د بریتانیا د تلویزوني خپرونو چلونکې اټکل کوي چې د دې هېواد په پرونۍ تاریخي ټول پوښتنه کې بریتانویانو د اته ویشت غړېو لرونکې اروپايي ټولنې څخه د وتلو په پلوی رایې ورکړي دي.
بي بي سي اټکل کړی چې په دې ټولپوښتنه کې په سلو کې دوه پنځوس کسانو له اروپايي ټولنې څخه د وتلو په پلوۍ رایې ورکړي دي او په سلو کې اته څلوېښت کسانو غوښتي چې بریتانیا دې په اروپايي ټولنه کې پاتې شي.
دا اټکل وروسته له هغې شوې چې د بریتانیا د ۳۳۹ انتخاباتي حوزو څخه د ۳۸۲ هغو رایې وشمارل شوې.
هغه کمپاین چې د اروپايي ټولنې څخه د بریتانیا د وتلو غوښتنه یې کوله هم په دې ټولپوښتنه کې دې خپل بریالیتوب اعلان کړی دی.
فارګ: د بریتانیا د ریښتینو او عادي خلکو لپاره بریالیتوب
د بریتانیا د خپلواکۍ د ګوند مشر نیګیل فارګ وايي:
"که چېرې دا وړاندوینې سمې را ووځي دا به د بریتانیا د ریښتینو او عادي خلکو لپاره بریالیتوب وي."
د بریتانیا صدراعظم ډیویډ کامرون ته چې په اروپايي ټولنه کې د بریتانیا د پاتې کېدو پلوي دی یو نژدې کس ویلي:
"هېواد یې دا مهال په یو ناڅرګند قلمرو کې دی."
د انګلستان په شمال لویدیځ کې د پرتو ډېرو ښارونو استوګنو له اروپايي ټولنې څخه د وتلو په پلوی رایي ورکړي.
خو سکاټلېنډ او شمالي ایرلینډ بیا په اروپايي ټولنه کې د بریتانیا د پاتې کېدو په طرفدارۍ رایې ورکړي دي.
د انګلستان په شمال لویدیځ کې د پرتو ډېرو ښارونو استوګنو له اروپايي ټولنې څخه د وتلو په پلوی رایي ورکړي
لندن هم په اروپايي ټولنه کې د بریتانیا د پاتې کېدو قوي ملاتړ کړی او په سلو کې نهه اویا کسانو یې په دې ټولنه کې د دې هېواد د پاتې کېدو په پلوۍ یې رايې ورکړي.
که چیرې تایید شي چې بریتانویانو له اروپايي ټولنې څخه د وتلو په پلوۍ رایې ورکړي دا به د اروپايي ټولنې په تاریخ کې چې د دویمې نړیوالې جګړې راوروسته د اروپايي مشرانو په هڅو د اقتصادي اړیکو د ټینګښت او سولې په مقصد جوړه شوه لومړی وار وي چې یو پیاوړی غړی یې له دې ټولنې د وتلو پلوي کوي.
له اروپايي ټولنې څخه د بریتانیې د وتلو په پلوۍ دې ټولپوښتنې دا اندېښنې هم راپورته کړي چې د دې ټولنې په ځینو نورو غړېو هېوادونو کې به هم چېرې چې د خپلواکۍ غورځنګونه په زیاتېدو دي ورته ټولپوښتنې ترسره شي.