.
د افغانستان د بهرنیو چارو وزارت ویاند احمد شکیب مستغني
ښاغلي مستغني زیاته کړه:
"د افغانانو په غیاب کې د افغانستان د وضعیت څېړل، که په نیک نیت هم وي، له یو پلوه نهشي کولای د وضعیت له ريښتیني څېړنې سره مرسته وکړي، له بل پلوه د افغانانو سره د دا ډول غونډو د اهدافو په اړه جدي پوښتنې راپورته کوي."
د دوشنبې په ورځ د افغانستان ولسي جرګې په مسکو کې د دې غونډې جوړېدل د افغانستان په چارو کې یوه څرګنده لاسوهنه وبلله.
د افغانستان ولسي جرګې رئیس عبدالرؤف ابراهیمي، د ولسي جرګې په عمومي غونډه کې له افغان حکومته وغوښتل چې پر دې موضوع خپل دریځ روښانه کړي.
د افغانستان ولسي جرګې رئیس عبدالرؤف ابراهیمي
ښاغلي ابراهیمي زیاته کړه:
"دا د افغانستان په چارو کې یوه څرګنده لاسوهنه ده. موږ هیله کوو چې د افغانستان اسلامي جمهوري دولت به د دې پرېکړو په اړه له ګاونډیو هېوادونو سره اړیکې ولري."
د افغانستان مشرانو جرګې هم په مسکو کې د روسیې، چین او پاکستان درې اړخیزه غونډه د دې هېواد په چارو کې مداخله بللې.
یو شمېر نا تائید شوي راپورونه په دې غونډه کې د طالبانو د استازو د ګډون خبره هم کوي.
خو ایا کېدای شي چې داسې غونډې د خبرو اترو مېز ته د طالبانو پر حاضرولو تمامې شي؟
یو شمېر نا تائید شوي راپورونه په دې غونډه کې د طالبانو د استازو د ګډون خبره هم کوي.
د افغانستان بهرنیو چارو وزارت ویاند احمد شکیب مستغني وايي، دا غونډه به کومه مثبته نتیجه ونهلري.
نوموړی وايي:
"هغه غونډه چې ګوندې د افغانستان وضعیت پهکې څېړل کېږي او په اړهیې د افغانستان له دولت سره مشوره نهده شوې، یا دا چې افغان حکومتیې له جوړېدلو سره موافق دی او کنه دا پهکې په پام کې نهده نېول شوې او افغانستان پهکې حضور نهلري، نهشي کولای چې ښې او مثبتې نتیجې ولري او یا دې ورته خوشبین واوسو."
چین او پاکستان چې نن په مسکو کې د دې غونډې اصلي ګډونوال دي په سیمه کې د یو بل کلیدي متحدان بلل کېږي.
روسیه چې د دې غونډې کوربهتوب کوي په دې وروستیو کې یې له طالبانو سره له خپلو اړیکو پرده پورته کړې ده.
تېره اوونۍ په ملګرو ملتونو کې د روسیې استازي وویل، له طالبانو سرهیې اړیکې یوازې په افغانستان کې د روسي وګړو د ساتنې لپاره دي څو هغوی ته د کار پر مهال زیان ونهرسېږي.